小弟上年開始砌支生化版M9手槍, 買左馬記M9A1同NOVA Elite 上下身, CNC訂造左專用款後準星, 買埋氚管齊晒料。
小弟未玩過laser深刻, 睇到某間有Laser深刻+Cerakote服務既樓上鋪既廣告+FB後覺得手工OK,
諗住一條龍做深刻+Cerakote整靚仔套金身, 咁就上左去放低套金身。
幾日後店員A用Whatsapp通知我artwork size同參考圖片有出入,咁我叫佢幫手縮細,
之後send左一張相比我睇, 係右面SLIDE既laser深刻效果。
我見D字黑色就問: 做完laser會變黑嗎?定係上左黑油?
佢答話: 深刻通常會黑左, 應該係燶左。
咁過多十零日店員A聯絡我有貨攞, 咁我上去攞貨時見到D字好多火山窿。
我問點解咁核突咁多窿既?
店員A就話: 條SLIDE既料好差, 有沙窿。
我好驚訝地話: 唔係嘛, NOVA SLIDE黎架喎, 點會咁差呀?
店員A: 係呀, NOVA D料係咁差。
店員B之後走出黎又話條SLIDE用料好差。
咁我以為自己唔好彩, 買到條垃圾SLIDE, 咁都無得怨...
只好收貨比左$500LASER費+$1300 CERAKOTE費用共$1800。
小弟將條SLIDE比左朋友睇, 佢地睇完話NOVA唔會咁差喎。
咁我就whatsapp 問番店員A: Nova slide應該唔會咁差呱? 有D字有窿有D字無好礙眼。
A答: Nova未必係靚料架, 嗰時我地有套kimber都係nova，啲料一樣咁差, 因為唔係醇cnc, 所以物料入面有氣泡
佢又話可以吻灰, 問我試唔試下, 如果搞完都係唔靚就吻平做番無marking。
我睇完都半信半疑, 咁搞咪姐係''無啦啦整達啦''?
出面咁多師兄攞我們原裝身去做深刻都唔見有咁差既情況。
朋友睇左後建議我攞去比另一間laser marking公司睇下。
於是過幾日攞左上去比另一間公司睇。
佢地睇左就話根本係做錯晒, 直頭過火燒壞d鋁先會咁出現火山窿, 條slide已經報廢。
佢地問我試唔試下比佢地做測試, 睇睇正常laser深刻既效果。
我都知laser無得番轉頭, 條slide已經報銷救唔番, 就比佢地試下。
做係火山窿marking隔離及其他位置, 睇下係咪會有氣泡。
點知做出黎比之前既火山窿marking更深更平滑而且唔會燶/變黑。
咁我先知原來唔關Nova 用料事, 係laser人為過失所致。
我第日就whatsapp店員A問過究竟。
A話: 唔通物料唔同火數過大
A重問: 你條滑架重有無用? 如果無用俾我研究下可唔可以吻灰填平再用細火數再做
我當然唔比啦, 問佢: 點解人地一試就做到無窿又無燶?
佢話: 真係唔識答你, 就等於我拎件廢料唔得試到得一樣
又話:你拎條slide比人睇住黎做,一定用保守方法去做, 我地每個客既CNC slide都係同一做法
我睇完就覺得佢重係係到推卸責任落條nova slide到, 又話唔係靚料有氣泡又話唔係CNC。
我又問佢點解當時marking做出火山窿唔通知我, 直接攞去做cerakote?
佢話: 做完第一個marking我有影相俾你，不過係我以為你睇到，所以無問清楚
我:你whatsapp張相比我睇，像素不高，又唔係大特寫影d刻字火山窿，我根本睇唔到marking有問題，你又無用文字提及，咁我點會知。我覺得你咁只係想暪天過海。
我之後明確同佢講條slide係比你地做衰既, 無論佢賴nova既料點差,條slide都係佢地做衰而報廢。
加上做衰左一面唔通知我, 走去做埋另一面衰埋都唔通知我, 再走去做cerakote。
做完交貨又賴用料差有氣泡, 其他公司測試到 E個明顯唔係事實, 覺得只係佢地交貨時作個理由。
我要求佢地退回laser+cerakote費用$1800同條slide$1400。
但A賴皮話: 你既所謂賠償, 其他公司只會賠償返嗰個JOB既價錢
又叫我去問其他公司點賠法。 之後就交左比店員B 同我傾。
店員B: "我地係用一向處理鋁料深刻方式去處理你件料 得到確認之後再交去Cerakote處理
但最後收貨後發現刻字表面效果未合你要求 當中可能大家出現溝通誤會
加上每個客人對刻字表面要求都唔同 有喜歡平滑或深紋 我地都唔會多比意見
但如果客人當時能夠比到指引我地一定會盡力配合或者補救
但事隔一段時間 補救有一定難度 但我地都會盡力處理 希望做到應該要做 你又得到想要效果"
睇完我唔明點解一向處理鋁料深刻方式可以咁差。
又唔明佢地幾時有同我確認過可以去做cerakote。
更唔明我幾時要求過火山窿咁既效果。
最唔明邊個客會咁重口味要D一達有火山窿一達又無既marking, 同佢FB既相咁大出入。
B又提出4種補救方案
1）重複刻字處理再cerakote 刻字會比之前深、可能會有疊影
<<<咪重衰
2）金屬銻灰補平面再cerakote處理(另退500刻字加工費用) <
<<當無事發生過?? 之前elite marking 都無埋, 姐係''無啦啦整達啦''
3）再來另一新料重新再處理一次 （表面平滑度可高於你圖中另一公司"S"刻字示範）
<<<已經斷晒貨啦, 買得番的話重比你搞呀? 傻的嗎??
4）退回刻字加工費用
<<<想咁就算??
我全部唔接受!
我同佢講我投資咁多搞支槍, 宜家條slide已經無晒貨，唔知重會唔會出，買唔番的話成個project都搞唔成，我所投資既心機金錢都會白費 。
B答: 我都知道你款slide可能唔再出 因為我都有想過買過一條全新再做好比你 但我暫時未揾到 或者你可以再來第二樣嘢比我地再做
我就話: 你係咁有心肯出錢買過條新slide做過比我，點解你唔直接賠錢？
Laser刻字一做無回頭，你自己好清楚，你地laser做衰左，破壞左條slide就等於報廢，唔係你話補灰修補到就等於無事發生過，我亦無必要接受你 提出既補灰修補，你地應該就你地的失誤作出賠償，什麼比其他公司處理過所以不能退款只係無賴的藉口，條slide確確實實係你地做衰的。再加上你地做衰左 laser唔明確通知我，我再清楚重申一次，係完全無清楚提及過出現任何laser問題，依個完全唔係溝通的誤會，而明顯係隱瞞，你地再先斬後奏上 cerakote,交貨時又話slide材料沙窿問題，而我發現根本就唔關材料事，其他公司做完laser睇到slide裡面毫無沙窿，同你地交貨時聲稱 的完全唔同，成單交易你地隱瞞問題再用不實既原因要我收貨，事後咁耐以來你地一直推卸責任，揾藉口唔賠錢，甚至一聲sorry都無講過，我對你地服務既專業性同責任感都徹底失望，我唔會接受你地既修補方案，亦唔會再幫襯，我最後一次重申我既要求，係退回laser$500+cerakote$1300+賠償slide$1400合共$3200
B: 有心做過件新比你同直接賠比你係兩回事
另外就算我地賠條slide比你 咁條slide即係我地啦 咁你應該要交回比我地
但而家條slide已經唔係我地交比你果時個樣 我都冇辦法再補救 原價賠償好似唔係咁合理
我: 我唔比其他公司睇過同做laser測試，都唔知原來我比人揾笨，你重想揾借口唔賠足？你地肯退款賠錢$3200的話,條slide可以歸你地
B: 我諗只係你個人認為比人揾笨 當你收貨幾日後再話我同事知原來唔合你要求 我同事都有叫你交回我地再處理 只係你話唔需要 我地冇要求你比其他公司作研究
以上係我同依間''火山窿''交涉左近2個月既經歷, 我一直都諗住私下兩方調解息事寧人,
但佢地一直推卸責任, 2個月後既宜家佢地都係無意向我作出任何賠償及一聲道歉。
我覺得佢地好無賴, 隱瞞, 作故仔, 推卸責任, 我覺得佢地誠信好有問題, 以後都唔會幫襯佢地任何產品&服務!
[
本帖最後由 ayaka 於 2-7-2015 18:41 編輯 ]
