而這篇文章，頭一段看似徧頗。但文章中論述科技人才，和輕輕帶過的「人民幣」Topic則比較中肯。
https://hk.finance.appledaily.co ... e/20180423/58107170
【名家搶先睇】2019大爭之世（五）（Mr.Tregunter）
中國今日之境地同80年代日本相似，但有一樣不能比，就係當時made in Japan已風行全世界，而中國冇一樣嘢夠膽話自己由重頭到腳做好。由始至終，各種中國強大的宣傳只有量的概念，無質的概念。當宣傳自己做得好時，理據卻係屏幕用韓國、鏡頭用德國、晶片用美國……就好似樓盤廣告都一定要碧眼金髮做主角先夠照。
科技研發需要人材，時間累積，以及一點運氣。想快，即係縮短時間累積，人材同運氣便好重要。只要出一個愛恩斯坦，物理學境界立即跨越幾代，技術也可以突破。可是回歸一個老套問題，點解中國土壤培養唔到橫空出世嘅科技人材？
舉國上下不停灌輸弱智邏輯，因為共產黨過去信奉列寧的布爾什維克模式，即係民主集中制，有幾條友商量都可以掛名民主啦。久而久之中國有兩套知識，平民學習一套知識，權貴學習另一套知識。真相，平民唔需要知道，冇資格知道。睇下近年香港教育局就明白，花大量精力死搞爛搞旁枝末梢，從小引導思想在固定框架內，稍有反思即政治不正確。高官硬撐教育制度無可辯駁，仔女則有咁快得咁快送去美國。
人材同運氣相輔相成，要出一個人物，需要運氣，但教育做得好，出現天縱英才的概率會提高。教育看似長遠投資，對現下只想走捷徑的中國嚟講太慢，但只要博中一次即刻追幾代，教育其實先係捷徑。中國如果真係想強大，最終需要解放民智。現屆政府強調中國要有底氣和自信，底氣同自信唔係睇你有幾多錢，而係睇你夠唔夠薑讓社會處於反思與辯證嘅環境下成長。
人民幣同國產手機一樣，當國產手機冇咗韓國屏幕、德國鏡頭、美國晶片，國產手機嘅價值係邊到？當人民幣背後冇咗外匯儲備嘅美金含量，人民幣國際上的價值，即係匯價，應該係甚麼水平？舊文《中國破局之斲輪老手》提過，德國馬克同日圓之所以能在國際貨幣體系內佔一席位，金融上經過萊茵資本主義及黑字還流，貿易上則經過made in Germany / Japan洗禮。「中國製造2025」計劃，即希望中國2025年達到made in China階段，此亦點解美國要呢一刻出手。
貿易戰會去到乜嘢地步？美國有三招：1917年《與敵對國家貿易法案》、1974年《貿易法》第122條、1977年《國際緊急經濟權力法案》，就睇呢三招會唔會出。（待續）
