追蹤憤青深宵七小時 抗爭餘興不夜天
呢期最熱門名詞是「八十後」，好多人將上周五立法會外搞抗爭嘉年華的一眾反叛青年統稱為「八十後」，其實有啲搞錯，班友裏面又分成幾批人，行為模式與玩法並非一樣，若要深入了解，必須近距離觀察。
在示威人群之中，有二十幾人熟口熟面，原來元旦大遊行留後衝擊中聯辦的一役，他們就站在前排又推又撞又尖叫，表現最激。今次反高鐵，他們又在網上吹雞聚集立法會外，準備再玩鋪勁。本刊調查組記者（時事狗仔隊）出於好奇心，當晚以他們為目標，深夜貼身追蹤了七個鐘，過程所見都幾有趣。
財委會散會是晚上十點幾，但班友興致未盡，唔想個party咁早完，於是繼續留在現場搵嘢玩。是晚與陳巧文一齊的二十幾人，包括浸大學生阿豪（因愛玩結他故亦叫「結他仔」）、教院學生阿詩、理大副學士生阿樂、HKU SPACE學生阿Wa及旅行社職員Jaco等，到接近零時忽然轉移到立法會近遮打道的另一邊，當時差人仍然架起鐵馬留守，班友一字排開同差人對峙，篤口篤鼻做出無聊動作，並猛彈結他跳吓跳吓，幾次想找缺口突破防線，但差人不動如山，班友擾攘了二十分鐘，見再冇乜好玩，便返回原來的集合區域。
此時已過了午夜十二時，他們愈玩愈high，全無倦意，繼續在集會內狂歌勁舞，享受示威後的餘興，差不多又玩了成粒鐘。到一點左右，眾人終於興盡散檔，但年輕人邊會咁早瞓吖，於是分頭過海去花園街繼續蒲。
此時花園街仍熱鬧如白晝，班友搞咗成日，肚仔已餓，齊齊走入通宵營業的標記樂園醫肚，二十幾人佔用四張大枱，嘻嘻哈哈並攞出副啤牌玩「鬥地主」，不知幾高興。
到凌晨三時，班友飽餐一頓十分滿足，但仍然鳥未倦不想還，行到豉油街附近的公園仔，即興入內席地而坐談天說地，回味吓包圍立法會之抗爭滋味，傾傾吓又過了成粒鐘。
此時已過四點，有人頂唔住眼瞓話要走，大夥終於散隊，但個別成員做慣夜鬼，見未到天光，分批繼續在旺角周街逛，其中「結他仔」阿豪同教院學生阿詩似乎已結成「革命鴛侶」，孖晒頭在太子道一帶徘徊，又入「七仔」攞幾份報紙睇示威報道（只睇不買，慳番六蚊），兩人漫步黑夜旺角街頭，在寒風中坐在行人路邊依偎，十分浪漫。
此時東方漸亮，阿婆阿伯已出來晨運，兩人終於興盡說拜拜。這晚夜由激情到浪漫共十幾小時，憤青們過足了癮，分頭回家瞓大覺，下周五再嚟過。
線人話，呢批憤青全部透過網上聯繫，同政黨冇乜關係，甚至對班政黨大佬好睇唔順眼，例如阿Wa曾經入過社民連，但大半年就退出，因為覺得大佬們有私利動機，跟唔過，不如我行我素自由行動。所以他們在過往行動絕不受政黨指揮，自己鍾意點搞就點搞，連差佬都好難捉摸。
至於鼓動菜園村村民出來鬥爭的本土行動成員，以保育人士為主，與上述的憤青是另一班人，他們思想雖激進，但行動就溫和好多，只是搞「公民抗命」，不會郁手郁腳粗暴衝擊。下星期如果財委會通過撥款，估計他們亦不會爆出激烈行動，反而網民憤青玩啲乜就要提防。
轉自東週刋！
http://www.eastweek.com.hk/index ... amp;article_id=5034
