雖然「職業無分貴賤」，但一名港女卻在近日製作了一個「男性職業評分表」，為20多個行業評分，並作出評論。
港女把職業分為高、中、低級三個層次；高分的一組是企業管理、律師、機師、建築師、政治家、銀行家等賺錢能力頗高的職業，但她亦會「客觀地」批評部份職業的缺點，好像導演或演員的工作容易面對不少誘惑，或會戲假情真。
老師、西醫、中醫、護士和會計師等在列表中，被歸類為次一等的職業；而不幸被視為低級職業的分別是文員、IT、地產、廚師、作家和保險等；不過，低處未算低，店員、清潔、跟車、「粗重野」和地盤工人等，均被列入「唔會考慮」的一類。
網民不但批評這名港女膚淺，只是把男人當作成提款機、工人和陪伴自己的工具；又斥責她勢利，把職業分為不同的檔次，令人反感。
港女自製男人職業評分表
高級：(7-10分)
企業管理(老闆CEO等)/ 10分：當然係講穩定嘅公司而唔係細公司，私人公司人工一定最高，月入幾十萬唔出奇，甚至更高，一定唔洗為錢頭痕為錢煩，可以專心湊仔shopping都得。做得呢個位IQ一定好高，咩問題都可以解答到你，睇人又好準，呢種男人好有魅力。
律師/9分：人工高，香港律師唔算多，如果case打得好好易出名，到時更加高人工，而且學識高，見識廣，可以帶俾你唔同既人生，認識極多有錢佬，結婚後可以踏入上流社會生活。
機師/8分：周圍去唔同地方，帶俾你唔同文化經歷，每講一個故事都有一分浪漫 ，人工亦高，唯一缺點係日夜顛倒。
導演或演員/8分：你諗下，如果你男朋友/老公係李安、劉德華、劉青雲、郭富城咁，你會點？缺點係太多誘惑，結左婚都好易因為拍戲動真情。
建築師/7分：全香港都有佢設計既蹤跡，可能佢帶你行街係帶你去睇佢設計出黎既商場/樓宇，成就感高，人工亦非常不錯。
政治家/7分：有權力嘅男人認真既時候好man，可能香港每一個決定都關佢事，自豪感最高，做到上去人工都好高，不過缺點就好多，通常城府好深，你永遠唔知佢諗咩，同埋政見一唔同就死。
銀行家/7分：一個字，錢，唔需要令你煩錢呢樣野，已經好高分，但比起其他高級職業略遜一籌。
中級：(4-6分)
老師/6分：學識理應最高，教育亦係一件好偉大既事，而且第時生仔女仲可以親自教，人工又ok 。
西醫或中醫/6分：醫生人工高，多數都溫柔，而且學識廣，我成日肚痛，身體有咩問題都可以叫佢幫手睇下，仲可以即刻開藥俾我食，雖然要輪班。
護士/5分：男人做護士，可能我保守，聽上去感覺有d差，而且要輪班，但人工算ok。
政府工(警察消防救護等)/ 5分：人工雖好，有政府福利，前途穩定，但醜聞太多，聲譽好差。
會計師/5分：big4 人工都好工下，不過好辛苦，maybe 40歲唔夠就甩晒頭髮，同埋冇時間陪自己。
銷售員/4分：人工好飄忽，不過做得sales應該幾靚仔，而且口才一定好，唔驚冇人哄。
創作(畫圖設計等) / 4分：做得呢啲多數幾有心思，雖然人工唔高，但有時會弄小禮物或畫圖俾自己，好浪漫。
廣告或拍片/4分：人工幾低，又會成日OT，但鬼主意好多，唔會悶親自己，拍拖一定好開心，同埋一定識影相，唔會影到自己又肥又矮。
低級：(1-3分)
髮型師或化妝師/3分：多數係gay，唔係gay都會乸乸地，我最憎，但可以自己慳番好多錢同功夫，出名既話人工亦好高。
揸車(巴士、的士等)/ 2分：沉悶工作，多數學歷低 ，只有一種技能 ，但人工還算穩定，唔會咁易俾人取代。
作家或靠支筆搵食/2分：人工飄忽過sales，同埋今時今日好少人仲睇小說果d野，不如睇戲好過，但多數浪漫，應該識哄女仔。
Lab/2分：人工唔知，但應該都ok？不過接觸化學藥物多，遲早身體有事，可能我岩岩40歲你就已經去左。
廚師/2分：除左做大廚外，普通廚師/廚房佬冇咩吸引，最多番屋企自己唔洗煮飯食。
IT/1分：人工雖高，but多數係樣衰毒男，開口埋口剩係講電腦，零情趣。
文員/1分：冇前途，呢種人多數意志力弱，冇野心 ，冇上進心，人工又低。
地產/1分： 雖然人工可能好高，但唔好以為著西裝就係專業人士，成日睇報紙見到啲地產佬打架，又跪係到求人買，覺得好醜。
保險/1分：好過地產，但感覺上有d呃人成份，同埋d保險佬成日放上facebook哂命好核突。
此外，店員、清潔、跟車、粗重野、冷氣水電地盤等等，均屬0分，「唔會考慮」。
吾怪得之揾吾到食
