對於今次事件, 相信差唔多全部香港人都同悲共憤, 喺各討論區, 社交網站都可以見到接二連三的訊息/評論,
知道自己人遇難 而團結一致, 一齊"插"菲律賓政府/警方 呢個香港人精神 係值得嘉許, 但同時,不理智的咒罵亦都從之產生...
對於政府/警方的營救手法, 小弟唔會評論太多, 因為我想表達ge野唔係佢地, 而係整個菲律賓國家, 整個菲律賓民族
小弟知道大家的心情仍然沉重, 對於一啲意見可能會好激動, 但希望大家諒解, 小弟的心情比廣大市民更加沉重...
小弟係一名中菲混血兒, 近年亦都有到菲律賓旅遊, 果邊的簡單, 純樸的生活令小弟愛上咗呢度...
所以, 對於菲律賓的文化, 風氣, 小弟都略知一二, 但希望大家以一個 菲律賓當時處境的角度去評論今次的事
據小弟所知, 菲律賓果邊ge人對呢件事都非常失望, 喺失望ge同時, 亦都擔心日後香港/國際 給予菲律賓一個不良ge眼光
眾所周知, 菲律賓並唔係啲乜野大國, 因為當地的資源冇我地咁樣 咁豐富,
所以其實菲律賓人的衣食住行, 一切都係從簡, 成為當地的文化, 只不過係有一班"貪官污吏"喺度掠民脂咁解...
小弟曾經喺菲律賓跟親戚住宿過, 間屋其實好簡陋, 一個六人家庭都只不過得 兩張單人床或者一張二人床 (小弟家庭有好多舅父呀姨),
所以大多數人(有大人, 有細路哥)都只會訓地下...而且, 果邊冇熱水爐, 冇浴缸, 如果要沖涼的話就要走出去室外泵水黎沖...
記得有一次大舅父換大門口, 搵黎一塊大木板, 但係就要Fit門口鎖, 佢並冇一啲鑽頭/挫 之類的工具, 只有一把小刀去掘個洞出黎...
更甚, 連一把螺絲批都冇, 要搵一把柴刀黎起螺絲...
唔好只係講我呢個家庭, 就連大城市馬尼拉都唔係好得去邊,
小弟上一次返菲律賓時候係聖誕節, 街上好明顯係冇任何大裝飾, 只不過係有五塊竹片砌成的星星, 最多都只不過係啲星星燈籠仔...
每停一個燈口, 就有成班細路仔(最細真係可以去到5歲果啲...仲要係冇著衫), 甚至係青少年 走埋黎 "乞錢",
點解我會括住乞錢呢兩個字? 因為喺香港人眼中, 呢啲就叫乞錢; 但係喺菲律賓, 就係小朋友們賺得的零用錢...
冇幾耐之前, 小弟更喺 "你想"討論區見到一篇文章(
Click here),
知道馬尼拉的警署連電費都比唔起, 可想而知, 果度啲資源係幾咁缺乏
再用以上例子去睇事情, 你覺得菲警真係有咁多資源去部署行動嗎?
我唔係話佢地手法正確(我都認為唔正確), 但係我覺得正常,
乜菲律賓真係有咁多資源可以Train up到好似德國特警咁嗎?
啲菲警連炸藥 鋼纜都買唔起呀大佬! 點解? 又係果啲錢銀貪污問題~
另一方面, 小弟想針對ge問題就係文化上的差異,
小弟個呀媽係菲律賓人, 但好不幸, 喺半年前已經過咗身,
小弟同一位菲律賓朋友傾計果陣提起呢件事, 大家估吓佢講咗啲咩事眼?
"Celebrate", 係呀!!!!冇睇錯呀! CELEBRATE呀! 慶祝呀! 小弟聽到當場O晒嘴...
但後尾聽返其他人解釋, 佢ge原意只不過係指"悼念"...
小弟喺菲律賓守靈時候, 一樣見到一般香港人意想唔到ge事...
就係黎 探訪的眾人, 佢地望吓我呀媽個遺體, 之後竟然喺出面開開心心咁同成班 都黎探訪的人"聚賭"
但呢個情景, 香港會出現嗎?
菲律賓人一向思想簡單, 慢條斯理
用我地的Standard可能會覺得佢地好差, 但對於當地, 佢地可能已經係盡佢地所能 (去救人? 去消滅證據?)
再者, 點解菲律賓 (特別係中南部) 會有咁多罪惡發生? 小弟覺得 係因為 前政府的無能引致菲律賓落入咁的田地!
種種的貪污令到菲律賓人民 雪上加霜, 令生活更加困苦, 不惜犯法!
所以, 今次事件我覺得菲律賓政府須要負上最大責任!
不過, 即使今次事件係菲律賓之過, 唔代表我地香港人可以任意辱罵菲律賓人!
我地可以強烈表達不滿, 但唔可以好似啲不智人咁,
指 "菲律賓人乜都唔識, 只識做傭工", "用菲律賓國旗抺大便最乾淨", "菲律賓只配做奴僕國家", 等等,
我希望以上的Statement只不過係因為佢火遮眼先會出此言...
基於而家菲律賓生活"困苦", 好多菲傭為咗養活家庭, 要離鄉背井, 山長水遠黎香港搵食,
佢地咁辛苦做野都只不過係得HKD$3500多啲的月薪, 試問我地又當啲菲律賓人係咩人?
如果因為呢件事而辭退晒佢地, 令到菲律賓人民生活更加困苦? 我地又對得起佢地嗎?
佢地本身因為政府無能, 生活已經好困苦, 如果再加上我地所謂的"罷乜罷密", 豈不是令菲律賓人民更苦?
唔好啲講一句, 呢件事件令到8位香港市民失去生命...但係日後的日子因為我地的"罷乜罷密",
令到菲律賓整個民族落難, 咁...試問另一個元兇又係會邊個呢?
反而, 我地應該迫使政府做野, 使到菲律賓的發展更加完善, 菲律賓人民可以生活安定,
我地作為旅客的, 亦都可以放心購物, 欣賞自然美景!
菲律賓文化本身有好多美好, 優越ge地方,
但同時因為呢個文化, 菲律賓人要 低住頭咁面對國際社會的鄙視,
希望大家高抬貴手, 唔好因為呢一次事件, 令本身已低頭的菲律賓民族更加低頭
感謝
