CGF - Powered by Discuz! Board

標題: 睇完波喊到失聲，香港好野!! [打印本頁]

作者: levistone 時間: 14-12-2009 11:03 標題: 睇完波喊到失聲，香港好野!!

我握緊拳頭發狂似的狂喊著「頂住，頂住」，渴望每一個敵方攻勢都可化險為夷。沒有試過這樣著緊一件事情，沒有試過可以這樣投入去看一場球賽。全場表現最好的歐陽耀沖射失12碼的一刻，我彷彿感受到他的難過他的痛。門將葉鴻輝撲出對方射門時，我整個人跳了起來，最後黃展鴻將皮球送入網窩取得勝利，我跟旁邊原本不認識的球迷.高興得在互相祝賀，差點掉出淚來。這場球賽的氣氛、那份感染力，我相信，即使年青時代的MJ可以超越時空到香港開演唱會，也辦不到。

題外話，曾特首同曾得成坐我附近，仲以為佢地會坐對面頒獎台主家席添。

作者: 阿芝 時間: 14-12-2009 11:08

YEAHHHH
YEAHHHH~~~~~~
我睇電視都睇得好激動!!!

作者: Ｌ 時間: 14-12-2009 11:09

提示: 作者被禁止或刪除內容自動屏蔽

作者: levistone 時間: 14-12-2009 11:22

尋日出唔到聲咁濟，今日先好返D。

氣氛真係冇得頂，陳七好似英雄咁一入場就追平，10號既歐陽耀沖，好好波，做到波，hold 到波，單對單過人有信心，組織到攻勢，呢隊港隊唔到係一味高波吊埋去，博大霧，而係可以打小組進攻既球隊。

引用:

原帖由Ｌ於 14/12/2009 11:09 發表

我都係睇電視...好感受到果種氣氛..何況師兄你現場睇..

作者: bonzonie 時間: 14-12-2009 12:39

lee 班U23 (under 23) 表現完全好過大國腳... 敢去..有膽色...
中場果兩個球員又做到野...
估都估唔到HK識打小組進攻,走位靈活,好似從來未睇過攻得咁快HK
右邊有徐德帥係咁爆
至於防守方面，前者一對中堅大細豪，與及門將阿輝表現相當出色，而中前場球員亦多走一步搶&參與防守工作
你睇下班HK大國腳...完全無創造力可言.
一味斬斬斬斬,大腳踢上前場送波比人，有乜唔可能輸o架,曾經有一段好長時間對住乜隊場場打5-3-2 打到好似全守咁 ,

一失波就謝哂..............

今場班HK小國腳真係踢得好好,技術唔夠就用努力彌保不足

記得報紙話過金SIR不滿班大國腳俾日本炒鑊甘之後仲笑騎騎,叫班細嘅唔好學佢地

[ 本帖最後由 bonzonie 於 14-12-2009 13:00 編輯 ]

作者: Boniface 時間: 14-12-2009 12:46 標題: 回覆 5# 的帖子

呢班細既表演絕對比班大既好百倍
有腳法，有組織，見過佢地連虎尾腳，後踿都出埋

作者: bonzonie 時間: 14-12-2009 12:53

引用:

原帖由 Boniface 於 14-12-2009 12:46 發表
呢班細既表演絕對比班大既好百倍
有腳法，有組織，見過佢地連虎尾腳，後踿都出埋

無錯
香港U23青年隊，同舊一代的比較，兩者分別其實都幾大,
U23挨到百二分鐘,都算係咁
以往香港大國腳中場打兩翼型442/451,兩翼未跑到位，就已經想吊比前鋒
過往個踢法莫講話有射門，連過到半場都好難，陷於被圍攻之狀態。
U23中場既協防真係抵讚…中中既梁振邦同歐沖都唔算係正統防中，但兩個真係走上走落…

[ 本帖最後由 bonzonie 於 14-12-2009 12:55 編輯 ]

作者: denniscty 時間: 14-12-2009 13:04

特衰政府搞東亞運嗰陣
可能浄係諗住香港人睇下國家隊啲明星
加強「國民教育」
點知今次可能真係捉蟲
個焦點變左呢一場足球球賽
而呢場比賽正正係本土意識最高漲既一刻

作者: levistone 時間: 14-12-2009 13:09

歐沖真係表現好好，一兩個人基本都過到，又肯返後幫波，如果再練好D罰球就冇得頂喇.

同埋以前睇波，球員間交錯波走錯位，會互X的，但呢隊真係上下一心，失波冇X加上每人走多一步，先可以打出咁既水準。

我現場睇, 港隊個18號(有冇人知咩野名?) 有好多時走位都冇人交波，但見佢都冇乜埋怨，繼續走上走落，冇掛住X唔追波，呢隊港隊比大港隊更成熟，希望黎緊幾年可以keep住，再踢多D好波

引用:

原帖由 bonzonie 於 14/12/2009 12:53 發表

無錯
香港U23青年隊，同舊一代的比較，兩者分別其實都幾大,
U23挨到百二分鐘,都算係咁
以往香港大國腳中場打兩翼型442/451,兩翼未跑到位，就已經想吊比前鋒
過往個踢法莫講話有射門，連過到半場都好難，陷 ...

[ 本帖最後由餅於 14-12-2009 17:40 編輯 ]

作者: Boniface 時間: 14-12-2009 13:09 標題: 回覆 8# 的帖子

老實講句，國家隊與我何干

作者: derek 時間: 14-12-2009 14:32

睇得出個個都好努力
不過其實跑得最多的可能係徐德帥
佢真係好FIT, 過波都好用信心

另外巢鵬飛都交到功課, 護下波, 回下後, 好緊要

作者: 七點六二 時間: 14-12-2009 15:25

本人係電視機直播睇到幾乎落淚...

作者: Gabriel2342 時間: 14-12-2009 15:31

果日既日本隊唔係主力姐唔係抄都有份...btw 香港好野

作者: levistone 時間: 14-12-2009 15:54

當然喇，現在香港既實力跟真日本隊仍有一段好大既距離。

不過作為一個奇蹟又好，新時代既開始又好，踏出左呢一步都係好有意義架，起碼還有一個夢可以追逐，還有一個理想可以實踐吧！樂觀少少向好既方向諗

引用:

原帖由 surefire0828 於 14/12/2009 15:31 發表
果日既日本隊唔係主力姐唔係抄都有份...btw 香港好野

作者: kimkileo 時間: 14-12-2009 16:14

引用:

原帖由 Boniface 於 14-12-2009 13:09 發表
老實講句，國家隊與我何干

唔好意思.....我想改另外四個字.......

......

關我屁事......

作者: kimkileo 時間: 14-12-2009 16:15

引用:

原帖由 Boniface 於 14-12-2009 12:46 發表
呢班細既表演絕對比班大既好百倍
有腳法，有組織，見過佢地連虎尾腳，後踿都出埋

大國腳踢既波真係睇到掉掉聲......細既爭氣波呀....

作者: bonzonie 時間: 14-12-2009 16:24

引用:

原帖由 surefire0828 於 14-12-2009 15:31 發表
果日既日本隊唔係主力姐唔係抄都有份...btw 香港好野

由波衫見到
日本出U20隊(under 20) vs 香港 U23隊 (under 23)
其實差別不算太大
香港都係出班細既

不過細既好爭氣

[ 本帖最後由 bonzonie 於 14-12-2009 16:25 編輯 ]

作者: bonzonie 時間: 14-12-2009 16:27

當初政府以為個個東亞淨係focus on D國寶

反而成個東亞最令人記得係主題曲同港足

cross 埋一齊超夾
http://www.youtube.com/watch?v=RfI7E4AQHEI

[ 本帖最後由 bonzonie 於 14-12-2009 16:29 編輯 ]

作者: levistone 時間: 14-12-2009 17:20

但過多幾年, 呢班日本仔, 實力就會大幅超越我地, 我地冇職業聯賽, 球員又搵唔到食, 好多都會放棄, 心態上都冇左個拚勁.

引用:

原帖由 bonzonie 於 14/12/2009 16:24 發表

由波衫見到
日本出U20隊(under 20) vs 香港 U23隊 (under 23)
其實差別不算太大
香港都係出班細既

不過細既好爭氣

作者: zeta 時間: 14-12-2009 17:22

引用:

原帖由 Boniface 於 14-12-2009 13:09 發表
老實講句，國家隊與我何干

據說係奧運隊出戰的 = =
又據說大陸足球排名世界尾三.....

作者: bonzonie 時間: 14-12-2009 17:32

引用:

原帖由 levistone 於 14-12-2009 17:20 發表
但過多幾年, 呢班日本仔, 實力就會大幅超越我地, 我地冇職業聯賽, 球員又搵唔到食, 好多都會放棄, 心態上都冇左個拚勁.

過多幾年返黎報仇

作者: geoprotex 時間: 14-12-2009 17:45

雖然日本隊今次未係最強陣容，但當中都有J-League球員上陣，
係公平競技原則底下，香港U23隊都算係實至名歸，贏得光彩！

作者: levistone 時間: 14-12-2009 17:54

對呀 !!!

50%係好彩 + 50%拚勁同勤力先至會嬴到架.

引用:

原帖由 geoprotex 於 14/12/2009 17:45 發表
雖然日本隊今次未係最強陣容，但當中都有J-League球員上陣，
係公平競技原則底下，香港U23隊都算係實至名歸，贏得光彩！

作者: 蕉皮 時間: 14-12-2009 18:01

引用:

原帖由 surefire0828 於 14-12-2009 15:31 發表
果日既日本隊唔係主力姐唔係抄都有份...btw 香港好野

上次好睇呀!何國全失6球,張春暉失4球

作者: 蕉皮 時間: 14-12-2009 18:02

引用:

原帖由 bonzonie 於 14-12-2009 16:24 發表

由波衫見到
日本出U20隊(under 20) vs 香港 U23隊 (under 23)
其實差別不算太大
香港都係出班細既

不過細既好爭氣

u20同u23差好遠喎

作者: Boniface 時間: 14-12-2009 19:54

希望香港政府可以俾多d支持
唔係止係錢，係場地同資源

作者: derek_lok 時間: 14-12-2009 20:02

引用:

原帖由 denniscty 於 14-12-2009 13:04 發表
特衰政府搞東亞運嗰陣
可能浄係諗住香港人睇下國家隊啲明星
加強「國民教育」
點知今次可能真係捉蟲
個焦點變左呢一場足球球賽
而呢場比賽正正係本土意識最高漲既一刻

血統純正既香港人仲係度架.......

作者: Boniface 時間: 15-12-2009 03:07

今日篇社論講得好好

勿讓勝利冲昏頭腦申辦亞運還須三思
(明報)2009年12月14日星期一 05:10

【明報專訊】開幕之前氣氛冷清的東亞運，全靠香港運動員奮戰不懈，金牌破紀錄，香港足球隊更神奇奪金，最終為港人帶來歡欣快樂的一周，隨著閉幕禮結束，香港應否進而申辦亞運，將被提上議事日程。港隊在東亞運取得佳績，市民對香港運動員水平的認同肯定提高，但是當局不能被勝利冲昏頭腦，急於求成，必須冷靜分析，總結這次東亞運的成敗得失，細心衡量申辦亞運的利弊，從長計議，再定行止。

1999年，香港曾經申辦2006年亞運，敗給卡塔爾的多哈；當時有不少港人抱著懷疑的態度，指香港體育設施不足，運動員水平不高，申辦亞運只是好大喜功。

10年後的今天，香港運動員在多次的亞運都取得不錯的成績，加上今次東亞運奪得佳績，相信現時提出申辦亞運，支持的市民亦會增加。事實上，根據本報做的民意調查顯示，自從香港贏得足球金牌後，受訪者支持香港申辦亞運的比率立即飈升。有了市民的背書，政府就可動用較多財政資源，為香港興建合規格的運動場館及選手村，場地不足恐淪為笑柄的問題，相信不難解決。

即使場地設施等硬件可望獲得足夠支援，但是否代表現在時機已經成熟？現時港人正在歡欣亢奮，沉醉於勝利的一刻，但申辦亞運是長遠而且重大的決定，必須細心考慮，不能冒進。

亞運財政承擔巨大

場館選手村易變白象

斥資興建豪華場館，比賽時當然大派用場，但比賽過後又如何處理？會否變成大白象？選手村的上千單位會用作什麼用途？是改建為公屋、居屋還是豪宅出售？每當涉及地產項目都是敏感的議題，這些問題都需要周詳的規劃。

此外，亞運與東亞運的規模是無法比擬的──亞運的參與國家或地區是東亞運的多倍，所涉及的比賽項目增幅更厲害，需要的財政承擔將會以幾何級數上升；然而，亞運與奧運不一樣，極難收支平衡，若申辦亞運為香港帶來大筆財政負擔，公眾也許會質疑公帑是否用得其所，徒添社會爭拗。

港人支持香港運動員，但不代表港人支持香港的體育運動「搞手」。東亞運開幕前及開幕初期，負面消息接連出現，更曾鬧出聖火傳送幾乎走進電視城的笑話，令不少港人擔心香港將要出醜，搞出國際笑話。比賽開始後，由於香港運動員成績彪炳，賽會的運作問題都暫時拋諸腦後，這次為香港人帶來「傳奇一刻」的，主要是努力不懈的運動員，而非主辦單位。市民對主辦單位及負責體育的官民組織的辦事能力，仍然存有很大的疑問；香港應否乘勝出擊，申請主辦亞運，必須三思而後行。

香港的收費電視台，願意出天價競投英超聯轉播；港人追捧體育明星的程度，也相當瘋狂。但這些都只是反映港人熱愛觀賞體育，香港的運動風氣並不算熱烈，政府、企業以至家庭對體育的支持都相當有限，例如，雖然有部分家長鼓勵子女運動，但不少是抱著運動有助升讀名校的心態，一旦子女選擇當運動員，家長往往反對，一個主要原因是香港對運動員的生計保障不足，訓練時收入微薄，退役後前路茫茫，運動員更可能因為參與比賽而飯碗不保，香港女子曲棍球隊隊員黃天慧，就因為要求準時下班及經常為了比賽而請假，最近終於被公司「炒魷魚」。

主辦亞運，有如服食興奮劑，又或在維港上空放煙花，在運動會舉辦的一刻，全城哄動，興奮莫名，但燦爛過後煙消雲散，香港的體育運動制度有否根本上的改進？剎那光輝過後，根基是否較以前穩固？這些都是必須認真檢討的問題。

沒有體育制度革新

辦亞運只是燒煙花

要申辦亞運，不是在東亞運後一鼓作氣就能成事。政府須先交出令人信服的長遠計劃，包括：

（1）檢討運動資助制度，普及而受歡迎但較少取得獎牌的項目，是否也應獲資助；

（2）如何改善各體育屬會的運作，以培訓更多優秀的運動員；

（3）如何協助運動員改善生計，毋須為退役後苦惱等等；

（4）這次主辦東亞運後，能否汲取經驗，確保錯漏百出的情况不再出現，也是當局必須認真檢討和改進的。

主辦運動會只求爭金奪銀實在過於功利，對整體社會而言，最重要的是推動運動風氣，改善市民體質；所以，政府應有計劃地吸引更多人成為運動愛好者，香港體育的根基才能穩固。

作者: kimkileo 時間: 15-12-2009 08:59

引用:

原帖由 bonzonie 於 14-12-2009 17:32 發表

過多幾年返黎報仇

賀歲杯...世界杯外圍賽咁.....到佢地小志強，戴志偉，泰萊上身.....

.....
君子報仇唔洗等十年.....

歡迎光臨 CGF (http://wargamehk.com/cgf/)