Board logo

標題: [others] 關於買及使用夜視鏡技巧既一d 討論 [打印本頁]
作者: derp    時間: 2-5-2019 03:32     標題: 關於買及使用夜視鏡技巧既一d 討論

1.導言
雖然近十年香港越黎越多人野戰玩夜視鏡, 不過使用上, 我見到香港 -- 甚至英文關於野戰既網站 -- 對夜視鏡既使用都唔太多人著墨. CGF 亦都只係十幾年前6MM 師兄係講夜間野戰技巧時輕輕帶過無夜視鏡情況下反制夜視鏡玩家技巧, 亦都見到香港有部份玩家玩夜戰或低光戰時, 只係單純出於對夜視鏡既不認識, 就一係覺得俾人屈機, 一係唔識反制夜視鏡俾人屈機, 結果就係唔玩走人. 因此希望可以俾到少少分享, 令有夜視鏡又好, 無夜視鏡又好既玩家都可以對呢個技術有多少少認識.呢篇長文係關於夜視鏡在野戰中既使用. 會討論以下幾個議題:
1)購買夜視鏡要考慮既事項, 相關裝備;
2)夜視鏡同肉眼既不同, 及因此實際操作應用上既議題;
3)反制夜視鏡戰術

呢篇文唔會討論到底係咪應該要只係因為打野戰就所以要買夜視鏡 -- 打野戰就係一門興趣. 對興趣俾幾多錢係好個人既事, 亦都盡量唔討論關於”邊種配件好D”, 或”邊隻鏡 / 管好”既話題, 亦唔會討論熱感儀或熱感夜視混合儀 (即例如ANPSQ-20 類).

我亦非聲稱文中所提及既係唯一一種夜視鏡 / 應對夜視鏡既方法. 野戰其中一個迷人既地方就係不論玩家放幾多錢落去, 最後呢個遊戲都係講誠信, 都係一槍死.只不過見到好似無人講, 咁我就開始呢個題目, 希望大家可以用黎討論下.

如果你係無打算買夜視鏡打野戰, 其實可以唔使睇第一部份, 可以直接跳到二樓.

2.夜視鏡原理
簡單黎講, 夜視鏡就係靠放大背景光黎去令原本肉眼見唔到既光譜變成可以見到. 同肉眼一樣, 如果完全無光, 夜視鏡都係無光可放, 結果使用者都係睇唔到. 如果當晚有星光, 肉眼會見到清楚D, 夜視鏡亦都會睇得相對清楚. 最初代既夜視鏡, 放大光度唔足夠可以單以放大背景光就可以正常使用, 係需要紅外線補光. 而自從80 年代起有既星光夜視鏡, 就開始可單以放大背景光就足夠正常使用.

3.購買夜視鏡須考慮事項, 相關裝備
首要問題為法律問題. 香港法例第60章<<進出口條例>>及其附例G禁止未經海關發牌進出口戰略物資 -- 而第二代以上增像管已經算係其中一種須獲發牌進出口既戰略物資. 但係留意<<進出口條例>>所規範既係進口及出口, 但不包括管有. 而且絕大部份現代夜視鏡, 係佢地出口國都好大機會會列明為須獲相關機構(例如國防部)發牌方可出口既物品. 因此如果玩家係有打算購買夜視鏡, 而又唔能夠申請海關及當地牌照既話, 就可能要考慮本地購買.

3.1裝備
夜視鏡基本可以分為個鏡本身與及支架. 作為玩家, 第一考慮不是戰場上生死, 而係如何穩妥地安裝你支鏡. 你可以係戰場上死一百次再重生, 但係你支鏡, 跌就會心裡會有無比的痛, 而且因為多數夜視鏡唔係諗住俾你用黎跌, 一跌個殼就會爛 -- 我已經試過, 希望你唔使試. 最好既方法係用傘繩打水手結或8 字結(https://www.netknots.com/rope_knots/bowline) 然後連係另一D 唔會輕易跌落地既野上. 如果你係頭戴(下一段), 最好就係打個結連住頭盔帶. 近年有D 名牌會出一D 彈弓繩專門用黎扣係個頭盔同夜視鏡. 個人覺得用傘繩可以有同樣功用, 條彈弓繩可有可無. 個人喜好.

基本黎講, 夜視鏡可以係安裝係槍上或頭戴. 而頭戴亦可再細分為單眼及雙眼. 近十五年開始有例如ANVIS-10類既廣角夜視鏡. 但係相信唔太多玩家會有途徑及金錢去玩, 我自己亦無相關使用經驗. 唔會提.

3.1.1頭戴夜視鏡
頭戴夜視鏡一般會安裝上頭盔. 需要鏡架片 (shroud), 與及鏡架 (mount). 夜視鏡有一定重量, 而不論玩家風格為何, 都要期望要戴住舊野係面前奔跑. 有重量就自然有機會會移位及跌出黎. 好多玩家玩既時候準備左錢去買個鏡, 然後就無錢買個正常既鏡架同頭盔. 幾十蚊貨仔D 膠盔係絕對唔足夠支撐一個夜視鏡, 亦都就算係用鑼絲安裝鏡架片, D 膠都有機會會爆開. 如果係為輕玩仿品盔, 最低限度留意個盔有足夠厚度可以俾鑼絲上實, 而且個鏡架片係穩陣.

有D 頭盔本身會有兩條橡筋繩連住個盔兩側. 個兩條唔係用黎幫你確保你個鏡唔會跌落地既繩, 而只係幫你將個夜視鏡同鏡架拉緊, 令到係用者做D 激烈動作時, 個夜視鏡唔會移位. 使用時都係搵條傘繩打個結係個鏡上面, 然後將條橡筋繩扣係個結上面就可以. 但係留意一點, 如果係用單筒既話, 用個兩條橡筋繩可能會導致兩邊拉力唔平衡.[後補圖]

有一D 廠家有出頭盔帶連鏡架片俾用家卡係頭盔. 有D 軍隊可能係實際運作需要唔係每個兵都會公發一個夜視鏡. 但係作為野戰玩家, 最好都係用鑼絲上實塊鏡架片, 如果唔係條頭盔帶有機會會成條鬆出黎. 亦都係個人經驗. [後補圖]

至於鏡架, 一般如果大家入門係玩美製夜視鏡的話, 會有分dovetail 同bayonet 兩種接口位, 另外航空兵用夜視鏡 (個鏡既型號會係ANVIS 字頭)亦都有自己唔同既鏡架. 留意兩個係唔同的. [相後補] 不過不論鏡架係前者定後者, 上鏡架片個部份都係同一大細, 而且仿品鏡架亦都可以上到真品鏡架, 反之真品鏡架亦可以上到仿品鏡架片. 個人試過用Wilcox L4G24 亦都可以上到仿品既NORONTOS 鏡架片, 亦試過用仿品Rhino 上真品Wilcox 鏡架片, 完全無痛直上. 不論什麼款式都好, 最緊要係1)到底個鏡係咪可以好穩陣咁上住係個鏡架, 而個鏡架亦係咪可以鎖實係塊片度. 安裝時不妨”chok”下個幾塊野; 2)個鏡架通常有得較角度. 會唔會鬆左少少? 如果太鬆最後個鏡就會自己”冼”落黎頂住你個護目鏡.

講開頂住護目鏡, 雖然每人喜好唔同, 但留意如果夜視鏡頂得太盡向眼個邊, 個護目鏡亦有可能會因為太近隻眼會令隻眼唔舒服, 同埋可能會有霧氣.

3.1.2槍裝夜視鏡
真鐵玩家對非武器專用單筒夜視鏡裝上槍有非常大保留, 原因係夜視鏡唔係特登設計黎頂真鐵後座力. 就氣槍而言, 呢個唔係問題. 只不過我有以下幾點評論:

1)裝上槍有個好處係方便爬地. 頭戴夜視鏡對爬地造成一定困難. 特別係如果個地形需要低姿爬行 (low crawl) 時候, 眼前有一個廁紙筒根本唔可能.
2)留意眼睛係需要時間適應. 所以如果裝上槍, 就要留意一用夜視鏡觀察時, 基本上係短暫破壞隻眼既視力, 要重新花十幾廿分鐘再適應過.
3)夜視鏡開住個出瞳口會有綠光反射(如果係美製的話). 因此裝槍必須係出瞳口個邊加裝個膠圈, 要隻眼對住出瞳口瞄準時先會透到光 [後補圖], 防止有光出黎暴露自己位置.
4)非武器專用單筒夜視鏡唔會有瞄準線. 即要係已有瞄具後面外加夜視鏡. 而機械瞄具因為夜視鏡對焦問題 (係後面會再講) 係基本上用唔到. 即係你支槍本身要有個可以同夜視鏡共用既光學瞄具, 個瞄具買返黎個陣會講清楚係咪”NV Compatible”. “NV Compatible”既瞄具可以發出一D 肉眼見唔到既光譜, 個光度唔會太大導致後面既目標物暗左.  如果唔用可以夜視共用瞄具, 夜視鏡會只見到個瞄具既光點而睇唔到目標. 另外一個問題就係由於個夜視鏡要放係個瞄具後面, 因此除非你本身習慣將瞄具放前D (1913 路軌你預無左十格位), 你要將瞄具移去前面, 同埋因此要將瞄具重新歸零.

3.1.3單筒定雙筒
最實際問題都係價錢. 如果同一質素既增像管, 當然係雙筒貴過單筒. 不過一d 高階既單筒鏡可能會比中階雙筒鏡都只係平少少.

假設如果你有選擇單筒雙筒既經濟空間, 留意有以下呢幾樣野:
1)單筒對某些人黎講, 會係一個好辛苦既體驗. 一般人會將夜視鏡放係非強眼. 但係有d 人個腦會見到兩個唔同既影像就頭暈同頭痛, 而如果放係強眼就反而只係見到強眼既野, 變左弱眼完全無用;
2)單筒會無左雙筒見到既立體感. 個感覺就係你會見到有舊野, 但係你唔係太肯定舊野有幾遠. 所以行山的話, 就算你見到有舊野都可能要小心, 個距離感差少少都成日仆;
3)雙筒我個人使用時覺得好似令到我無左周邊視野. 因為兩隻眼都被夜視鏡照住, 變左周圍既黑暗面我睇唔清楚. 反而用單筒因為重有隻強眼, 所以強眼會不自覺去搵d 我覺得我會想睇既野, 然後用非強眼隻夜視鏡再望真d;
4)打室內的話, 唔知點解雙筒總會有一種單筒無既”實在感”.可能係心理上. 個感覺就係用單筒總係驚可能有d 野我另一隻眼應該係見到d 野, 但係就係唔肯定. 雙筒就會心理上令我覺得安心d.

因此, 單筒, 雙筒, 係一個個人選擇. 但係另外留意一樣野, 雖然話正常使用支夜視鏡唔會咁易壞, 但係始終夜視鏡唔係好似氣槍咁容易係香港搵到件整, 可能比起氣槍要更加學識自己點樣換零件. 網上有視頻可以幫到你. 而且如果係雙筒既話即係你整緊既時候兩支都用唔到.

3.2配件
一般黎講玩家會使用紅外線鐳射及紅外線電筒做瞄準及補光. 要留意既係, 如果大家打算玩仿品既紅外線鐳射, 有可能係對眼唔安全的 (“non-eye safe”). 所謂eye safe, 係要睇支鐳射既功率. 一般5mW 以下可以叫做”eye safe”, 但係並不是指可以用個支鐳射射住人地隻眼人地無事, 而係係人地隻眼自然反應合埋之前, 佢支鐳射既強度不足以對眼睛組織造成損害. 有D 仿品, 特別係高仿個D, 會抄埋真品個”eye safe”標籤, 但係因為成本問題, 不等如佢就真係用eye safe 既鐳射二極管. 呢樣要留意留意.

另外一樣要考慮既係, 個夜視鏡需要有紅外線濾光鏡保護. 因為高功率鐳射射中個夜視鏡有機會會令增像管受損. 留意雖然當代夜視鏡已經會自動調光 (所謂的”autogating”), 但係都係要少少時間先可以減個光度至唔損壞增像管既程度. 因此用強光照支鏡都係會減壽的.

重有一樣可能要考慮既係個夜視鏡有一定重量, 長期使用有機會會導致肩頸痛. 需要係頭盔後面加幾塊鉛塊平衡. 有d 人會用個例如ms2000 類紅外線信號燈加cr123a 電袋黎去平衡. 另外航空兵用夜視鏡, 或者一D 高階少少既雙筒鏡, 依家都可以外加電盒連住電線係後面, 好處係支鏡本身輕左, 而且可以做埋平衡.

3.3買鏡既其他問題
玩家買鏡時會擔心到底支鏡會唔會無啦啦死. 鏡唔同車, 唔會話用左幾耐會睇到. 一般”第三代”增像管, 現時既出廠壽命會去到一萬小時. 即係支增像管可以開大約一萬個鐘先有需要更換. 一萬個鐘即係差唔多一年三個月一路開住, 又或者如果每日用8 個鐘, 開住3 年半.之但係, 支鏡實際壽命會比理論壽命少D. 大家應該重記得之前提過既自動調光 (autogating). 呢個功能係用黎保護增像管. 但係調光係需要幾微秒時間先做到. 因此突如其來既強光都係會傷害條增像管. 而呢D 事會經常發生: 例如你自己使用既紅外線信號燈, 係咁閃對個鏡都係非常傷. 然後突然間有人開電筒, 突然入一間開左燈既房之類, 全部都會幫支增像管減壽.

實際而言, 野戰玩家好難會用到一萬個鐘. 但係買既時候, 亦都無辦法得知支管用左幾耐. 最簡單既做法係首先要知道支增像管係幾時出, 可以睇商業及政府機構號碼 (CAGE code) 及合約號碼. 第一個號碼係聯邦政府用黎將政府資源分類既編碼, 第二個係個部件係根據邊一張合約而製既號碼. cage code好多時會係MX-[號碼]: 有D 牌子增像管可以就咁睇個光圈已經見到. 有d 要拆開黎睇. 見到個cage code 同埋合約號碼, 就可以大約估到到底支管用左幾耐. 例如一條MX-11769/UV 管, 可以睇下呢個網站上個表, 更新至OMNI-VIII:
http://www.ar15.com/forums/t_6_18/317705_.html 

然後再將個合約號碼放上google 神, 就會大約知道條管係乜時候出.

後加: 當然, 目前已經有再新既用無片白磷增像管. 但係都係呢兩三年既產物, 暫時亦唔太多見到香港有得賣, 而且價錢亦都唔係入門價 -- 應該話新玩都應該唔會咁快有門路搵到白磷管. 在呢篇作為俾初玩夜視同俾夜視初玩(屈?)既人睇既文中不論.


(第一部完)

[ 本帖最後由 derp 於 3-5-2019 01:12 編輯 ]
作者: derp    時間: 2-5-2019 03:32

4.夜視鏡戰術
就算無打算買夜視鏡既你, 可能都要睇埋呢部份, 咁樣之後睇落去下一部份關於反制時會容易D. 首先要明白既一點係, 不論美帝既廣告同市場推廣做得幾好, 有左夜視鏡並不等如將黑夜變成白天. 用左夜視鏡並唔等如用家可以當自己係日頭行事一樣. 最明顯有幾個不同:

1)除非係講緊比較新潮, 但未普及既數碼夜視鏡, 否則所有夜視鏡都係單一隻色, 以光暗黎去分物件輪廓;
2)夜視鏡有個”鏡”字, 係一個鏡頭, 佢需要對焦. 當然有副廠出配件去減低對焦既需要, 但係要犠牲吸光程度黎去做呢樣野, 亦因此唔太多人用;
3)夜視鏡有視角限制: 一般人既周邊視野有大約110度. 而除左就算係軍隊中都係極少見既廣角夜視鏡及歐洲鏡之外, 一般夜視鏡只有40 度視角. 40度視角既概念, 可以試下用個M2 類紅點鏡, 將佢貼住自己隻眼, 就會知道個夜視鏡出瞳口有幾闊.
4)夜視鏡都有一定長度. 要好似白天無夜視鏡時候咁瞄準基本上係做唔到 [後補圖];
5)夜視鏡有一定大少, 加上有限視角, 唔係太容易行D 複雜地形, 例如係有好多係人頭高度既樹枝既地形, 或灌木林.
6)亦因為以上5), 用家就好似係面前多左個半磅啞鈴, 行動絕對無無戴夜視鏡咁敏捷, 亦都要就住就住, 唔好一轉身成個鏡撞埋度門度, 撞樹枝之類.

以上幾點有幾個啟示:
1)單色鏡頭令敵我分辨更難. 係鏡中只會見到有個輪廓, 特別係因為打野戰好多時自己人同對手可能D 衣服裝備都有少少相似, 而且因為打夜戰, 除非你有好似美帝個種科技輾壓既技能, 如果唔係對手都有夜視鏡時, 就唔可以靠紅外線信號燈分辨敵我, 只可以靠肉眼. 因此打夜戰對自己人位置要更清楚. 另外, 無光情況下, 夜視鏡都係依然唔能夠放大光, 因此如果對手係識得尋找掩蔽, 並利用偽裝既基本功, 夜視鏡係唔會令用家搵到對手, 反而會令用家自以為科技佔優,以為地方睇唔到野就安全, 可以參考以下一段用夜視鏡拍既片:

https://www.youtube.com/watch?v=clo4vUPVtCE (由片段1:00 開始睇)

當然呢個只係套戲. 而根據本書所講, 個次伏擊只係由民兵做, 而伊拉克既正規軍貪生怕死無參加該次伏擊, 如果唔係個結果應該唔會係美國傷1咁少. 特別要提既係片段1:00 - 1:17 呢段. 只係睇片段都可以見到如果對手係呢係草叢, 就算開左夜視鏡都係唔會見到佢.
2)另外, 因為夜視鏡需要對焦, 交火時唔會咁得閒慢慢較對焦. 因此需要有經常要失焦地對自己D 裝備既覺悟. 即是要準備失焦地幫自己支槍重新上彈, 拎手槍. 所有日頭關於自己身上有既裝備可以好易做到既野全部都要有準備係睇唔到既情況下做到.
3)假定對手都有夜視鏡, 而大家都會係用紅外線鐳射瞄準, 支鐳射需要用時先開, 唔用要即刻熄, 因此個鐳射最好有按壓開關, 而唔係單靠個鐳射上面既實體開關;
4)比起日頭可以用眼球移動, 可能係使用夜視鏡時更需要將成個頭移動去保持周邊警覺. 如果唔係個40 度既光圈好易會造成錯誤既安全感.
5)因為個夜視鏡既大小, 所以造成用家在地形行進時傾向於捨難取易. 而另外由於玩得夜視鏡既玩家多數都唔會只玩夜視鏡, 而有返一定既裝備, 呢樣野變得更明顯.

4.1 個人素質
由上觀之, 夜視鏡同其他裝備一樣, 都需要經過訓練先會變成有用既工具. 單人方面, 建議集中訓練
1)唔用夜視鏡行不同地形, 聽下周遭環境. 夜視鏡係外加品, 個人質素先係最緊要. 最好係唔戴夜視鏡去打野戰試下點樣唔依賴視覺上優勢黎打到人先;
2)用夜視鏡行不同地形. 行山係一個唔錯既練習. 同無夜視既初行山者一樣, 預左要仆無數次. 行平路當然好舒服, 真正考到人既係點樣行不平既地. 同時可以用黎測試你個鏡係咪已經穩固咁上係個頭盔度 -- 題外話, 香港行山人士都係好好奇的...;
3)失焦情況下使用自身裝備, 換彈夾, 換手槍之類;
4)雖然用鐳射瞄準同日頭正常瞄準理想情況下唯一只係差有無將個頭按下, 但係實際上個感覺都係需要習慣下. 而且如果係換邊射擊同埋係掩護側面射擊, 個距離感係需時適應. 如果真係無夜間訓練既地方, 退一步都勉強可以用日光蓋 (butler creek cap) 阻擋日光, 然後戴上夜視鏡練習, 不過小心個日光蓋會跌, 要搵少少膠紙貼住佢.

4.2 團隊素質
由於夜視鏡係將光放大, 而如果全隊人有夜視鏡係靠人地無, 而自身可以係黑暗中乜都睇到黎得到優勢, 因此自身必須要有使用紅外線及可見光既紀律. 而另外就係由於個個都係用紅外線鐳射 (同打機唔同, 紅外線鐳射唔係一定一條線咁出去, 要視乎鐳射既強度, 背景光度, 同埋天氣), 個個都係一點, 有機會變成自己支槍指緊乜都唔係太肯定. 另外個人經驗試過室內有隊友無夜視鏡, 然後係咁用電筒, 真係多得佢唔少. 話晒俾人聽我地會係呢條路行黎, 亦消滅左夜視鏡既優勢, 一舉兩得. 因此整隊, 特別係打室內時, 我個人認為有需要訂立使用白光既口令. 同埋都要有紀律地用紅外線鐳射.

另外, 係唔用紅外線信號燈時, 隊友關於自己人位置既溝通亦比白天黎得重要 -- 亦講真, 美軍亦都有試過因為太過依賴及信賴信號燈而誤炸自己人 (https://www.cbsnews.com/news/why ... ber-in-afghanistan/).


(明天續)

[ 本帖最後由 derp 於 3-5-2019 00:54 編輯 ]
作者: NathanCPT    時間: 2-5-2019 04:44

引用:
原帖由 derp 於 2-5-2019 03:32 發表
1.導言
雖然近十年香港越黎越多人野戰玩夜視鏡, 不過使用上, 我見到香港 -- 甚至英文關於野戰既網站 -- 對夜視鏡既使用都唔太多人著墨. CGF 亦都只係十幾年前6MM 師兄係講唔用夜間野戰技巧時輕輕帶過無夜視鏡情況下 ...
路過搭訕，3.2所謂的eye safe係指Class I laser(一般而言民版，例如mwal-c1+)
而軍版ir雷射瞄準/補光係用nohd計算
作者: gainax    時間: 2-5-2019 10:16

其實玩夜視鏡既玩家喜愛用於打夜game定草裝備?
本地夜game唔多覺有post出來,一般人可能入門困難如何入手
作者: hendry9881    時間: 2-5-2019 11:20

我都想買隻黎玩下
作者: laiwangkai    時間: 2-5-2019 11:58

而架新既仲會用omni幾黎定既咩
我身邊(包括自己) 個個都用緊 LLL filmless wp管
仲有埋Data sheet

不過而架好難買LIF係擋IR光
絕大部分LIF都係擋綠光, 唔係IR

[ 本帖最後由 laiwangkai 於 2-5-2019 12:04 編輯 ]
作者: laiwangkai    時間: 2-5-2019 11:59     標題: 回覆 4# 的帖子

其實幾乎每星期都有夜驚
不過好少接受新既黎玩
作者: JOHN2    時間: 2-5-2019 13:09



[ 本帖最後由 JOHN2 於 16-12-2021 04:18 編輯 ]
作者: laiwangkai    時間: 2-5-2019 13:17     標題: 回覆 8# 的帖子

我訂左2支dep目鏡for 15
成皮野一對
作者: JOHN2    時間: 2-5-2019 13:26     標題: 回覆 9# 的帖子

15/18堅係要換，原裝邊緣球面畸變的確比較多,如果唔换就對唔住對filmless新管
作者: NathanCPT    時間: 2-5-2019 14:16

引用:
原帖由 laiwangkai 於 2-5-2019 11:58 發表
而架新既仲會用omni幾黎定既咩
我身邊(包括自己) 個個都用緊 LLL filmless wp管
仲有埋Data sheet

不過而架好難買LIF係擋IR光
絕大部分LIF都係擋綠光, 唔係IR
LIF大致分兩種，一般而言常見藍藍地色反光而係針對波段830-850nm，反而紅色LIF先係針對530-535nm用，但相對之下紅色較少見人用/買
作者: Arisaka    時間: 2-5-2019 18:05

提示: 作者被禁止或刪除 內容自動屏蔽
作者: gainax    時間: 2-5-2019 22:57

引用:
原帖由 Arisaka 於 2-5-2019 18:05 發表

夜game通常都唔會公開， 唔識人冇得玩
本身就打過幾次，通常都只係為左想玩tracer先去玩
見親都起碼半團人玩夜視
玩夜game應該就係為玩夜視 咁比錢場有冇辦夜game?
打街場3唔識7仲要入夜有d危險
作者: gainax    時間: 2-5-2019 23:02

引用:
原帖由 laiwangkai 於 2-5-2019 11:59 發表
其實幾乎每星期都有夜驚
不過好少接受新既黎玩
其實想問好耐,係乜魔力令到班玩家肯掉咁多銀落去玩夜視
作者: 48191    時間: 2-5-2019 23:05

當你打過兩三次MilSim，而又想「泥足深陷」地打「兩日三夜」之類嘅Game，你可能會想買...
引用:
原帖由 gainax 於 2-5-2019 23:02 發表

其實想問好耐,係乜魔力令到班玩家肯掉咁多銀落去玩夜視
作者: gainax    時間: 2-5-2019 23:19

引用:
原帖由 48191 於 2-5-2019 23:05 發表
當你打過兩三次MilSim，而又想「泥足深陷」地打「兩日三夜」之類嘅Game，你可能會想買...
即是要有班放毒朋友
作者: 48191    時間: 2-5-2019 23:29

我身邊大把「道友」，夜視、熱能乜乜乜。感覺上同以前打AEG嘅「軍備競賽」冇乜分別。其實已經係變相鬥財力。
引用:
原帖由 gainax 於 2-5-2019 23:19 發表

即是要有班放毒朋友
作者: JOHN2    時間: 2-5-2019 23:49     標題: 回覆 14# 的帖子

夜媽媽穿山過林揾目標尤如日頭就係nv最大魅力所在
作者: Arisaka    時間: 2-5-2019 23:56

提示: 作者被禁止或刪除 內容自動屏蔽
作者: 48191    時間: 2-5-2019 23:58

Show身家
引用:
原帖由 Arisaka 於 2-5-2019 23:56 發表

玩開都係收費場 街場聽過未試過
W27+1 都玩過，以前最多係戰谷
最危險係打完夜game,冇車出返去
自己挨眼訓揸車出返市區
去玩夜game，裝備交流係佔左3分2
作者: derp    時間: 3-5-2019 00:58

第一部份更新左少少, 第二部份關於夜視鏡對用家既要求, 及因此有乜野戰術上既考慮大致完成.
作者: ssae86ss    時間: 9-5-2019 12:10

謝謝，師兄的詳細講解，獲益良好。
想請教如果在使用夜視鏡時，應該是背對月亮還是面對月亮會比較好呢？
作者: storm2729    時間: 9-5-2019 17:26

想請教下師兄，我知道如果係美國買夜視鏡係出唔到口，但夜視鏡mount(上頭盔個類)又出唔出到鏡？Thanks
PS：唔係指郵寄，係親身去個邊再帶返嚟
作者: hendry9881    時間: 9-5-2019 17:42

引用:
原帖由 storm2729 於 9-5-2019 17:26 發表
想請教下師兄，我知道如果係美國買夜視鏡係出唔到口，但夜視鏡mount(上頭盔個類)又出唔出到鏡？Thanks
PS：唔係指郵寄，係親身去個邊再帶返嚟
一樣係itar掛
作者: jn_jona    時間: 9-5-2019 21:30

引用:
原帖由 storm2729 於 9-5-2019 17:26 發表
想請教下師兄，我知道如果係美國買夜視鏡係出唔到口，但夜視鏡mount(上頭盔個類)又出唔出到鏡？Thanks
PS：唔係指郵寄，係親身去個邊再帶返嚟
人去帶仲死 拉埋個人
之前有單判左一百年
作者: RCOOH    時間: 9-5-2019 23:47

引用:
原帖由 hendry9881 於 9-5-2019 17:42 發表

一樣係itar掛
唔好話NVG及相關配件，美國ITAR既小器程度係連說明書都冇情講。

[ 本帖最後由 RCOOH 於 9-5-2019 23:51 編輯 ]
作者: ?老虎仔?    時間: 10-5-2019 01:14

點試先知支nvg 有無autogate?&#129300;
作者: neomarx    時間: 10-5-2019 01:36     標題: 回覆 23# 的帖子

你想死嗎。。。。美國佬呢啲野好敏感
一個人傻下傻下買死X硬
香港有貨出既人總都有佢既“渠道”。
有人識軍佬 有人識airline
呢啲錢， 比人搵啦
作者: storm2729    時間: 10-5-2019 10:36     標題: 回覆 28# 的帖子

唔係唔想比人賺，之不過想要個D 無人放 ？
作者: jn_jona    時間: 10-5-2019 10:50

引用:
原帖由 storm2729 於 10-5-2019 10:36 發表
唔係唔想比人賺，之不過想要個D 無人放 ？
好奇一問你想要咩
香港都算好齊野 有d無諗過有人入既野都見過有人放
作者: derp    時間: 10-5-2019 11:46

引用:
原帖由 ssae86ss 於 9-5-2019 12:10 發表
謝謝，師兄的詳細講解，獲益良好。
想請教如果在使用夜視鏡時，應該是背對月亮還是面對月亮會比較好呢？
sorry 呢期工作比較忙, 同埋都想下個周末影左D 相補圖先UPDATE 篇文. 影出黎個D 絕對唔係什麼驚天 SHOW 身家一支幾皮既鏡頭既效果, 只係希望用已有既野分享下可以令大家討論一下一個唔多人討論但係越來越多人玩既玩意用既技巧.

月光唔同太陽, 太陽都可以就一就個鐘數去選擇, 而月光就要睇下咁岩個日個月光係係高定低.

如果有月光而咁岩個日個月光又係低到你要考慮呢樣野既話, 唔好低估肉眼可以見到既野 -- 攝影機鏡頭係呃人的. 我會寧可係面向月光. 原因係如果自己係背光, 個身影 (5 SLUTS AND A MOLE 中既"SILHOUETTE")就算人地無鏡都好易俾人見到. 相反, 如果你係用緊夜視鏡, 而對家係背光, 月光個光度唔會導致你支鏡調暗至你睇唔到佢既程度 (如果唔係不如唔好用鏡), 而且你面向光時無咁容易俾背光個人見到你. 戰機日頭背光攻擊既原因係為左令人地對空炮火無咁易對準佢, 但係夜間有月光狀態下, 月光又唔係去到太陽個隻光度令到對手完全唔可以望向你, 所以我個結論會係要做相反既野.

[ 本帖最後由 derp 於 10-5-2019 11:53 編輯 ]
作者: derp    時間: 10-5-2019 11:52

引用:
原帖由 ?老虎仔? 於 10-5-2019 01:14 發表
點試先知支nvg 有無autogate?&#129300;
我用過第一代無自動調光既鏡. 如果無自動調光, 個鏡就係一見光就都會繼續放大D 光, 放到條增光管頂唔順, 開始閃下閃下, 咁條管就會開始燒 -- 都係個人經驗, 唔好試.

有自動調光既鏡, 見到光, 會自己將光度較暗. 個效果有D 似依家D 手機, 如果你影D 暗野, 佢會將光圈 (?) / 光度放大, 但係如果你突然開燈, 你會見到個畫面所有野暗晒, 得返把燈係個畫面顯示出黎. 有自動調光既夜視鏡都係一樣, 不過只係比起手機個種調光快.
作者: storm2729    時間: 10-5-2019 12:17     標題: 回覆 30# 的帖子

想揾WILCOX BINOCULAR BRIDGE SYSTEM: MUM-14
仲想揾Wilcox L4G24
L4G24 呢個唔太難揾，不過唔知點解次次都淨係揾到沙色
作者: NathanCPT    時間: 10-5-2019 12:28

引用:
原帖由 RCOOH 於 9-5-2019 23:47 發表


唔好話NVG及相關配件，美國ITAR既小器程度係連說明書都冇情講。
係連條綁cover棉繩(鞋帶)都係添
作者: NathanCPT    時間: 10-5-2019 12:30

引用:
原帖由 ?老虎仔? 於 10-5-2019 01:14 發表
點試先知支nvg 有無autogate?&#129300;
說明書有寫，唔好直接拎支野試
作者: NathanCPT    時間: 10-5-2019 12:34

引用:
原帖由 jn_jona 於 10-5-2019 10:50 發表

好奇一問你想要咩
香港都算好齊野 有d無諗過有人入既野都見過有人放
古代戰士系統
作者: jn_jona    時間: 10-5-2019 14:46

引用:
原帖由 NathanCPT 於 10-5-2019 12:34 發表

古代戰士系統
4眼仔都見過人放 香港地乜都有
作者: RCOOH    時間: 10-5-2019 14:53

引用:
原帖由 NathanCPT 於 10-5-2019 12:34 發表

古代戰士系統
磚。

當眾用完個古代戰士系統就要坐三年。
作者: NathanCPT    時間: 10-5-2019 15:41

引用:
原帖由 RCOOH 於 10-5-2019 14:53 發表


磚。

當眾用完個古代戰士系統就要坐三年。
咁嚴重?
長智識了
作者: RCOOH    時間: 10-5-2019 15:45

引用:
原帖由 NathanCPT 於 10-5-2019 15:41 發表

咁嚴重?
長智識了
你應該知我講緊咩架wor。
作者: NathanCPT    時間: 10-5-2019 16:23

引用:
原帖由 RCOOH 於 10-5-2019 15:45 發表


你應該知我講緊咩架wor。
唔明
作者: Whywhy    時間: 11-5-2019 17:37

用左夜視係咪一定要用雷射&#143924;準？
同埋用cap帽用唔用到夜視
大約幾錢左右
Thx
作者: NathanCPT    時間: 12-5-2019 22:05

引用:
原帖由 Whywhy 於 11-5-2019 17:37 發表
用左夜視係咪一定要用雷射&#143924;準？
同埋用cap帽用唔用到夜視
大約幾錢左右
Thx
瞄準可以用aimpoint, eotech
無頭盔可以用頭架
作者: NathanCPT    時間: 12-5-2019 22:06

引用:
原帖由 RCOOH 於 10-5-2019 14:53 發表


磚。

當眾用完個古代戰士系統就要坐三年。
但我見過有師兄用完都無事

[ 本帖最後由 NathanCPT 於 12-5-2019 22:08 編輯 ]
作者: Whywhy    時間: 13-5-2019 15:05

引用:
原帖由 NathanCPT 於 12-5-2019 22:05 發表

瞄準可以用aimpoint, eotech
無頭盔可以用頭架
咁帶左頭架 帶唔帶到帽？
同幾錢左右



歡迎光臨 CGF (http://wargamehk.com/cgf/) Powered by Discuz! 6.0.0