好有趣，我又分享先，雖然我無蠔屎用咁多機，但搵返咁多部機出黎都幾有趣
初初大學未有手提電話時，就係用呢部野
和記的霹靂火 call 機，十幾年前的號碼 72997712 我仲記得
當年一轉堂，學校的電話亭就大排長龍，好多同學仔排隊覆call
前排再返去大學，電話亭仲響度，但而家應該好少人用了。
用左一年左右，就開始換成mobile，起碼唔駛排電話覆call
小弟的第一部係 Motorola StarTAC J，當年用萬眾台，果陣仲未係雙頻，只有pcs制式
當年呢部機仲係用full SIM card，仲有伸縮天線夠型，部機的缺點係無震機，而且通話好細聲，在學校打電話，一有飛機飛過，就要叫對家等陣先，等飛機過左，再繼續傾；在地鐵都聽得好辛苦
雖然可以拿去改大聲，加震子，但係因為怕整壞，所以都無去改過
用左2-3年，終於頂唔順佢咁細聲，又無震機，就換左第二部
Panasonic GD90
當年 GD90 最大特點係四方向鍵，比起傳統Ericsson, Mo記等，只得兩方向控制，先進一倍
綠色背光mon亦係當年潮物之一
都係用左兩年左右，話說潮流已經開始向彩mon進發...
Samsung T108
T108係當年首部雙mon機，有16和弦鈴聲，七色指示燈，藍光背燈，而且有內置留言信箱，即使你無留言信箱plan，電話依然會幫你自動錄起留言，十分方便。
呢部機玩左無耐，就發覺佢同StarTAC 有同一個死穴：細聲
在地鐵係無法聽到對家講野，只好忍痛放左呢部一代潮物
還原基本部，網上有人話呢部夠大聲，於是退一步...
Samsung N628
藍光mon依然夠潮，雖然無彩mon，但最緊要夠大聲，唔係對家講粗口我都聽唔到唔識回應
係無T108咁好玩，但因為可以由電腦upload 16和弦鈴聲，亦可以自己將midi音樂轉成鈴聲，所以仍然係好玩之物
因為夠大聲又易用，所以當年買多左部比我娘親
正在用N628的時候，小弟都開始左PDA 之路，所以當Palm一出電話，小弟由美國撲到台灣，再撲返香港，始終都係行貨機好d
Handspring Treo 600
Treo 600 係首部進入Smartphone界的機，當年部份的Treo 的特點，經過咁多年，仍然可以在新一代smartphone搵到。例如機身上的ringer switch，仲有抽插式的sim 卡tray，到目前就只有iphone身上先搵到。
用呢部機吸引我的除左Palm OS之外，仲有可以用倉頡輸入法
雖然呢部機已經算係極品，但可惜流動數據同wifi 的年代開始，令Treo系列的受歡迎度由高峰跌入谷底
當年呢部機因為震機功能壞左，而且無得上wifi (只用GPRS好慢)，所以都係焗住轉
HTC TyTN II
無錯，我已經愛上有 qwerty keyboard的smartphone，因為只要裝上倉頡，打中文字就變得好快
雖一唔好處，似乎就係行Windows系統，反應慢
在用TyTN II的同時，我亦出左另一部作公司機
HTC S730
同樣有keyboard，但缺點都係一樣：慢
直至Android系統面世...
HTC Hero
當時全smartphone界就只有三款Android機： Google G1, HTC Magic 同埋 Hero
我就出左最新的Hero，雖然無左qwerty keyboard，但為左逃離Windows 的魔掌，無得揀...
之後我出左另一部Android機返大陸用
Huawei U8150
一千蚊有找，比人搶左唔心痛啦
直到而家，呢兩部Android機都係日常用的，而Treo 600 就在家休養，間唔中佢都會做calendar reminder
