冇人願做交通警
呢排豬流感，八方減少夜蒲，返屋企煲無記重播嘅《陀槍師姐 III》。劇中師姐衞英姿勁鍾意揸鐵馬，但現實中，警隊卻冇幾多個衞英姿，東九龍總區最近就有 20個夥計因為被迫調去交通部而嘮嘈，更形容好似被強姦咁嚴重。
工作辛苦乏升職機會
據講，呢 20個警員早前收到上級電話，問佢哋願唔願意調去交通部， 20個都 say no，但係都要調。有人喺網上以「強姦犯」為題，形容上頭咁做「得到受害人嘅身得唔到佢嘅心」，仲想透過工會搵葉劉申訴。
本身亦駐守東九交通嘅警務督察協會主席廖潔明稱，由於交通部工作較辛苦，大熱天時着住套戰衣騎鐵馬暴曬，份工唔易做，所以長期缺人，執法抄牌又容易被市民投訴，加上升職機會麻麻，因此向來冇人願做，為解決人手問題，新界南同港島區都要強制調人入交通部，東九龍係第一次，加上牽涉人數眾多，同僚先有咁大反應。
廖 Sir話警務人員入警隊時宣誓過，就算個崗位唔係自己志願都要做，況且交通警做夠三年可以調走，亦唔會強迫考電單車牌，希望大家理解。
