憲兵之父
Posted in army history on Apr 24, 2008 at 6:14 AM
憲兵之父 – Ex WO2 Lin Hung Yee BEM
連洪儀 Lin Hung Yee在1961年九月入伍為37期學兵, Pln Sgt駱錦全, Pln Cpl魏漢光, 當時訓練營真係賓虛噉嘅場面, 有五隊新兵, 雅麗姍郡主到訪觀看200人軍操. 因連君在受訓期間經常午睡, 瞓到成條死魚一樣, 叫都唔醒果隻加埋身材肥胖, 所以被D同期改咗個花名叫做大鹹魚.
畢業後經憲兵四大巨頭(DAPM, OC, 2IC & RSM)到訓練營挑選並派往皇家憲兵隊開始他的憲兵生涯. 62年英國仍然行服兵役制, 所以憲兵隊有如人滿之患, 水雷炮兵只係做吓雜務General Duties.
63年連君被調到SIB, 因他父親是老差骨"山東佬”之關係, 被派到灣仔警署雜差房學習查案, 指模, 影相等, 為期六個月之Identification Bureau Course並跟Chief Inspector HUNT 及Cpl歐陽坤學習. 其後又到DTW學埋駕駛. 在威菲路兵房的SIB一做就做到1966年.
1967年因方便拍拖, 他和女友都是住在軍器廠街警察宿舍, 所以申請掉往域多利兵房之憲兵分局任DAPM司機. 不久就陞兩柴掉到深水埗兵房的憲兵總部. 點知當時兩柴只係多八毫一日又唔方便拍拖, 所以申請見老細飛柴調返域多利還被老細幽咗一默: “我勸你十二點前著埋兩柴軍裝影相留念, 十二點後你就永遠都係一條白布仔.”
調返域多利後仍然做返DAPM司機, 69年陞回兩柴, 72年10月被派到英國受訓, 為期四個月的Basic Provost Course, 當時連洪儀是第二位參加者, 第一位是60年代的陳楚生. 受訓期間陞埋三柴, 學員中得佢一個住Sgts’ Mess.
返港後一直在憲兵隊當Orderly Sergeant更, 1978年被派往英國參加Senior Promotion Course班, 1980年陞三條半, 1982年陞銅牌, 1983年退休, 其後加入滙豐銀行做保安主任, 一做就做咗二十年.
入滙豐後軍隊有信到授勛BEM, 如果到英國, 滙豐只可攞冇薪假期, 軍隊不可能給機票, 唯有在港督府領取, 當時APM派座駕接載穿着民裝的大鹹魚到港督府參加授勛儀式.
大鹹魚的憲兵生涯看來好似平步青雲, 扶搖直上, 其實他跟大部份水雷炮兵一樣, 亦有辛酸史, Senior Cadre因身材肥胖被大聖爺追住殺並要佢減肥, 憲兵沙展期間因BFT唔合格, 被APM Lt Col Dean 召見: “唔好以為沙展可以啖啖定有錢剩, BFT再唔合格就有得飛, 冇得升.” 嚇倒大鹹魚日日到寶雲道秘密練武, 從220磅減至160磅, 也經常從華富邨跑到添馬上班, 最有辦法之人對住BFT都冇晒計. 連君對住D鬼佬講洋文就天下無敵, 揸起枝筆就重過鐵筆, Yeah! Yeah! Yeah! 就在憲兵隊從散仔Yeah到銅牌, 在任期間卻能代表香港憲兵隊參加全球英國憲兵大會而晉見英女皇, 退休後又追封BEM, 推薦勛銜來之不易, 要有四位前任CO贊同Provost Marshal才批准. 我相信連洪儀在憲兵隊的表現軍中都無人能及, 憲兵之父實至名歸也.
