引用:
原帖由 thomasfungyw 於 26-7-2008 22:07 發表 
多謝名位師兄的幫忙
小弟最後打算玩越戰裝備
上網找了點文章
但還是有很多問題想問一下
希望各師兄幫忙
1) 請問"越戰虎紋"是否只有南越才有?
2) 玩虎紋的裝備是否跟其他uniform 一樣的?(好似h帶,s帶)
...
1)
菲律賓、台灣宜家都仲有用，南韓、泰國曾經使用。
美軍本身已經冇用好耐。
(有都係訓練營內練習服，或者簡時一兩條友玩野，或者佢地係DELTA、保安之類，冇限制衣著而穿上了虎紋，而被人誤解以為美軍落場穿虎紋~! 仲有就係，有時讚助商宣傳而提供俾小貓幾隻影下相見報，D人又當左係。)
以前美軍打越戰都係路過而配額使用，目的係配合印度支那半島的天然環境提供更有效的作戰，同處理特殊任務時穿用。
因此，當時，穿著上虎紋的，主要都是南越政府軍的精銳部隊，以當時南越政府的軍事政策和指標，南越的精銳部隊有三種-
第一、別動隊，即遊騎兵，工作是聽令總統，鎮守並安定第三軍區，即當時的首都西貢或市要的大縣城市。(精銳的不是上陣打杖嗎?正路係嘅，不過七四年之前仲有美軍主力幫佢打，加上總統怕死掛~未將佢地納入做自己嘅京師禁軍，夠哂安全。)
第二、兩棲陸戰隊，佢地負責鎖守第一及第二軍區沿海岸線，是1&2 FIELD FORCE集團軍的補營後盾，執行協防工作。
第三、就係跟SOG落場做埋哂D"鬼野"果班南越金牌打仔，或者可以叫佢地"死侍"，簡稱特種部隊。
其中，越戰時期的虎紋主要先為三種：金斑虎紋、銀斑虎紋、紫斑虎紋。
紫斑虎紋係南越海軍陸戰隊專用的。
仲有D少數不同嘅虎紋，或者迷彩，遲下再深入先補充。
你睇戲見到今時今日美佬穿上虎紋，其實不是正規官方用的。
有時係當部隊普通練習服使用，千其唔好當左係G.I.野。
近年ABU係唯一一隻官方試驗嘅類似虎紋作戰服。(繼越戰以後)
不過都試驗失敗，棄用了。
斑虎紋與英軍DPM的雞爪花相似，但是紋理和密度不同，係兩樣野黎嘅。
2)
穿虎紋有心得同橋妙，可與你分享作參考~
一、正宗虎紋係窄身、衫袖短(甚至吊)、衭管蘿白至衭腳窄、衭腳比較短，簡稱"鬼仔衣"。
二、當時佢地嘅理論係穿得FIT身，穿越密林，下水上灘，作戰時就更靈活。(佢地係FIT身套入去著，衭加BELT，當作戰時再穿上軍用粗BELT或EQUIPMENT，雖然凈著好似怪怪地睇唔慣，但當套上GEAR上身時，你就不會覺得怪怪肉醜。)
三、布料全綿斜紋像毛布睡衣，偏向美式OG107質量，CUTTING也相近，耐磨、索汗、排熱。
四、坊間有複刻品，但質料較軟身、薄身、滑身。(商舖教/叫你返去點洗，洗完出黎個效果就最正，似當年果D，其實佢地只不過係鼓勵客人洗殘件野，一來賣相似一件貴價二手的虎紋收藏品，二來係幫件衣料過漿，等件野殘D粗獷D睇起上黎冇咁假，來掩飾缺點。)
五、如果你係廋仔，就最好跟返越南仔STYLE，就自己身型，少少入膊會吊袖，咁就著得入型入格D。
如果你少肥，就最好唔好著虎紋喇，一定要著嘅話就可以簡美佬STYLE，唔駛著到貼哂，ARM ARM好或者鬆少少好喇。
六、一般宜家最平同人地最常玩嘅係銀虎紋，皆因廠造貨太多貨喇，價錢唔算太貴，但如果見到有舊幾兩舊水果D就最好唔好買喇，齋睇好似差唔多一樣，但其實手工、料、落位係好有問題，每人要求都唔同，不過你初初玩，你自己衡量啦。
七、洗衫時要返轉件衫洗。返轉洗可以keep個色好d。可以試下。
(要知道迷彩的真正功效是偽裝，脫色洗得白白的就已經失效，沒有作為。
洗得多洗脫色，仲著上身覺得自己好型， 果d叫vintage，係二手時裝，絕對唔可以歪曲或錯誤左觀念，所以迷彩一定要盡量保持未脫色/少脫色，太殘太舊洗到白白地就要換，唔好夾硬著，夠期就要換，
咪以為~
有洗水紋白白地仲正，咁先打過杖丫嗎~ 哩d係一相情願錯嘅天真想法。)
八、穿虎紋唔一定要釘章，尢其是你剛剛開始。
九、穿虎紋一定要拋低穿潮服嘅心理同想法，冇錯~ 係有navy seal有CIA、有SOG將上身虎紋配搭下身牛仔衭或斜布衭，但唔可以斷章取義，著條RMC、LEVIS或者時下嘅CUTTING牛仔衭襯虎紋，又或者為左襯條LOOSE CUT、3D CUT、OVER SIZE嘅牛仔衭而將件虎紋買大幾個碼，到時執到自己唔知算係出街定打仗。 若然一定要玩"特種部隊"，鞋方面請穿沉實簡單布鞋或越南仔BOOT、或者美軍JUNGLE BOOT，唔好學人著咩911 REDWING、CAT~ HI TEC~ 或者時下沙BOOT、NB鞋、板鞋、波鞋咁九唔搭八。
十、穿軍服配裝備一定要尊重、俾心機、耐性、時間、金錢同專業，唔好俾自己亂咁黎，費時到時浪費自己時間、浪費金錢、俾人笑、俾人寸、不倫不類，或者日後覺得自己買買埋好多垃圾。
貴精不貴多。
3)
越戰裝備，以南越和美軍使用的主要為美式(早期有法式)，主要分為M1956和M1967大路兩種，分別是前者早期為全綿帆布製造，後期係尼龍/半綿半尼龍製造。型態上近似，主要是質料不同，早期帆布料較粗糙和闊大，後期輕巧和幼細、甚至多了些"功能"之類嘅花巧野，價錢不相百仲，兩者各有部份裝備貨量少而價錢被炒高甚至斷市多年。
越戰期，H帶有4種，Y帶一種，
早期H帶2種是帆布、2種是尼龍，
帆布H帶- 顏色為OLIVE GREEN色，都有偏甘、偏綠之分。
2種的分別在於背部尾隨的鎖定，最早是勾，之後改良為扣。配套時較貼身，因為全綿的關係。
但一旦濕水後，重量增倍，自己考慮。
尼龍H帶- 本為幾種物料：草綠色主布+甘草色包邊，但因當年該種物料暴哂太陽下或濕水，原本草綠色部份會變成甘棕歇色、甘草色包邊會哂成橙歇色，因些人們稱之為"金腳帶"。
2種的分別在於其中一種是USMC專用的試驗型，有啪鈕和快速解脫扣，可配合指定背包使用。
而另一種就是普遍的H帶，它是美式Y帶的始祖，後來的Y帶都是由它再三改良而衍生的。
尼龍Y帶- 顏色與M1967色系接近。
1973年出過一批試驗型尼龍裝備，主要係由M1967改良而成的，命名:ALICE LC-1。
越戰期腰帶主要分
M1936 釘扣.45手槍腰帶 (前有左右兩邊啪鈕、橫紋) /共1種。
M1956 釘扣橫紋腰帶、 釘扣直紋腰帶；DAVIS扣橫紋腰帶、DAVIS扣直紋腰帶 /共4種。
M1961 釘扣啪鈕橫紋腰帶 (USMC專用、啪鈕為裝配M14彈匣袋用) /共1種。
M1967 釘扣橫紋腰帶、釘扣直紋腰帶； DAVIS扣橫紋腰帶、DAVIS扣直紋腰帶 /共4種。
LC-1 釘扣直紋腰帶、灰插扣直紋腰帶 /共2種。
TOTAL：12種。(未計色差、期數年期)
M1936、M1956、M1961都係全綿製造。
M1967係50%綿50%尼龍製造。
LC-1係全尼龍製造。
顏色有OG綠、棕色，有空再詳述。
所以越戰尼龍裝備，係冇一個實色可作準。
4)
美式裝備最好不要與他國裝備相提並論，因為美軍已經幾複雜。
其實六七十年代美軍部份裝備，與英軍少數相似，加上七十年代尾美軍都曾經輸入過好似M69破片衣之類的東西予英國，不過，我本身唔熟英軍，要請教英專人仕。
5)
若然執正就最好跟足STANDARD擺位，但真係落場打，尢其係郊野，都隨心隨意，就自己方便，因為當年D配套冇咁多、實用研究冇咁好，所以當時當兵嘅話：軍人裝備一定係唔舒服~! (其實係佢地果個年代未完善慘D啫~ 波始終係圓嘅。)
*standard係左右小掩各一個mag. pouch、腰左右水壺各一、腰背掛上buttpack，目的係平衡負荷力和重量。早期嘅m1956設計好興外掛first aid kit、剷、刺刀在buttpack兩旁，用alice扣、圈勾固定起來。
*當年常用匣帶，一排7匣圍住個肚，又輕，用完又可即棄，一個不錯的選擇。
6)
M733係以M16A2為基礎而改造開發的，越戰當年仲係M16A1，咁何來會有M16A2嘅產品呢?
想用卡賓槍，越戰期可選擇M653、CAR15、XM177。
M653要自己砌，或者買二手。
CAR15停產絕版，試下買二手。
XM177要自己砌，或者買二手。
MARUI果支CAR15，有D位係佢自己睇相將人地CUSTOM短咀作落去話係CAR15 STANDARD，大家就誤以為CAR15真身就係咁嘅樣，其實CAR15真正個LOOK唔係咁~ 真正CAR-15其實係一支M16A1嘅袖珍版，槍管長度與M653相近。
英國人也求其地搞錯，將XM177、M653當成CAR15，或者統稱CAR15。
colt .45主要常用係軍官式的黑色皮革置腰槍套、和背帶置胸的黑色皮革槍套，當年沒有尼龍槍袋，記得應該有三、四種，不過其餘果d宜家應該搵唔到買唔返。
或者有當地diy嘅帆布手槍袋，貌似英軍browning HP帆布槍袋。
因為實在太多，你都係消化下︿之後再補充俾你，再告訴你。
我須要D時間去SCAN D圖同搵相俾你，本來想俾WEDSITE你去睇，不過驚你一知半解越睇越複雜。
追加WEBSITE參考：
1)
http://david.brubakers.us/Vietnam/
2)
http://www.special-warfare.net/d ... _gear_01_index.html
3)
http://www.vietnamgear.com/equipment.aspx
哩3個對你黎講，已經夠，可先睇一次，普普地開FILE有個印象先，大致上我提及嘅，你都可以在這幾個WETSITE搵到相應嘅圖片。希望你明我講乜，同吸收到啦。
我會繼續上載資訊俾你和解答你。
[
本帖最後由 tonyjaa 於 27-7-2008 16:52 編輯 ]
