[新兵起點] 怎樣做個好新手 by 山雞
唔好意思 呢個教學主要針對學生而寫 但如果唔係都唔打緊, 一樣會學到野
夏天又尼啦 ![註1]
夏天係Wargame新手加入既旺季, 學生們都放暑假想參加唔同既活動. 但一個新人只係有個諗頭又不知由邊度開始,
咁點算呢?
唔洗驚, 你識得上網搵論壇已經行左最重要既一步啦 ! 新手好多時驚問錯野, 亦事實上都係... 
.
一開始既我亦唔例外, 大把師兄師父都係, 所以唔需要太擔心.
同其他教學一樣, 英文都有句 "because we made mistakes, so you don't have to'.
即係解我地果陣無人教所以做錯晒, 依家我地尼教你, 所以你唔會做錯.
但當然唔可以完全教晒啦, 呢個教學會教你點樣開始, 教你點樣有一個正確既態度同模式. 就算一個玩左幾耐既老手都好 一樣有野唔識 但佢地唔會係又問唔係又問.
點解? 因為佢地已經知要做d乜. 以下係我玩左幾年得番尼既心得:
- 記住 ! 你係一個. 新. 手 ! wargame同好多其他活動一樣可以好深奧.
好多野你係唔知的. 亦有好多野你以為你知但其實係錯的 係誤解尼的. (難聽d講句, 不要太天真)[註2]
作為新手一名 要抱住一個客觀, 肯去學習既態度. 你要有心理準備 推番晒你所識既野. 呢個世界永遠都一山還有一山高,
你無論玩左幾耐都好 都一定有人叻過你. 之前都提過, wargame可以好深奧, 同其他野一樣要用時間去浸, 絕無一步登天. 所以慢慢尼
唔好心急. 尤其是買野, 唔好掛住貪平 好多時後悔收場!
- 唔出聲無人當你啞的 !! 新手要沉默地學習, 多睇post, 新舊也好, 新手等如一張白紙 學到少少都已經賺左. 唔好係又出post唔係又出post,
最興新手出錯就係出d搞氣氛既post, 最後自己出晒醜.... 新手好多時都血氣方剛 想有一番作為 所以出埋晒d月經post 以為自己個post多人睇多人覆就代表自己勁,
呢個係絕絕對對唔要得既行為 ! 記住係新手死忌尼的 !
- 要有禮貌 ! 唔係叫你個個post都唔該前唔該後好似乞米咁, 但基本開post都客氣d 講番聲唔該. 要識接立唔同既意見, 好多時有唔同既見解
唔代表一定有一個岩同錯. 好多時可以共存. 要識尊重別人, 呢樣非常緊要. 仲有尊重wargame, 好多人覺得好型著d gear出街,
仲露晒d槍械出尼.... 到時街妨又投訴得多就會好似英國咁, 全面 ban槍 (英國2007年9-10月實行, 禁止所有氣槍買賣, 入口)......呢個係咪大家想要既結果?
- 要善用壇內功能/設施, 發問之前最好查下壇內其實係咪已經有同類型既問題. click
here 去搜索舊post [註3] 以免壇內過多重覆既問題.
另外, 個論壇有分咁多個區係有原因的, 如果你係一個新手 就去新手區發問, 因為果個區d師兄會知你係個新人, 解釋得好d, 會將就d.
- "google is your friend" , 查閱網站永遠都係你最好既朋友 ! 呢度好多師兄都肯解答問題,
但好多時新手係唔會明d較深既專用名詞. 咁點算呢? 當然好似做功課咁, 上google查過究竟. 有乜問題, 第一時間上 google
image 打個字落去 即刻看圖識字 ! google無就唔代表唔存在既, 可能你打既字眼唔中point. 可以試下其他字眼或者去d鋪頭既網度睇睇.
行鋪頭d網站最好, 又無員工"啤"住你 又可以慢慢睇. 另外一樣非常唔要得既態度, 有好多新人想扮某某隊伍, 但竟然排斥那隊用既語言
! 美軍最常見, 乜都用譯名... 無晒feel了....
唔用番英文唔係問題 但竟然排斥英文....
- 無錢唔係罪, 無錢玩唔代表無需要了解乜d資料. 就算有錢 亦唔係大晒, 有無聽過 "有錢無文化" ? 唔好睇少wargame
d槍只係千幾蚊, 一枝靚少少既鏡都去你萬幾蚊. 仲有好多時係有錢都買唔到. 記住~你有錢無錢係你既事, 不要apply係人地身上.
- 要細心留意仔細既details. 好多時立下眼都係一樣 但其實非常唔同. question everything! 對每樣野都要問,要諗下,
唔好麻目咁相信自己見到既野. 非常不幸, 壇內永遠都有d鐘意玩新手既人, 佢地會亂up當秘芨, 會老點叫新手用辛苦儲番尼既錢買d唔等洗既野.
亦提提覺位新手, 當其他商業一樣, wargame公司係會派打手尼論壇hard sell佢地d野. 所以要睇多d唔同既意見.
- 諗野要多方面諗, 諗得深入d. 例如, 係鋪外見有人買國產既氣槍wor [註4]
你第一時間會諗, "佢一定係玩唔起貴槍既窮人." 嘩,嘩,嘩 ! 唔得, 唔可以咁諗,
雖然真係有呢個可能, (((但係))) 諗野唔可以係呢度停 ! 有無諗過佢可能只係買番去擺/做look ? 又或者佢買比朋友 ? 又或者佢買番去只係試下手感
?
- "be prepared you are wrong" 要成日準備你會錯, 事實好多時無奇不有. 用番 8, 個例子.
又有無諗過原來佢係對頭公司派尼既間碟?! 買枝槍番去係研究人地d設計. 好多時事實會眼我地眼突突...
但亦都要接受. 錯左就要認, 唔好死撐, 講句sorry唔洗死.
- 最後就係出post時要有諗過 讀者唔係你本人, 人地唔知你諗緊乜, 有幾多錢, 有乜目的. 出post前考慮下一個讀者讀左會有乜反應. 如果有人玩野 就當時運高唔好理佢. 以免又一場罵戰.
最後一樣: 安全第一 !!! 唔用槍時就唔好入匣,入電,入氣,入旦 ! 死人區/休息匣又係抽番隻匣出尼 向安全既方向射到空槍為止 !
[註1] 我好耐之前開始寫 但一路無時間去完成...個summer都過左一半
[註2] 打wargame唔同打機睇戲, 你唔會渣住枝狙擊槍一路描一路跑, 亦無"中距離狙擊槍"呢回事, 有鏡既槍唔一定係狙擊槍. 把槍本身唔係狙擊槍你裝乜鏡都唔會係狙擊槍.
[註3] 搜索功能要3個字以上先查到野....(CGF係註冊會員先用得搜索功能)
[註4] 國產氣槍一般比較平但做得無日本槍同香港槍咁好. [2007年尼計 十年後既野我就不能預知 ]