膠到無朋友
我同老公結婚2年
大約3個月前ge一晚,我心血來潮
問佢 你覺得你生命之中最重要ge女人係我定你老母?
(其實之前我一直都有問佢l哩條問題,不過佢都係支吾其辭)
係我再三逼問之下,佢居然咁講囉
"老婆,我唔想呃你,如果你係都要逼我簡,我生命中最重要ge女人會係我啊媽
因為冇佢就冇我,佢好辛苦咁養大我...(下刪d關於佢細個d廢話,你細個關我乜x事姐)啊媽只得一個,係冇得簡,我唔想冇左佢先去珍惜
但係你對我黎講都係好重要ga!你係我 男女愛情上唯一ge女人,我只會將我的愛情俾你"
聽完我真係好嬲囉!我將我的下半世幸福交托俾你,我竟然唔係你生命中最重要ge女人?!佢當我係乜野啊!
之後我就鬧佢負心...同佢嘈左起黎
老公又話"咁我啊媽百年歸老之後,我最重要ge女人咪又係你!你呷哩d醋黎做乜姐?!我同你仲有幾十年流流長"
聽完我真係嬲到爆,佢根本就唔明問題所在!仲有,我忡要等你老母死左先可以做最重要ge女人?你老母一日唔死我咪一日做唔到?佢根本唔係真心愛我啦!
於是我一巴打落去..我地不歡而散..我唔想同佢訓,就趕左佢去隔離房訓囉
個晚我諗左好多野,如果我唔係緊要過你啊媽,你做乜娶我翻黎做老婆?
之後第二朝早佢又死狗黎 求我原諒佢~
我後尾都讓左好大步,2個禮拜之後俾佢同我訓埋同一間房
我覺得佢真係好虛偽,講ge野都好假
結婚個時,同我講可以唔使做,係屋企做個平民少奶奶
咁我信啦,以為有個工人使下,點知佢話由小到大都唔慣有生陌人出入,我同佢一人一半家務..
佢又呃我啦,叫我做少奶奶喔,咪又要係屋企做家務,我鬧完佢之後,佢先認衰,淨係要我負責買送,其餘佢負責翻咋
我叫佢買層貴少少 ge樓住,佢又話負擔唔到,少奶奶唔係好幸福ga咩?!
咩又話俾哂的資產,收入我管,俾我話哂事
其實佢咪又想用錢塞住我把口,佢當我雞啊?!
依家我好憎見到佢,我已經3個月唔俾佢掂我啦,唔愛我仲掂我?
每晚放工即刻翻屋企,星期六,日,放假又屈係屋企,話陪我喔.真係眼冤
係咁撩我講野,"使唔使陪你翻外家啊?", "不如陪我翻daddy,媽咪到囉?"etc
煩到爆
成日對住我四萬咁口,真係好想再兜多佢一巴
我依家好少聽佢電話,好少應佢
各位,你地話我老公係咪好無良心啊...咁對我
我真係好唔開心,你地安慰下我啦
---------------------------------------------------------------------------------------------------------------
今朝8點幾,奶奶打黎叫我起身飲茶
真係好痴線..咁早打黎叫醒人就係為左同佢飲茶
上個月咪同你飲左囉
阻住人地訓覺,人地平時都係準時12點幾起身ga ma...眼訓到死
拒絕又拒絕唔到wor
去到酒樓搵佢,一見到佢真係無名火起
諗到老公緊佢多過緊我,條氣就好唔順,唔甘心
講第一句野就黎串我
"乜你咁遲ga,打極你電話又唔聽,我幾驚你出事啊..."一論嘴咁講
佢真係老人痴呆,出門唔使裝扮ga!我扮靚d都等你有面d啦
你咁係想我出事啦,阻住你個裙腳仔翻去天淪之樂
唔聽你電話就知定唔好打黎啦!懵盛盛~
假好心,d戲我一年做幾十次啦,以為我唔知咁
好啦,終於黎到戲肉啦,個件耆英露出佢真面目啦
傾傾下計無啦啦抱住我隻手,話咩
"其實兩公婆argue成日都有ga啦,嗌完d感情咪會增進囉,唔好太過火就得啦,傷感情,要互相忍讓,對大家好d,幾廿年好易過ga咋...."
我聽完真係好想鬧佢
我依家對你個仔唔好咩!
我成日都忍你個仔啦!
問題係你個仔唔當我係老婆看待啊嘛!
佢care你多過我啊,你開心啦...係度示威!
實係你個寶貝仔同你呻啦!
我同佢嘈,我都冇同自己屋企人呻啦,不知所謂!
仲有啊,我嫁俾你個仔,唔係嫁俾你啊..
拉住我隻手都唔知做乜,又唔係同你熟...好想think甩佢
後尾我都吞左啖氣,淨係黑起塊面同佢應對
好彩我咁做咋,如果唔係佢都唔知依依哦哦到幾時
我愈黎愈嬲我老公..
嗌交係我地2個ge事,做乜同你老母呻
佢老母真係佢生命中最重要ge女人囉!
佢今晚翻到黎,我一定會問清楚佢咁做算點囉
必要時打醒佢!
http://www.discuss.com.hk/viewthread.php?tid=9988331
