RCOOH

次口徑長桿穿甲彈目前既穿甲能力仍然可以向上，美軍120炮M829一路改，彈身就越黎越長同重。

無印M829長桿彈長62.7cm，實際口徑26mm；A2長78cm重9kg；A3係大約80cm重10kg；A4太新數據不詳，但已知資料係彈尖同尾翼改得更流線型，彈托由4改3兼由鋁轉複合材料減低能量損失提高初速。

日後如果美軍轉埋ETCG（電熱化學炮），穿甲彈初速同穿透力仲可以進一步提高，因為以目前技術，坦克炮彈既火藥都係唔夠時間燒盡，有相當部份噴出炮管變成超大火球......ETCG可以再加強火藥既利用率囉。況且，美軍用DU合金唔係一味要佢既硬度，而係穿甲後對車內人員既第二次殺傷力，鎢彈穿左就穿左，鈾彈撞擊時產生既粉末會自動著火，根本就係AP-I彈。

BTW，當大家冶金科技相當時，口徑大左火藥量多左，可以玩既野自然就多左。中國125炮始終多左5mm可以玩，如果冷戰仲未結束，可能而家已經全面140主炮加自動裝彈機，預算穿甲能力係任何MBT一發歸西....

[ 本帖最後由 RCOOH 於 2-9-2018 21:49 編輯 ]

RCOOH

坦克無用論年年有人講，但連打遍全球既美軍，或者逆境波神以色列都唔buy。

戰場上最重要既永遠係近距離直射火力，現代或未來戰爭大概唔會再見大規模師級野外互片，更多係城市內既小部隊混戰，空軍會變成以CAS角色為主，但，除非冒住比人啡低既風險長時間係戰圈外圍盤旋，地面一叫就送順豐，否則地面叫緊help先緊急起飛或者調動附近CAP班次執行CAS，隨時就去唔切，地面死清。

空中攻擊高風險亦高成本，係環境太亂而且友軍確實位置不詳時，投彈隨時炸唔到敵人炸左自己友，係天空望落黎係差幾皮架，絕對唔係萬能。

車輛先有能力全程跟住部隊發起攻擊並且更加貼近步兵既視野，MBT係步兵能夠得到最近最快最硬既支援，一炮即時解決問題既120HEAT好過人死哂先到既500磅JDAM。況且MBT見光死係建立係中東果班訓練不足既民兵，先進國家都講求步戰協同，由步兵打小組滲透清除反戰車火力或者提前警告戰車組員，掩護戰車繼續推進加掃蕩步兵冇符既陣地。中東班人係就咁兩三架坦克篤出去，冇步兵幫手，側門後庭任砌，仲唔比RPG洗頭咩？

而且標槍飛彈唔係萬能，第一最低射程太遠，就算設定為直射模式都要最少飛到20米高度再曲墜，攻頂模式要飛到最少50米高度，由發射到打中既最低橫向行程要超過100米，對100米內既目標係冇符既。係城市範圍，要有一個100米x20米空中完全無障礙物既空間，談何容易？但傳統直射AT只需要30米距離保險就可以引爆，識改彈頭改短距離仲可以使出自爆式近射。第二係標槍太貴又太重，火控系統極度耗電又需要預先冷卻，帶士啤電都帶死人，標槍打一飛既重量換成傳統直射AT可以帶兩三支，再輕既66火箭可以帶半打以上....

[ 本帖最後由 RCOOH 於 2-9-2018 22:42 編輯 ]

RCOOH

如果係ERA，高爆反應裝甲，係用鈍感炸藥，普通火燒同細口徑鎗炮唔會夠力觸發到，主炮級火力直接貫穿同碎片既破壞力差太遠啦，ERA碎片打到ERA R痕一樣。

至於ADS，主動防禦系統係相當於幾支霰彈鎗將飛過黎既野打歪或打爆，APFSDS一旦中彈，彈尖變形或者中間屈到，穿甲能力會暴降9成，HEAT被提前引爆就變成爛鬼燒焊鎗。

戰車同戰車之間必須要保持間距，坦克大決戰果種高密度衝擊，車與車之間都要保持最少五六米距離，唔L係台灣兩光演習果種坦克排鎗，太近，剩係APFSDS發射之後噴出黎既彈托已經有可能打爛MBT既儀器或者直接打爆汗馬車。

[ 本帖最後由 RCOOH 於 3-9-2018 13:20 編輯 ]