親手修好三紅, 二紅(個個都做得到)
話說禽日買左隻蜘蛛俠3, 返到屋企諗住玩, 點知玩左三分鐘就花畫面 + 三紅. 部機係日版第一水, 以前都試過花畫面, 寄左去日本整玩到依家又出事. 唔信邪再試其他game, 又係幾分鐘後 hang 機, 今次變二紅. 之後用牙簽方法, 失敗, 毛巾方法, 失敗, 証明左部機唔係冷縮熱漲問題導致焊位接觸不良. 以自己多年砌電腦經驗, 花畫面唔係CPU過熱就係GPU過熱.
水貨機, 又過左保養, 點算? 上網四圍搵資料, 做晒功課之後決定左拆機自己搏一舖, 橫掂整都要成千銀, 最多衰左買黑魂版, 背水一戰.
於是搭車落老深買散熱膏, 買星形批(要有T8及T10), 返到屋企即刻開始仁心仁術. 拆機過程唔算複雜, 好多網頁都圖文並戊, 但最難拆既係個散熱器, 都要出力用細一字批撬起佢.
拆除CPU及GPU散熱器後, 嚇然發現原來的散熱膏真係乾晒, 難怪會過熱啦~~~(用一年就乾, 乜鬼野膏黎), 之後清理好CPU及GPU表面, 再塗上新散熱膏, 插電開機, 冇問題, 去 到 dashboard, 煲佢兩個字, 冇出二紅或三紅, 試下玩game, 入蜘蛛俠3, 好緊張, 今次竟然玩到一個鐘冇事, 証明已經成功左. 打呢段文既時間, 部360仲長開緊, 已經過左四個鐘,一舊水唔駛既價錢, 成功整好部機, YEAH!!!!
ps1. 如果大家係水,行貨360, 又過左保養, 又二紅三紅, 大家自己搏一舖la.
ps2.我覺得牙簽法治標唔治本, 我拆過塊板出黎睇, 焊位全部冇問題, 又冇爆 cap, 所以牙簽法幫我唔到.
牙簽, 毛巾法既原理係焗部機熱, 令到焊位發熱漲大連接壞左既部份.
熱到部機入面個溫度測量器習慣左高溫環境工作而不出紅燈繼續 run, 情況同超頻差唔多, 咁攪法最多只能夠俾你好彩回光反照幾日, 之後咪又係死.
[ 本帖最後由 bonzonie 於 8-5-2007 07:32 編輯 ]
"BREATHE..... Keeps you calm under stress.... "
