本帖純粹分享一下鄙人既純萌新低智小型車禍現場，望各路大佬見到有錯漏不要原地恥笑同鞭打
咁話說小弟係日前入手左支marui既次世代 hk416，因為見外型靚仔，又比普通aeg有操作性同feel，而且發現vfc hk416既價錢同我買 marui次世既又唔係差好。(落街睇都要好似三千頭) 咁源於小弟自從自己新手砌機去到可以幫人砌後就開始對自己落手落腳組裝野有左唔少傾向。所以小弟就決定自己換下槍既零件，咁係買件之前亦都有上網做下資料搜集（但坦白講唔多，google search氣槍改裝其實冇咩文，片亦都得些少）
咁睇完之後決定換條彈弓就算，但有見於dave大既分享（少數詳盡又係中文）發現拍頭有可能比較難拆，感覺好似有啲睇運氣，不太有利於鄙人呢位土生土長，非洲到不能再非洲既非洲人。就決定索性換埋laylax天梯同拍頭，跟住見到其實買埋 laylax尾頂埋單都只係五舊（拍天尾）諗起反正都要拆槍，就把心一橫索性一次過換哂。（要換部件總計：拍頭、天梯、尾頂、自己修剪剪剩23圈半既sp100彈弓）
咁拆就當然冇咩問題啦，始終拆既片都有唔少（雖然無一例外都係鬼佬拍），但組裝就。。。淨係揾到一條外國片，幾詳盡但係拍攝角度有啲位影唔到，而且佢加左好多額外改裝野，搞到成條片長個幾兩個鐘
，要飛黎飛去（但就好易miss左重點）
但砌返哂之後試射就發現有問題，射左一發之後發現bolt片返唔到原位，再扣雞就聽到摩打有類似噠達聲，咁小弟就又再拆槍爆開波箱黎睇見天梯無法復位，但都唔係好覺有邊忽錯左，無奈之下又碌返條片重新跟佢由頭裝過，但結果當然忠實地一樣
咁係又再失敗多一兩次，搞左兩三日，成手油到可以炒飯、桌上紙巾多到以為大戰三百回合同成日扭尾通比電線阻住煩不勝煩，決定放棄閉門造車轉而向各路大神求救。咁有幸得dave大的指點同隔空相助終於成功獲救。
咁解決方法係換回原裝尾頂同將尾通扭剩6-7圈。事後檢討係如果有使用補品和換彈弓的情況下可能要自我調整。（特別係次世代）以鄙人情況為例，本身剪後sp彈比原裝略長，拍頭不知，而layax尾頂雖然總長度一樣，但實際上掂住彈弓的位置比原裝短，因而空間會更少。（下圖中左為原右為laylax）尾通大牙要再預留更多圈數，其實組裝片中有提及，惟小弟飛來飛去又天生眼大所以miss了。其中一個新手錯誤係即使係補品係專用，多指只符合size，要再額外調位（加上彈弓非原裝）
有鑑於網上實際可參考資料頗少，唔似砌機咁片文皆有（中文！！），詳盡至極足以解決各種疑難雜症。咁希望能以小弟的微薄之力略微補充一下資料庫，雖然對各熟手大神們應該純粹智商稅，但難說會完全沒有新手遇上同樣問題，令不想冒找街店的人改的風險又想減少自己改的風險的新手去自己動手。（不停行槍街時聽到不少新人買槍多找店改而越少新手自改）
更新：事隔一天又決定將 laylax尾頂裝上，已證實留6圈大牙仍是安全
改槍文章：
http://dgworksivan.blog.fc2.com/blog-entry-18.html
外國組裝片：
https://youtu.be/4zxRGw3b_C8
Dave大改次世416 post：
http://www.wargamehk.com/cgf/viewthread.php?tid=184375
[
本帖最後由 jwww 於 6-6-2023 02:39 編輯 ]
