以下分享我親哥哥的經歷~
我哥哥中五畢業，73年當差，86年已經當SIP，期間已qualify一個degree，到2000年已持有3個degree2個master，02年提早退休交位。記得98年當時我嚮美國，同哥哥傾計時，當時佢話佢2日人工等於我細妹一個月收入，當時細妹初初出黎做野人工大約6-7k。
果時，我估佢保守都有70k-80k一個月，
咪以為佢天生書精，一世書虫~ 佢當差時都幾活躍，今年二月佢返左黎，
我同佢傾過，佢承認埋堆衰野係有，
不過佢竟然話自己冇近墨者黑~ 反而話俾我知因為唔想俾人利用，所以鬼頭上司時代開始佢都冇埋堆，佢話眼見當時身邊好多人表面好似俾人睇~俾人賞識，實際係俾人利用，擋刀咩飛，輕則革扯，革扯左就咩都冇。
所以當時成日哩個環頭走去另一個環頭，一唔妥起火就調，不過我相信佢另一方面佢人緣好再加實力，才有位走，有得選擇。
佢到今時今日都成日講：總之，唔做羞人唔做好人唔做衰人都唔駛跟人，跟人去死，你去呀?!
我哥哥都曾經試過俾人屈，77年，上海街一唐樓天台發生命案，兩個pc，一個士沙，一個總督察，一齊口供話當時受到襲擊，而警員才向疑犯開槍，最後擊斃。總督察叫我哥哥改口供，但佢話~ 當時嘅情況係上到去已經嚮左，見到個犯倒地，冇見到任何襲擊意圖，反而，見到個士沙同pc袋埋左d野，仲窒左少少落個犯袋度，其中一pc又去搬一支生鏽紅角鐵俾個犯揸住，一睇擺明老屈。
我哥哥冇爆大獲，亦冇同佢地夾口供，凈係報佢"局部"見到嘅野。
起初，都冇問題，隔左幾個鐘，總督察叫入房，示意利害，表態威嚇，教唆改口供，表示友好。
但我哥哥沒有答允，最後，反而佢地班友自己改返口供，搵人頂左單野，油麻地警署又少左一個無知警察。
無幾耐我哥哥又調走，但及後都生存左十多廿年...
旺角<何文田<油麻地<灣仔<柴灣<黃大仙<尖沙咀<青衣<長沙灣<荃灣<葵涌，哩廿幾年黎，避風頭，過冷河，左閃右避，一方面照打份工按月有糧出，一方面拼命讀書爭上位，當然樹敵太多，契爺老友亦唔少。
記得，99年我返黎佢帶我出去威，落尖東club，真係一入場，黃sir前黃生後，左右逢源上下關照~ 一台四條友都攬十七條女，冇吹水架~ 果次真係我第一次亦係我最後一次，諗返起，對於我當時廿歲出頭嘅豬仔黎講，都幾威威架~ 亦都係因為返到黎見到個大佬咁樣樣，我先至至唔當差投考警界。
我地玩完走係唔駛堆單，唔知當時哥哥quota有幾多呢~
扎左幾浸之後，我哥哥由行動轉左做內部文職官員。
佢話，嚮佢生涯裡真正擦鞋有兩個時期，
一、係七八十年代入行初，唔打招乎好易奶野，一張白紙考天才死快d。
第二、係佢上左神台，經常接觸d乜太高官，有時真係燒鵝就燒鵝、首飾就首飾、筍盤就筍盤，閉上眼奉獻自己益街坊。
夜晚十二點半打黎話開緊台欠腳，喜歡吃燒鵝就仆倒到搞放定嚮車尾，訂蛋糕仲送埋返堅企，警司叫你上屋企飲食玩俾面派對，遇埋你房訓覺，幾唔願意都要打電話返屋企叫老婆訓先，自己留返嚮度滿場飛。
有時出去玩，叫埋雞俾你，唔係講笑。
襯你飲到頂，先黎開支路易十三，真係咩叫做惡頂。
聽完我的打個突~ 事關我仲有幾個老友記都係當差，有d都當左十三年，但邊有聽過d咁嘅野。
不過與君一夕話，我都了解左很多野，啟發很多。
總結，我哥哥份人縮骨、裝算、陰濕、自私、相當古惑，
幸好對家人還好，
總之，
一切都多得皇家香港警察隊嘅培育同複雜的香港，發酵出這種人。
[
本帖最後由 tonyjaa 於 18-7-2008 17:19 編輯 ]
