火都離
早幾日(15/12/2008)，我本來打算買支L86A2，由於放工放九點，而又只有WAR 死係收九點半，
於是咪唯有叫女友到佢果度買槍囉﹗點知又出事﹗
當時約六點半到，我女友就入咗去WAR 死 問佢地仲有冇L86A2 既貨，佢地搵咗一陣就話只係得番支display...
於是問佢地會唔會返貨，佢地就話唔會再返貨喇﹗
咁無計啦﹗唯有焗住買佢地支display...因為我想去試槍，但放工放九點，所以我地選擇咗落訂﹗
係落訂前我女友就再問佢︰"呢支係香港STAR黎架呵﹖"
佢話︰"係﹗"
女友再問︰"如果支槍有問題，你地又冇貨可以換，咁點呢﹖"
佢話︰"如果有問題可以退返錢﹗"
於是我女友就落咗一百蚊訂，仲講明遲少少大概九點多會黎攞槍﹗之後就行走咗。
我當晚飛的士九點三到WAR 死 門口，見到門口支槍冇咗，以為佢係特登為我收起支槍﹗
點知入到去，個老細見到我地就笑笑口話︰"哦﹗黎攞槍呀﹗係喎﹗我要提提你呢支槍係日本版黎喎﹗"
我地即時︰"吓﹗" 咗一聲之後當場啞咗﹗
之後佢再話︰"係呀﹗香港版一早已經賣晒，賣淨呢支日本咋﹗你要預咗呢支野火力好弱喎﹗"
我地問︰"咁有幾焦耳呀﹖"
佢話︰"嗯…0.6到啦﹗你預咗架喇﹗因為要跟返日本法例嘛﹗呢支原本係for日本果邊架﹗因為依家STAR主攻日本果面呀﹗不過都有人買架，但唔攞去打只係放係度擺囉﹗"
我地即時好迷惑...於是又問︰"咁其他槍舖賣緊果D係咪都係日本版呀﹖"
佢話︰"呀…我都唔知吖﹗因為佢地可能仲未賣晒D舊貨，我呢支係新貨...所以係日本版黎呀﹗"
我地好無奈，係度諗緊點算好時...
佢又話︰"一係咁啦...我同你攞返入廠，等佢地同你換過第二條彈弓啦，大概過幾日度就可以俾到貨你架喇﹗如果唔想既你可以選擇退返錢既..."
咁我地咪唯有話退錢囉﹗佢就又笑笑口話︰"好呀﹗係囉﹗退錢囉﹗"
各位師兄，如果本身呢支槍既力係兩面力，但依家冇啦啦變咗係一面力都冇，請問你地會唔會特登花幾百蚊去換呢﹖
再者，個問題唔係彈弓問題，而今次佢係呢件事入面，根本交代得唔清楚﹗
如果係落訂之前佢講明既﹗我一定唔會落定囉﹗因為其他店舖買緊既係我想要果d兩面力﹗
所以係人地落訂前，作為一個商家，係咪有責任講清楚呢支槍同其他槍有乜唔同﹖
而且唔知點解其他既店舖都講明唔會有日本版出現，但係只係得佢有囉﹗(佢又唔係特約經消商)
講真，做生意唔係咁囉﹗
呢支槍我原意係諗住買返黎唔洗改就落場咁打既﹗就算呢支槍真係出既全部都係0.6焦，我最多係換彈弓﹗
依家我嬲既係佢浪費咗我既時間同埋對佢既信任﹗
既然你係知道呢支槍俾其他星星既L86較弱既，點解佢唔一早同客人講一聲，要客人落到黎先講﹖﹗
當我要去其他槍舖買既時候，已經關咗門﹗我今次係信任佢先落訂同佢買﹗
另外就係，佢同我講星星依家只係出日本版唔會再做香港生意﹗
但我得知其他店舖話並冇此事﹗係冇日本版呢樣野﹗
[ 本帖最後由 ape_2009 於 20-12-2008 14:39 編輯 ]
