今次尼個SHOW係我由一個台灣人口中聼到，每年大概尼個時候開SHOW，如果唔敢一個人去我聽聞有個荷蘭佬搞團去，不過詳細唔係好瞭解。相對於莫斯科航空展好似話4000盧布一張飛，尼個SHOW簡直平到笑，除左頭一日係VVVIP專屬一般人無得去之外，跟住兩日係for專業人士，一日飛係1200盧布，跟住三日係公衆日，一日飛更低至400盧布。而可以玩既野更加係多到爆，好似我中意飛機大炮坦克，佢個SHOW有三個會場，其中主會場係Patriot Park愛國者公園展覽館，俄國人會將佢地現役既坦克大炮裝甲車飛彈發射車統統擺出黎，祇要你唔係刻意去破壞佢地會由得你上去擒上擒落，甚至包括你可以擒上去白楊M ICBM（洲際彈道飛彈）發射車上面影相扼like，我今次衰在一個人去，無人幫我影
https://en.wikipedia.org/wiki/Patriot_Park
展館入面係要買飛登記領取通行證先入得，通常係俄國自己既軍火商擺檔，有好多俄軍自己都無或者唔夠錢買既高檔貨，再入到内部展館有關於軍事科技既展覽，或者重工業產品，但亦有例如俄軍軍服同鞋靴手錶其他裝備供應商在内擺檔，有D甚至係現場賣貨零售，當然唔少得槍械生產商，有各種槍械擺o係度比你摸。
航空分會場位於展館附近一個Kubinka軍用機場，係大會指定其中一個穿梭巴士站可以直接坐過去，而由主場館過去要轉兩道巴士，尼個航空分會場明顯就係飛行表演，影飛機，佢最大賣點就係飛機表演完滑行返黎係離觀衆圍欄好近，近到你幾乎摸到佢，飛行表演就唔一定話特別精彩，勝在個位夠近。
https://en.wikipedia.org/wiki/Kubinka_(air_base)
陸戰展示場地位於另一個分會場Alabino，每年俄國同中國等國家搞軍事競技大賽其實就係尼個地方，同一個場地尼個Show期間會有兩栖登陸作戰實彈演示同陸上裝備演示，會有坦克 裝甲車 大炮 火箭炮 高射炮現場射，下下真彈堅會爆，有時或者會有由隔離航空會場飛過黎既飛行隊過場，甚至會有武裝直升機現場表演對地射火箭之類，不過我唔好彩，我去影坦克場個日佢地放我飛機，到我去影飛機個日又親自係個機場目送佢地去坦克場表演
https://en.wikipedia.org/wiki/Tank_biathlon
最後根據我上面幾樓個大會官方網頁資料，佢地話有個燒槍區，可以燒既真槍根據張名單上有過百種，但個SHOW實在太大，我行唔完，確實係個遺憾
最後愛國者公園附近係Kubinka Tank Museum，尼個博物館其實係本地區比愛國者公園仲要早既設施，佢館藏十分之豐富，尤其係二戰時期既古董係二戰坦克迷朝聖既必去之處，個度可能坦克多到唔志在，你會偶然係路邊望到JS2、T34之類俾人擺公路邊做擺設，佢Kubinka1火車站一出站亦會睇到一架T62做成既紀念碑，可以話當地既坦克文化相當大。
https://en.wikipedia.org/wiki/Kubinka_Tank_Museum
[
本帖最後由 Hamlet 於 4-9-2018 02:10 編輯 ]
