[說好了的開箱文] 乾火練習用感應器, MANTIS X10 ELITE

前文: http://www.wargamehk.com/cgf/vie ... &extra=page%3D1

TLDR, 暫時結論:
呢隻係幫射手改善射擊技巧既小工具. 只就打WARGAME, 特別係意粉叔叔玩家, 呢隻工具唔買, 節省D 錢買多D BB 彈好過. 另外, 傳統電槍似乎呢隻工具感應唔到撃發. 如果無EBB、GBB 類槍, 又係買黎廢既. 但係, 即使你只係玩氣槍好, 如果你係一個著重你射擊技術是否穩定、一致, 同埋你既技巧如何以量化評估及改善, 呢隻野就似乎會非常有用.

背景
網上已經好多人做左佢用係真鐵既開箱文. 可以睇下U 管例如Iraqveteran8888 做左一個幾詳細既評估. 反而玩具世界可能玩家都係希望買件玩具而唔想使太多錢係一個又用唔到既技巧上, 所以好似無乜人講. 我希望用多少少篇幅講下佢係玩具應用係點. 當然, 香港法例所限, 我又唔係有錢到係香港玩真鐵. 所以呢篇野, 至少去到目前, 都無得用真鐵做對比.

話說呢期無打GAME, 又準備離開香港但係又唔捨得賣晒D 玩具, 又想拎D 玩具黎撚下, 就去一D 氣槍靶場打下. 打下打下發現電話APP 無一個可以俾玩具用到而又可靠既計時器去計每一槍既時間, 而又唔會連上膛聲都當埋係開槍聲. 後來發現有隻叫SHOTMAXX 既手錶可以做到, 但係佢個價錢只係可以做到計時器. 所以又睇下睇下, 結果俾我發現有隻叫MANTIS 既APP, 話可以做乾火練習而且可以因為佢個感應器資料可以幫助射手改善射擊技巧. 而且最緊要係佢可以用係氣槍甚至弓箭上. 睇官網見到有幾隻, 有D 只可以做乾火, 有D 只可以做真火, 又有D 只可以做某D 型號既火. 而X10 ELITE 講到真火、乾火、同埋用乜槍, 甚至弓箭都可以. 見到個價錢, 249美帝幣, 折合2000 本地幣到, 掙扎一陣, 最後都係買左. 連運費盛惠280.99 美帝幣, 用DHL EXPRESS 送過黎.

付運過程及客戶服務
呢度大家要有少少心理準備, 似乎美國因為疫情關係, 好多人走左去買槍鬧彈藥荒, 官網都有寫需要一至兩個星期先可以出貨, 所以可能都預差唔多一個月先到香港. 我5 月4 號買, 佢5 月21 號先出貨, 然後今日返到公司就黎到. 呢度有一點抵讚, 我見佢過左兩個星期都未開始付運, 寫左個電郵禮貌上問下佢會唔會我可以做到D 乜令到付運可以快少少, 佢個客戶服務雖然講野只係流於客套話, 有D 講左等如無講既野, 但係電郵態度非常好, 可以俾做客戶服務既師兄們當版黎抄抄, 用黎回一D 好似我咁西既客人:


到貨、開箱
同去熱帶森林買野一樣, 外面一個白色盒, 拆開就係咁既樣 (唔好意思, 公司燈光先天問題, 所以兩粒燈係咁照落黎反光:


背面:


大細對比, 用部咸豐年代既NOKIA 機做比較:


開左盒, 裡面就係一個細D 既... 盒:


細盒拆出黎既野:


大家係上圖會留意到有兩個用黎夾槍管既, 係用黎夾D 無路軌既槍. 而左手邊有條橡筋綁住個幾塊係軟膠黎, 用黎夾係個個夾中間就唔同槍管大細.

USB 線, 係行呢隻, 唔知點叫, 但係如果有用過安卓機應該唔會第一次見(掛...):


主件
主菜, 個感應器好細隻. 如果真係要搵野類比佢似隻T-1 既低鏡橋大細, 重量應該輕過隻5 蚊銀少少, 隻野D 材料摸落似MAGPUL D 膠料, 應該唔易爆:



而上圖支筆指住個個就係開關掣. 背面:


而我拇指拉住個個位就係控制個路軌卡位, 有少少似INSIGHT D 手槍燈既做法:


用藍牙同電話連線, 連左反應係快過AIRPOD...:


MANTIS APP 支援語言
佢個APP 有唔同語言對應, 視乎你部電話係用乜文, 佢就會出返乜文. 已知有英、日、法文, 簡體中文亦可, 但無正體中文. 同埋簡體中文我懷疑佢只係用谷歌大神由英文原文翻譯. 一D 專有名詞, 例如USMC QUALIFICATION, 佢無譯到. 反而用法語佢連射擊紀錄既參數都翻譯左, 只係佢提出既改善射擊建議同埋參數解釋都係用返英文原文.

入到去, 有唔同既練習選項:



但係我公司無玩具係手, 要返到屋企先可以再進一步試. 暫時黎到呢度先.

[ 本帖最後由 derp 於 31-5-2021 21:37 編輯 ]

測試用件
屋企只有一支電槍, 一支氣動槍. 而手槍得一支KSC GLOCK 17.

KSC GLOCK 17 係GEN3 身, 所以係直頭裝唔到路軌件 -- 無法, 之前用真鐵PEQ14 遇到過同樣問題. 都無乜衝擊. 佢有個轉換器係放落彈夾底板, 但係睇落要鑽窿. 唔搞住. 繼續試其他.

然後兩支長槍. 一支係VFC KAC PDW 電槍:


另一支係WE L85A2. 個鏡之前搬屋拆開左黎搬, 未搵到:


另外大家會留意到因為L85A2 本身係無路軌, 要用之前提過個槍管夾裝上去. 但係都要用到最厚個塊軟膠先可以固定到佢係槍管.

不能搭配傳統電槍使用
簡單來說, 個電話APP 係靠感應器講出支槍既移動既數據黎估你打既目標同埋係咪開左槍. 佢唔係一個鏡頭, 只係一個感應器, 因此唔會話到你聽你既瞄準點 ("POA") 係咪對正個目標, 亦都唔會話到俾你聽你支瞄具是否已歸零. 而相信如果玩氣槍既話最核心問題之一, 係佢可唔可以探測到傳統電槍開槍. 最直接答案, 不能. 傳統電槍開槍, 係摩打拉郁條天梯推個活塞, 個動靜唔似擊錘撞擊, 亦都無一個好清楚既擊發點 ("BREAK POINT"). 個APP 係唔會感應到你已經開左槍. 到目前我只係試左"自由訓練"模式, 未試其他訓練, 所以其他模式可能得. 我試多幾日會再補充係咪真係得. 另外, 我無EBB 槍係手. 遲下我會用DAS GBLS 黎試. 我預感應該都會用到. 都係要呢個星期尾先可以答到.

至於GBB, 我得支WE L85A2, 無入夾, 亦固然無入氣. 直接答案係即使無入氣, 佢都可以探測到個擊錘打落黎個一下.

MANTIS 感應器及APP 簡單實測
入到去個APP, 佢會叫你登入. 整個戶口, 然後開個MANTIS X10, 個電話就會好快同個MANTIS X10 聯機. 入到去就會見到呢堆野:


我暫時只係做左"自由訓練" (即係第一項寫住"OPEN TRAINING"). 無計時, 係旨在睇下個持槍姿勢同埋扣機控制得好唔好. 開始自由訓練之前, 你要去設定個度, 話俾個電話聽你裝左個MANTIS X10 上乜槍、點裝同埋裝係邊度. 另外要話埋你用左手定右手打, 同埋係打真火、乾火定打二氧化碳氣動槍:


然後, 佢會叫你將支槍放平俾個感應器校正. 如果擺平只係需要大約一秒到就完成校正. 然後就對住你想打既地方打乾火就可以. 每打一槍, 佢就會俾到個反饋你:


例如上面呢一槍, 佢就話我右手係開槍時向左前推. 然後按佢指出問題個地方, 佢會講我可以點樣改善, 同埋會對你既每一槍做一個評分. 評分標準似乎係睇呼吸、扣扳機力度、兩隻手力度、開火後有沒有足夠跟進:


佢個APP 有少少似健身教練個D, 會叫你每日做某個目標既乾火. 佢個目標係每日至少乾火50發. 然後佢就會出個成績表俾你:


整體黎睇, 我無乜打真長火經驗, 氣槍無人話過我聽, 但係似乎我開槍時有個傾向係"寒"起個膊頭去預防後座力. 睇左佢既反饋我放鬆左膊頭, 似乎即刻改善左D. 會繼續試落去.

敏感度
至於手感方面, 個感應器會睇到一D 如果只用肉眼睇可能要好細心先睇到既野. 老婆又好奇拎黎玩左幾槍, 有一兩槍我好明顯見到佢好猛咁扣機, 個感應器睇到. 又有D 時候如果佢寒起左個膊頭 (而我係佢側面見唔到) 個感應器都睇到. 另外, 我自己有一兩下都係快左扣機, 而牛犢式步槍出名扳機係軟叭叭, 就係呢度個感應器就有時會話我扣機唔夠力, 或者係太突然. 呢D 如果自己做, 除非去一個300 碼靶場, 自己有望遠鏡一槍一槍咁睇返, 如果唔係唔係咁易可以睇得出.

而另外, 個APP 係厲害到由你用佢開始第一槍一路會跟住你每一槍既過程, 而且會做成短片俾你睇你個槍咀既移動, 同埋你既呼吸, 保持(? 英文叫HOLD, 即係開槍前閉氣個刻), 同埋開槍之後有無跟進 ("FOLLOW THROUGH"):


暫時見到既局限
但係有一點始終都係唔係太得. 始終係乾火, 有時個探測係我將槍上膛佢都計埋係開槍. 不過唔太經常出現. 我打第一次個三十幾槍中, 有兩三"槍"係咁樣出現. 固然個分數就只有幾分咁樣.

[ 本帖最後由 derp 於 1-6-2021 10:17 編輯 ]

WOW!高科技產品.

今日睇返尋日打個大約110 槍, 有少少野關於二樓個"用後感"要補充及改正.

之前提到, 個感應器係睇呼吸, 保持, 及其他黎評分. 我錯了. 佢似乎係睇開槍前扣機、扣機、以及扣機後槍咀既移動黎睇一槍既表現如何:



上圖解釋槍咀指向唔同顏色代表D 乜. 藍色係呼吸, 開始瞄準. 黃色係開始扣機, 交叉係擊發, 紅色係開槍後槍咀指向.

所以下面呢槍, 呼吸時, 槍咀老遠開始指向目標, 但由於扣機開始到擊發都比較穩定, 所以個分數都唔算太差:


反而呢一槍就變成咁低分 -- 相信當時係個下玩野, 試下當係打近身戰鬥咁開快槍, 又或者係我之前提過個個上膛當左開槍既情況:


而佢亦會出個成績表 -- 呢個先係真. 佢每一槍會話返你聽你表現為何.


亦都會話俾你聽整體來說, 有邊個地方最需要改善. 而我尋日就係傾向右手似乎用力推左向前. 需要將個握力留係握把, 而非向前推或向後拉. 而個平均分亦會話到你聽犯乜錯最多, 犯乜錯最少. 圖中見到唔同紅色邊代表唔同野, 要按落去先睇到:



暫時只係用左佢做最基本既單發射擊. 快速射擊 (甚至有個'解救人質'訓練) 未做. 要等多幾日.

[ 本帖最後由 derp 於 1-6-2021 19:09 編輯 ]

多謝師兄分享

近排也有留意這些真鐵/ 氣槍配雷射科技的東西，
不找由自可，一找原來已經發展得很多樣化，甚麼練習都有。

謝謝分享。

MANTIS 重有D 鐳射彈藥, 即係一粒俾某口徑用彈藥模型, 做我買呢隻一樣既功能, 又有D 係係彈頭位置有粒鐳射, 俾你肉眼睇瞄準點. 依家打真鐵訓練個成本應該會低左好多. 其實真鐵乾火有D 技巧都會訓練到, 好過一粒幾蚊, 一粒幾蚊, 一日打成千蚊咁打法. 當然, 後座力訓練呢個真係要用返真火先可以處理到. 就正如之前一個叫LUCAS BOTKIN 既YOUTUBER (T REX ARMS) 搵個日本男仔, 後者只係日日做乾火, 去到打真火, 只要佢本身無射擊既壞習慣, 熟習左個後座力表現絕對唔會差過打開真鐵既人.

另外講開鐳射 (唔完全係同你講既野有關其實), 好遺憾始終當時技術可能未成熟, 大陸同香港都流行過一段好短時間. 唔打BB 彈而係大家要成身有感應器. 我記得應該十年前旺角(???)有人搞過, 就係一個迷宮場. 我記得兒嬉到1、2 米距離開"自動" 都當打唔中. 企係度俾佢射又如何. 反而朋友支槍唔係對住我就我會中槍. 如果感應器做得好少少, 中槍死得唔係咁智障, 又少D "軍事味", 俾埋一家大細玩, 分分鐘可以做得住. 即係變成依家室內場做水彈槍或者NERF 既市場. 我細個, 即係差唔多40 年前, 因為家父做玩具買板佢都有拎過類似咁既野返黎, 又係要著成身感應器, 得我一個人自己玩. 但係40 年前都有其實如果有人去做得好少少個推廣應該可以做到.

講講下呢兩樣野, 其實又發下夢, 諗可唔可以做類似真鐵鐳射彈藥, 俾EBB 或者GBB 入槍管, 甚或其實裝上路軌 (類似軍隊用MILES 系統), 然後每打一"槍"就當係開左槍, 然後大家買個相對感應器黎做到鐳射槍既效果呢.


PS: 尋晚拎隻野把玩, 再試, 先見到原來隻MANTIS X10 係可以就咁無痛直上GLOCK 17 GEN 3. 尋日打左百幾槍. 不過等埋星期五打埋EBB 先一次過寫.

[ 本帖最後由 derp 於 2-6-2021 11:39 編輯 ]

明白你想說的狀態，簡而言之就是gbb / ebb ，塞條laser inner barrel 入去 ( 是真的有的 但是for 9mm ，要改 ，和要拆6mm inner )，
之後空擊「震動」時會射一下紅點當命中，可能打下雷射感應靶。雖然整個操作跟正常打法一樣，但個人覺得大部份人仍然喜歡見到有粒bb 彈真正地射出槍口。
何況如果開場，玩家用自己槍，例如拿3, 4 支玩具去打，支支也要改( 也不一定能改 ) ，玩完走時又要拆一輪，也是頗為麻煩的。
之前有上網找過類似的東西來看，想買回家做下練習。

>類似真鐵鐳射彈藥, 俾EBB 或者GBB 入槍管, 甚或其實裝上路軌
淘仔見過有類似既野, 成條gbb glock/1911內外管換做laser
不過打下靶可以, 對戰效果要好唔容易

係呀, 頭先手痕都睇一睇. 比如我見到有隻係成條手槍外管換. 但係本物都要3000 蚊到. 可能少人玩啦.

但係如果要做到可以對戰, 可能下一個問題係條鐳射係咪對眼安全, 而再後面就係要整個感應器可以感應到個隻鐳射即係應該要條鐳射本身要有少少特別, 如果唔係我用所謂既"鐳射槍" (亦稱鐳射筆或觀星筆) 都可以照到, 咁又似乎無乜意思.

再後話就係佢個感應器可能要寫個程式, 等玩家唔可以自己熄機重生或者死左都重可以開槍 (正正就係MILES 初版 士兵會做既野). 可能性價比不足啦.

而亦正如DAVE 師兄所說, 玩家都會想見到粒彈飛出黎既感覺. 雖然我自己可能會睇安全先, 會唔會打到人地痛、傷之類. 所以我先話應該係一個轉換套件而唔係一套新成品咁出. 但係似乎目前技術要求同價錢成本應該會貴得好交關... 所以應該都係做唔到了.

之前講到用DAS GBLS 上X10 效果如何。由於佢又唔係用二氧化碳，又唔係真係打緊乾火，所以我又西西地咁前幾日寫左個電郵去MANTIS 間公司如果係EBB可以點整個設定。雖然隻野主要係設計黎俾真鐵，佢又真係非常好禮貌又一日內覆我：



雖然講左等如無講 (亦都可理解, 佢主要市場係真鐵唔係玩具), 但係態度算係非常好. 無話因為我係玩玩具所以就無視我.

支槍原本既SETUP：


但係試左幾次，都唔係成日探測到。我估係咪C CLAMP拎槍方式既問題，又試左呢隻：


如果個感應器近住個槍機，基本上每一槍都探測到，但係呢隻鏡實在有D重。最後拆左MBUS上返之前個鏡試多次，又好似得得地。

得得地既意思大家睇睇片就會明：
https://streamable.com/036zri

上面呢條係普通自由訓練。大家可以見到打左7 槍，有6槍佢探測到，有一槍探測唔到。另一樣野合符常理就係佢探測唔到一陣，佢就會當係個感應器問題，所以會再必一次。好過有D 計時器。

但係一去到做重新裝填就感應非常非常差。唔知係我問題定乜。以下幾條片夾埋只係感應到一槍：
https://streamable.com/c0ov26
https://streamable.com/jtgyuh
https://streamable.com/n2rl0h
https://streamable.com/87vh8r


氣動長槍方面
頭先試玩時場主試槍. 佢手痕拎支佢岩岩整好既 TM MWS 黎試. 答案係無問題. 不過快速射擊就似乎感應唔太好. 唔好意思, 因為係人地玩, 我無拍片或影相.

[ 本帖最後由 derp 於 5-6-2021 01:20 編輯 ]

電動槍再試
頭先講到手槍同電動槍. 關於後者, 之前都講過係屋企試過一次用VFC KAC PDW. 為左確定真係唔得, 今日再拎PTW 試一次:



明顯地, PTW 比起一般電槍郁動幅度重細D, 即使用乾火設定開槍, 打左差唔多廿槍都係一槍都感應唔到. 似乎所有傳統電槍可以死心.

手拉空氣槍

另外, DAS GBLS 有個無電打空氣槍功能. 玩法類似以前TM 既手拉空氣槍. 要打一槍再手動上膛再打. 頭先手痕試過, 打左5, 6 槍. 亦都係一槍都感應唔到. 而GBLS 個手拉模式有D 似一般空氣槍 (即如VSR 10 類), 都係要將氣筒拉後儲氣, 靠扣機釋放能量. 同氣動槍擊發個動態唔同. 因此幾乎可以肯定如果想靠佢同空氣槍一齊去做射擊練習基本上都係用唔到.

手槍

正如之前所講, MANTIS X10 係可以裝上 KSC GLOCK 17 燈位. 但個問題就會變成一係唔可以裝手槍燈, 一係就係入唔到手槍套. MANTIS 自己有出俾佢加GLOCK 17/19/23 專用套. 但係普通LEVEL 1 膠腰套, 似乎特登為左個感應器而換一隻平時唔用既套唔係太符合訓練與作戰一樣既原則. 而MANTIS X10 買個陣包左一隻短魚骨, 底下有塊特制 3M 膠同埋包埋一塊酒精紙巾. 將彈夾底板抹乾淨, 然後就可以擺上彈夾底 (雖然就變成做唔到裝填練習).



槍套係道光年間既鹿牌6004.

而呢個感應器除左感應開槍前動作外, 電話APP 有個"槍套取槍分析", 可以話到俾射手聽從槍套取槍至開槍既動作是否一致. 做法係佢會必一聲, 射手取槍, 開一槍, 然後放返槍入套. 重覆:



上圖藍色係我選取個槍(即最後一槍, 第16 槍)既取槍路徑. 可見整體黎講取槍路徑唔太穩定, 亦都有個傾向係先將槍咀向左, 然後去到目標先向返中間. (唔知係咪6004 先天因為輕微指向射手腳內側既原因啦呢個. 可能要用另一隻槍套試試先知點解). 呢個練習可見應該對IPSC 玩家會好有用.

另外, 手槍亦都同樣有感應唔到既問題:


正如上圖第1 同第 6 槍. 灰色唔係因為我無取槍, 而係因為我開左槍佢感應唔到. 但係情況似乎無GBLS 咁明顯. 而上圖亦都將我取槍, 推槍, 扣機, 開槍, 開槍後跟進既時間比重寫出黎.

[ 本帖最後由 derp 於 5-6-2021 01:05 編輯 ]