積夫

唉，只係諗住買一兩樣野？分期會冇咁辛苦？應該還得來？

同我當年的心態一模一樣呢！

師兄，我真係想勸下你，唔好高估自己的能力囉，首先你仲未有正職，唔知你有冇收入喇，但係就咁聽你講o既野，真係好擔心。

我當年同你一樣，都係諗住分期喇、張卡仲未有耐爆額喇、我下個月買少o的喇....總之諸多藉口給自己，結果呢，我可以同你分享下我的慘痛經歷：

我等到大學臨畢業先出卡，諗住正式出來做野有o的經濟能力，應該還得掂；
我一畢業即刻搵到工做，非常開心，覺得自己大個仔，屋企要買電視、電腦，都可以我比，幫補下；
我開卡頭一年，只係買o左一部8千幾蚊o既28寸電視、一部1萬2千蚊的notebook同埋一部3千幾蚊o既Plam Vx；
我慢慢發覺，我根本分唔到我還o既錢到底係還緊本金定係還息，而我冇記錯o既話，你上期o的本金找唔晒，假設你買100蚊野找淨1蚊都好，佢都係用100蚊呢個數來同你計息，而信用卡o既息率係32厘；
我一個唔好彩，冇得續約，結果我失業了9個月，9個月冇收入，只係返Partime吊命；
我在失業期間，只係夾硬還到Min Pay...但與此同時，銀行將我的信用額仍然繼續提高，讓我可以繼續碌卡生活，是我失業時的「大恩人」；
我一張普通HXBC的最基本的信用卡，以我一個當時月入13K的人，佢竟然比到我Limit係13萬！幸好我未至於癲到用盡佢個Limit, 但係都已經欠佢10皮野卡數；
我最後發覺根本冇可能還得掂，於是開始借返佢銀行的什麼易得錢、定額貸款，諗住可以整細個火，點知原來只係開多個火頭；
我幾乎要破產，但係我唔忿氣，我得個廿歲仔，只係區區o個10皮幾野，就收我皮？我唔忿氣，於是我開始留意有冇方法搞債務重組；
結果我終於搞到債務重組，一次過借一筆大錢填晒條數，之後每個月定額、定息（都仲講緊要13厘左右）的去還，期間唔可以再借任何其他錢，就連我結婚時，都搞到好麻煩；
我2000年畢業，我明年2009年7月終於可以從新做人！

師兄，信用卡呢樣野，識得用其實真係好好用，你如果有非常良好的理財能力加上自制能力，清清楚楚知道自己做緊乜，我絕對唔反對你「在有穩定收入」的情況下開卡。一來儲到飛行里數，二來亦可以有少少「著數」比你換下禮物，但係...

「購物」從來都係一種「意慾」，係一種情緒反應....你真的控制得了嗎？

金融海嘯o黎緊，出年個市只會越來越差，你又未有正職，你而家走去開卡？我只希望你是一個絕對冷靜理智的人吧，否則我只能夠為你祈禱。

其實絕對沒必要在這麼公開的場合自爆這麼私隱的事，不過如果能夠讓你有所醒覺的，我相信是值得的。

[ 本帖最後由 積夫 於 10-11-2008 03:42 編輯 ]