設計精密既鎗如F2000比較揀飲擇食，高膛壓既5.7mm嚴禁重新裝彈，塑膠下身手鎗以招財貓手射會jam鎗，種種問題只有真落場先知。
Lab test 同field test一直都係兩回事，泥試用nato mud，杰度同未蒸既蘿蔔糕差不多，真泥有沙石，質地冇咁杰，拋殼口入兩pat即時收工。
台灣PPQM2用槓桿退匣，鬼知班台灣警察係咪太暴力？塑膠係橫向受力方面始終唔及金屬，號稱8號吹唔斷既德國遮王euroshirm都比我無情力啪斷左。
Lab test人唔會特登做唔安全行為，但Field人會，甚至係現實無可奈何會發生，例如P320重雞版跌到滑架尾會走火，Lab人唔會特登亂掉去危害安全，同時，就算所謂既跌落測試都係可以取巧。
1.5米防跌測試係以6個不同角度從1.5米各跌一次，跌落實驗室既指定硬度板上面，但邊6個角度？佢自己揀。實際落場跌到冇試或者明知有鬼唔試既地方，或者跌到比實驗條件硬既地面，就即時PK。
冇人搞事就永遠唔會知一樣野既暗病，而且同一件貨係唔同地方都可以表現唔同。歐洲製精密步鎗鎗管可以唔鍍鉻，以免鍍層唔平影響準度，但黎到亞洲唔鍍就即時生鏽。有時d野唔係話白唔白老鼠，而係測試與使用者思維唔同，處境唔同，導致有問題發生。
最重要係解決問題，唔係率先解決製造問題既人。
