勁喎財爺！部電腦竟然會有floppy drive !!
【明報專訊】
每年財爺公布預算案時，都會就議員早前交嘅提問作出書面回應，聽落好似好貼心，但衰在今年嘅回應就儲存喺隻磁碟（floppy）度，喺宜家呢個數碼年代，要搵部電腦可以讀到磁碟，真係唔容易，結果就玩死唔少議員！
湯家驊：係咪咁窮呀！
其中一個就係湯家驊，Ronny話佢屋企已經有3部電腦，但無一部電腦可以開到floppy，揸住隻碟都唔知點算好，激到佢大叫﹕「咁大個政府，起碼用光碟啦，政府係咪咁窮呀！」
除咗Ronny中招，民主黨都無晒符，到噚日傍晚都仲未有黨員搵到電腦有磁碟機，認真搞笑。黃成智就話：「打晒鑼咁搵磁碟機，但到宜家未搵到！未聽到有人開到！」佢話都估唔到政府咁老土，光碟都係一蚊一隻啫，可能政府想環保口的啩！
政府：文件少 用光碟浪費
政府發言人就話，因為有關回應的文件數量唔多，如果用光碟會太過浪費，所以先選用floppy，如果有議員真係無方法開隻磁碟，先會複製隻光碟畀佢喎！Emily就覺得咁樣咪仲浪費資源，而且一隻floppy容量不過1.44Mb，既然個file咁細，點解唔索性email？！
鬍鬚曾唔肯講twitter戶口名
另外，鬍鬚曾噚晚出席各大傳媒搞嘅論壇時，就畀無線記者何文雯借題發揮，問佢政府有無預算撥款訓練班高官玩facebook等網上平台，鬍鬚曾就答話高官個個都識玩，唔使培訓。何文雯打蛇隨棍問佢拎twitter戶口名，鬍鬚曾死都唔肯答，仲話「每個人都有秘密」啦！
