唔好意思，原本諗住打完之後即刻上來報告最新情況，但係我頭先用電話影完相，返到來之後發覺我部電話壞鬼埋....冇相喇，但係都做一個簡單o既文字報導喇！
首先小弟3點正殺上去o既時候，已經有幾位兄台先我一步，係司令台前面排緊隊，冇錯，係有司令台負責報名同集合o既，同我地平時打機真係好唔同，反而有o的似去茶樓飲茶要排隊輪籌一樣。去到司令台有一位著住聯邦軍制服o既姐姐仔幫你換coins, 之後你要去另一部機度開卡，開完卡之後，再返司令台同聯邦姐姐仔取籌卡，小弟得到的是聯邦07號籌，不過幾多號籌同係咪玩先係冇關係o既，司令台的人會根據當時有咩野軍階o既人輪緊，有幾多人，而編配各人參戰。小弟由於剛剛上到去，故此被排在第二輪出擊，而先我地一輪o既，係一班上個星期Namco Land搬遷後未正式開幕前已經玩過o既一班玩家，不過佢地都只係二等兵o者！而我地呢o的o岩o岩開卡，未曾參戰過的，就係「民間人」喇！
大約10多分鐘之後，先我地一輪出擊o既戰士仲激戰緊，司令台已經call咪叫籌，一眾被挑選o既聯邦軍戰士就進入「候戰區」聽Briefing了！冇錯！真係有Briefing架！聯邦姐姐問我地：你地識唔識玩o架？識唔識操控o架？唔明唔緊要喎，而家好問喇喎....我同另外3位聯邦勇士都一味話ok架喇...得o架喇....跟住姐姐仔就話：咁你地一人企係一部機後面，等佢地出來你地先好入去，但係唔好入卡住，等我再嗌你地先好入卡，入o左卡之後先入錢...就在我地企好在駕駛倉後面standby之後，聯邦姐姐又召集我地o既對頭，自護的駕駛員做briefing了。
第一輪出撃的聯邦前輩成功在紐約撃退自護軍！我地呢班民間人接力出擊！haha...一入到駕駛倉，第一件事就係戴起耳機同其他同僚溝通下先！大家都唔係好識操作，就開game前的setting都要互相揣摩、互相提點。對家自護軍4位參戰者同我地一樣，都係民間人，正式開game之後，大家都係要熟習一下操作。順帶一提，Namco Land印製的中文版操作說明書是錯的！Shit! 好彩搞了一輪之後，終算熟習了操作。由於大家都係第一次玩的關係，冇得揀場地，系統預設係Side-7練習場。
遊戲共分兩局，第一局小弟唔知係執死雞定係死好命的關係，竟然比我1機Kill 3機，而且冇被KO過，順利咁取得首戰勝利。第二局一開game時，諗住打偷襲，3部僚機走左面，小弟走右面，開頭都順順利利匿埋係大廈後面偷襲了兩部渣古，都打到幾hit....點知好快被人發現o左，跟住就比人圍喇！好在呢個時候隊友終於趕到，形成8機大混戰，不過小弟在戰圈的中間，身中多刀，不停邊擋邊退，最終都好彩力保不失，HP跌過30都未死得去，仲KO返一部渣古添~~首戰兩局全勝，力保不失之餘仲有4機撃墮的進帳，算係有o的交待喇....
完game後，諗住即刻再取籌玩多局喇，點知只係短短15分鐘左右時間，後面已經好多人排緊隊，到我再埋到司令台的時候，聯邦姐姐同我講起碼要等多2個鐘先可以打下一局！Oh~~My God! 由於小弟仲要返工的關係，冇計喇，唯有下次再會。
順帶一提，完game後要去返出卡的控制台，更新卡上面的資料，唔知係咪因為我係首戰的關係，系統會比我揀join乜野MS小隊，小弟現時加入了「第13MS小隊」，軍階是「二等兵」
今次報導係咁多，如果部電話救得返，小弟再upload幾張相上來喇！
