你好各位師兄，小弟係德A，當日有10個朋友一齊join師兄你地o既game。睇到各位係依個戰後吹水區傾到火紅火綠，小弟想從一個參加者身份(獨立個體)分享下自己當日睇到o既情況同個人感覺。
小弟其實都有好一段時間無join CGF開post o既game，之前通常都係同相熟朋友玩or join友網(wargame X)果邊師兄o既game黎打，都打過幾次百人game。老實同各位師兄講，其實今次場game同小弟上幾次打o既百人game相比的確係較為混亂。
一朝早坐車無咩野大問題，都算係順順利利。不過到達場地之後，問題就開始出現．．．
小弟記得由旺角坐車到場地大概需要一個鐘多少少，多除少補當1015到達場地。到達之後小弟同友人都各自準備自己裝備等開game，不過一路等一路等都好似無咩進展，結果到1200先可以行出出面分隊。時間上對比返其他百人game最遲11點開始好似耐左d。小弟都明白當時因為有其他師兄需要租裝所以要等，不過以小弟個人角度黎諗會唔會下一次可以先集合大部份上裝完畢o既師兄出去玩住先呢?要多數人等少數人未免有d唔合常理。
分組完畢之後大家黎到戰場，係當時小弟都聽到唔少師兄因為等得太耐所以有少少怨氣，大家都希望快少少開game，但係當時主持人(小弟唔分係host定睇場，總之就係負責主持活動o既師兄)就話要玩任務(VIP)，隨後就講解任務守則。係民怨四起之時其實可以先互打一兩場對攻舒緩一下氣氛同當比大家熱熱身效果可能會黎得更好。
到大家終於可以開game，小弟就係樓上唔知邊位師兄講o既好快就衝左落黎打果四位其中一位。係度同果位師兄澄清一下小弟同3位隊友係係開始點起跑，跳過戰壕先到達師兄所見到我地o既交火位置，絕無偷步，請果位師兄放心。小弟四人一路同對頭無色帶師兄交火，其間有位師兄幾勞氣咁問候我兩位朋友，詳細情況唔多講，總之大家happy shooting!不過交戰不夠十分鐘(可能更少)突然聽到end game。對小弟等一眾饑渴已久o既game友黎講都的確係一個幾大打擊。至於餘下幾場都係不停沿用同一任務同場地對一個大game黎講都死板左少少。不過總括打game情況大致上同各位有色帶師兄都係玩得幾開心。
到差唔多到食飯時間大家收拾裝備返休息區，之後由返到休息區到聽到有飯拎用上1個鐘多d，拎飯時都比較混亂，睇到好多師兄都係自己隨意拎。如果大會將飯點算清楚再分配比組長，再由組長派飯比佢地所負責o既小組(小弟當日對頭人好似係叫細菌師兄)可能會比較有效率。
到食完飯睇睇錶大概1515，再連埋各位師兄食完飯後通常都要休息下吹下水相信都要再過多一段時間先可以打，但如果小弟無記錯應該1700就要上車走，眼見要多等一段時間先可以玩大概1個鐘度o既game，所以小弟最後都係選擇先行離開。
小弟出post並唔係想講任何人不是，小弟都睇到有兩位主持都盡左自己能力照顧大家。不過小弟想講，籌備較大型o既game時所需要考慮o既野係非常之多，包括點樣將咁多師兄分組再每組派人帶(拎飯租裝各樣)，幾多人幫手係場上維持秩序同埋點樣同場地工作人員配合等等。當準備不足o既時候問題就會不斷出現。而問題出現往往唔止係某一方o既主持人問題，而係整個主持團隊o既問題。
所以小弟都希望各位師兄唔好再互相指責，反而應該冷靜諗下問題出現係邊，等下一次做得更加好!最後送上幾句說話比各位師兄。
互相忍讓，互相尊重
認真叫死，認真殺敵
game品，就是人品
今天打game不認真，明天難再搵game打
