剛剛放學返到屋企，又一次過回啦... 大家討論下交流下，的確係賞心樂事~
回
#14 rho837兄：
講起三大地產商，其實係馬灣變成「宣教樂園」之前，
某地產商都提出過做「飄雪樂園」同「真雪主題公園」添，
政府地都係批左，係某地產商突然唔玩，
比左某教用黎做「主題公園」，寓宣教於遊園咋嘛...
老實講，雖然個公園本體係某地產商出錢，
但政府除左批地之外，真係一蚊都唔駛出咩? 配套設施都要錢過woh...
掉返轉講，當某地產商真係起左個賽車場出黎，
我都唔認為成個project會一蚊公帑都唔駛用囉。
再者，起呢個「米缸老鼠樂園」出黎雖然真係「塞隻老鼠入米缸」，
起碼普通市民都會入去 / 入到去玩丫。
但起個賽車場呢? 當無賽事果陣開放比公眾入去走轉，
或者學某個政府出錢既室內靶場咁，比總會代理開放公眾好未?
對普通市民而言，使用機會 / 吸引力唔見得會比「米缸老鼠樂園」高。
回
#15 蠔屎兄
認同50 km/h既賽車表演係多餘，但老老實實，
當場地唔適合用作賽車之時，按路面設計車速作出限制都係正常做法。
更請唔好忘記，其實Cap.374 道路交通條例
係禁止係本港道路上進行汽車競賽或速度試驗既。
回
#16 Alex山兄
其實要搞的話，應該係開工前既啟德跑道搞，成條飛機跑道，要幾快有幾快啦...
仲有無敵維港景，兼且避免埋法律同途人安全問題。
搞得event，只要有觀眾席同做好交通安排，一定有捧場客，
之前既聖誕機動嘉年華一樣有咁多人行入啟德，rite?
回
#18 Hunter兄
> 賽車會講過好多次, 只要政府批地, 起賽車場政府一毫子都唔洗出。
唔知你記唔記得東亞運果陣，果個「建議中」既射擊場地既故事喇。
果個故事話比我知，原來政府批地，唔係單單圈笪地出黎咁簡單呢。
接駁馬路，水電渠等配套，就算車會出晒錢整成個車場，對外連接既呢D公用系統，通通都係政府要駛既錢。
另外，仲要計規畫呢?
>
搞街道比賽, 絕對唔會用高速公路
最好就係尖沙咀封幾條街鬥,
TST本身係旅遊區, 商業交通壓力又細
用市區街道就仲大鑊，
我當尖沙嘴路段全部夠闊夠安全進行賽車先算，
我剩係想講，
知唔知每年馬拉松封尖沙咀路段，對全港交通既影響同壓力有幾大?
馬拉松仲要係凌晨跑，跑一個上晝咋woh...!
>
之前既小型賽車不知搞得幾出色, D國際車手仆到黎玩,
當年維園既香港國際小型賽車格蘭披治大賽, 係全世界最有名氣同最高獎金的小型賽車賽事。
咁依家呢?
>
而家唔係非法賽車, 只係封路表演, 對於安全問題, 我相信人地車隊考慮得比我地清楚。
但從報導中我就唔見得佢地既考慮有幾詳細囉... 當然，可能係政府 (同埋在下)過慮啦。
>
唔成立, Red bull air race只會係機場或者海上比賽。
如果話air race
只會係機場或海上比賽的話，
其實我都可以話，香港既道路設計亦唔係用黎做賽車比賽，所以呢個提議唔可行囉woh?
回
#21 kimkileo兄
新加坡都有開賭場黎吸引遊客，我地係咪都要考慮下?
回
#26 mkmonkey兄
從報導睇應該係車會搵左人表演先再同政府申請，政府批准時已經講明 50km/h限制。
老實講，我既
重點其實在於：「是否每當有『世界某某冠軍』打算黎香港表演的話，
港府就一定要按照果位仁兄既所有要求，100%咁招呼週到，先至算係『做到野』既政府呢?」
F1賽車冠軍 就要封路比佢任砌；
特技飛行冠軍 就應該任佢係市區上空飛?
Bungee jump冠軍 咪應該封青馬橋比佢跳?
性愛冠軍的話 咪要幫佢搵埋女? (大誤) <-爛例子
個人認為，咁講唔通囉。
