大貓的野外作戰教室 by 皇家御貓

第一彈 – 偽裝篇

序

　　平時打wargame最怕係咩呢? 相信除左夜game撞鬼同爆缸以外，就係一開Game無耐就被人打死,然後呆立死人區直到下一場先可以玩過。打game當然唔想無癮啦，要在wargame場上長命百歲，就要靠技巧來幫你！

　　本系列會針對以下幾點提出注意事項，而呢d地方多數響緊張心急，或殺得興起既時候就會被忽略；甚至可能你不曾留意：

1. 偽裝
2. 個人行動
3. 良好的cover

　　而呢d技巧要做到並唔係難於登天，反之應該成為你在Game中既好習慣！

1. 偽裝

　　要成功地在bb彈雨下生存，第一件事當然係收埋自己。而偽裝技術可以幫你將自己融入周圍環境之中，減少被辨識既機會。

1.1 服裝

　　最容易辦到既偽裝莫過於一套迷彩服。至於何種pattern才好用？實在係不能如此定論，因此建議依照個人喜好使用就OK。不過要注意既係，如果想達致最佳效果，沙漠色既套裝請小心選用 – 雖然香港game場沙地也不少，不過響密林中既沙色真係十分顯而易見。仲有洗舊左既軍服會無咁鮮色，濕左既衫褲會變得深色；隱閉效果同樣顯著。
　　另外關於鞋方面，除左隱密性外，基於保護問題一對靴 / 行山鞋都係合宜之選。至於波鞋以至如Cons之類既布鞋，輕則易於疲累；重則一個失足拗柴，咁你就可以退下火線渡假去盡情滑雪幾個月 – 不過係響香港用拐杖玩。

1.2 攜帶具

　　目前攜帶具既種類大致上可分為吊帶類、背心類及肚兜類。但係關偽裝咩事呢？有！就係是否影響到你既行動同會唔會製造噪音。至於顏色方面，注意事項大致與衫褲雷同，自行決定罷。

1.2.1 吊帶類



　　吊帶即是指如美軍的LC2 / 英軍PLCE Webbing類型既equipment。此種乃本貓最常用最喜歡的一種，好處是袋子數目可按需要加減，絕無多餘；而且更是爬行時的恩物 – 唔會被自己既袋頂心頂肺！故此可以將自己盡貼地面。
但係另一方面size係對玩家唔公平的：腰圍越細，腰帶越短，可附掛既袋越少！「若要Webbing著得好，首先條腰要夠粗！」呢條金科玉律，真係無死錯人。此外Webbing著起後條腰就好似穿左水泡咁，若不盡量貼身會好容易勾草勾樹。

1.2.2 背心類



　　戰術背心類既產物就更加五花八門，不過大致上都係將袋子放響玩家Body前後。戰術背心最大既好處係取物快捷方便，唔使好似webbing有時要伸手去身後盲摸。而模組化者更加係User-friendly，你喜歡的話可以砌到自己成個移動城堡咁。但一如上文所提，背心係有機會響爬行時頂心口；而且袋與地面既磨擦更係嘈得很。況且磨得多一來會好快玩殘你件Vest，二來一唔好彩磨開左你袋口就會跌野！但有個小秘技就係將你心口附近既袋仔(假如有吉袋)塞滿軟稔稔既野；咁就可以好好享受你既潛行之旅。

1.2.3 肚兜類



　　肚兜(Chest rig)可謂最輕便攜帶具之選！肚兜的輕便性有利快速移動；貼身設置使肚兜既取物方便性不下於戰術背心…仲可以讓玩家背脊涼涼爽爽。
　　不過肚兜由於大多棄腰部空間不用，故容量十分有限。而且爬行時可謂最頂心頂肺既載具！
　　仲有一個親身經驗：就係如果好似本貓咁既矮玩家，其實肚兜會cover到落腰腹位置，結果同Vest無異…仲少左袋用。

1.3 外加偽裝

　　話說衫褲鞋Vest都迷彩左，咁係咪已經可以做戰場隱形人？未咁快。雖然佢地天生都有迷彩護身，但畢竟所有既野都係人造的，唔裝扮一下仍然好易一眼認出。正如靚女雖然天生已經係女人，不過化妝可以令佢地更省鏡一樣。事不宜遲，即刻講下男子漢應該如何化妝！

1.3.1 面部偽裝

　　女士們花得最多心思打扮邊部份？係啦，就係塊靚面。而偽裝既第一個要點亦係你塊面 – 因為你青靚白淨，更加係黃皮膚既中國人，拼埋草堆時格格不入。因為自然界入面鮮有好似人面咁圓既事物，更遑論五官。面部偽裝既奧義就在於：

1. 使膚色貼近自然環境
2. 破壞五官輪廓 (即係雙眼下有鼻，鼻下有口既人類外形)

　　不過玩家又唔係變色龍，唯有借助外力啦。市面上都有唔少迷彩膏，例如
英軍issue既棒棒型(一支一隻色)、鏡盒型(一盒多色)仲有民間打獵用品等等。本貓在此建議玩家響使用之前Check清楚自己有否敏感，否則搽左上面分分鐘破相…另外仲要留意下隻膏有無附加功能如蚊油及防晒成份等等。(其實仲有一種方法就係趁Halloween減價買定一些化妝顏料，當中有紅有綠有啡，都過得去架。)
咁到底油面要油成咩樣呢？



　　上圖係一個塗裝不足既例子。雖然額頭、面頰、下巴顏色大致上已被改變，但五官既紋理卻未被破壞，因此未能達到最佳效果。



　　上圖係比較合宜既面部偽裝。可見花紋劃過鼻樑及上下唇，目的是減低五官輪廓既可辨識性。可見真正既面部偽裝最緊要合宜！過猶不及。

1.3.2 頭部偽裝

　　一如之前講 , 圓型響大自然係好罕見既，所以除左你塊面，你個頭頂（假如閣下短髮）都一樣好易認得出，特別是黑頭髮。所以姑勿論閤下係咩髮型，打Game時都係戴返camouflage左既頭具例如頭盔、叢林帽、cap帽等等比較好。不少帽或盔布都有一條條加縫上去既布條，當然唔係比你用來攝煙仔啦！係用來插草增加偽裝。雖然迷彩左既帽都幾有用，但帽型本身仍然可能被認出。下面既方法玩家按個人需要採納罷，當然跳過呢一部份問題都不大，反正對Wargame而言算係錦上添花既野。頭插草有幾大原則：

1. 要吻合當地植物生態(例如北極不會有芭蕉葉)
2. 採用植物不能太突出(大大塊葉，甚至係花)
3. 不能插得整齊或對稱 / 有規律
4. 以破壞帽 / 頭盔外型為目標
5. 不要與你四周環境有異 (如戰場包含建築物甚至沙地便不需要)

1.3.2a 插什麼

　　第一個方法係最平(唔使錢)而且效果最好的 – 就係用即場新鮮收割既植物！好處係佢真係植物，而且一定可以Match返你附近既植物。不過呢個方法同時係最費時的 – 每次打Game人set gear你插草，開飯都慢人一步！而且基本上你一日要插幾次，因為拔出既草好快會謝(尤其是夏天)或者響運動中跌左。本貓亦覺得呢個方法其實都幾破壞環境，所以將就下執d趺左落地既草草葉葉算啦。

　　第二個方法都係插草，不過唔係真草 – 無錯！就係痴•膠•花。用假草既好處係一勞永逸，一Set好左個頭就可以一直用落去；但亦表示左你只能插一種草。而且出面買到既草不多，反而是葉居多，效果不太理想。有興趣的話可以到太子花墟睇睇，不過買之前最好問問有無朋友有批發卡！繽Ｘ園藝連鎖店批發卡最高可以有六折優惠。如果嫌一條太長同兄弟Share買一條也可，記得用前去除花頭，揀要揀純綠葉。有些花草串主幹係用膠鏈串成，勿用！最好揀一些一條過的，一來似返真草，二來佢條芯有鐵線方便整形。本貓心水推介係Ivy藤，因為葉細又無花。

　　第三個係比較中庸既方法，就係用迷彩碎布。當然布同草不可混為一談；但除左只需整一次之外，碎布響任何天侯 / 地形都有一定既效果。碎布何處尋？當然大家未必捨得剪自己條褲，所以本貓建議你去佐敦寶靈街或太子黃竹街布行找找。小量購買的話佐敦比較好，因為隨時半碼都有交易；太子品種最多，但布行亦多數有採購下限，故此先問清楚比較好。碎布的工序最麻煩(要車縫)而且做左無得回頭，所以本貓只建議在頭盔上使用，因為盔布可以按需要替換。

1.3.2b 插多少

　　講左咁耐有咩可以插，咁到底要插咩份量啊？又係果句，過猶不及：太少無效果，太多好明顯。正確既程度都好難用文字或言語表達；所以本貓只好附圖讓大家自行領會：



1.3.3 裝具偽裝

　　此部份原則與1.3.2大致相同，但由於更麻煩，而且打Wargame時效果不太明顯，故且不談。不過本貓認為對於Webbing使用者或身穿偽裝衣既狙擊手來講則較有偽裝的需要。圖片難尋，但可以參考以下短片：
http://www.youtube.com/watch?v=qiaurDW_4xs

1.4 其他注意事項

除左上面既各點以外，仲有一些細節要留意：

1. 手機鈴聲(特別大字強調)全世界都知你響邊！
2. 同上一項相似，就係無線電聲浪；即使未到夜深你一樣要將音量收細。
3. 反光物品如戒指及鏈類等等都要收埋，否則太陽底下好易出賣你。
4. 護目鏡！估唔到保你變成害你 – 某些鏡片反光程度不比鏡子差。
5. 會發出聲音既物品如鈴鐺掛飾，甚至係你支槍鬆拋拋既零件…

　　打扮好晒，係時候出一場好Show！不過唔代表你可以好似隱形人魔咁大搖大擺響場上走來走去。咁對戰進行間又要如何隱藏自己呢？下回再續！