b.jam

本來琴晚同前女友及中學同學係我屋企打完邊爐，見番一班舊同學的心情好開心，
但今朝一早訓醒就收到我大嫂打黎既電話，話我媽咪同我爸爸係坪石個頭炒車出事，架車翻轉左。
我聽完電話，因為我住得最近聯合醫院，所以我即刻飛過去，
去到醫院，我媽咪仲架白車仲未到，等左陣，佢被送入急証室，
因為佢無身份証跟身，所以我要去認左人先，
我見到佢既時候已經昏迷，救護員話佢上白車時仲眼仔錄錄，未知點解去到醫院會無晒反應，
因為我爸爸仲係車禍現場，我大哥大嫂就係元朗出緊黎，我二哥就係將軍澳過緊醫院，

所以頭一小時只得我一個係急証室門口等，

無耐就照xray,之後就掃描。。。
開頭我都扮無野，因為醫生同警察同我講話無事。。。
點知有個醫生無耐就同我講，屋企人幾時到，就媽咪既情況轉壞，屋企人黎到就見一見佢，
我聽到呢度，我就開始流眼淚。。
到一個鐘頭後所有家人都到齊，個醫生就出黎話，開頭入院媽咪唔醒，手腳唔識郁，照過晒內臟無事，懷疑係條頸出事。

之後送左上房，我一個人跟左上去先，係電梯入面又要扮堅強，
之後我唔知可以打比誰，我選擇左打比前女友，因為我媽咪以前好錫佢，點知佢同我講''哦，你有咩事再打黎''

我收線後，有個朋友打黎找我，我講左媽咪件事比佢知，收線後，好多朋友都sms我。。
我覺得，點解我個ex可以對我唔好，但居然連我媽咪都咁對待呢？

anyway,最後我媽咪都醒番，但就左腳無反應，要等明天詳細報告。

b.jam

係醫院個時，我真係好驚媽咪會就咁走左，我屋企最細，所以我最痴媽咪，無類咩都會同佢講，仲會同佢一齊煮飯，
又會一齊講心事。
媽咪本身隻腳已經唔太好，所以我知道如果傷左頸部，手尾會好長，
家中兩位兄長都大我十年，雖然我已經27....但我都忍唔住係急証室門口痛哭，但屋企人睇唔到。
因為唔想佢地擔心。

b.jam

thx all!
其實醫院而家係咪只係6-8先可以探病，偷雞得唔得。

b.jam

多謝各位。
今朝回完個post就收到醫院打電話比我，話我媽咪成晚無訓，叫我地家人可以上去倍佢，
我就一直倍到剛才探病時間先走，等其他家人可以探佢。
今日見到佢，我心都痛埋。
只係倍佢傾下計，按摩下隻腳。
原來報紙都有報道呢件事呀。