耳聽三分假, 眼看未為真
People sleep peaceably in their beds at night
only because rough men stand ready to do violence on their behalf.
-- George Orwell
黎左CGF玩好幾年, 一直都感覺到呢到有個好得意既現象,
就係呢邊好多人鍾意模仿執法人員,
或者誇耀自己既往跡,經驗等等同執法人員有幾相近, 有幾相熟,
但就偏偏從言行舉止中表現出討厭, 甚至係憎恨執法人員 / 公職人員.
其實都幾精神分裂...不是嘛?
有D網友, 會話見到政府或者執法人員有做D乜, 或者無做D乜,
因而指出政府唔同既問題,
我同意, 香港政府有唔少須要改進既地方,
公職人員既工作亦有好多進步既空間.
呢點, 就算係公職人員自己都會明白.
但係, 我想指出一樣野,
大家都係生活係現實世界, 而現實世界係並唔完美既.
每個人都知道, 增加警方人手可以令警方更有效調配人力處理各項問題;
每個人都知道, 從速修訂法例可以避免法例漏洞被人利用;
每個人都知道, 講到尾, 香港乜野事理論上都關政府事.
不過, 好老實, 又係咪真係一句「唔X駛佢做呀?」就解決得到問題呢?
資源有限, 慾望無窮, 讀過econ既朋友都應該會聽過呢句說話丫.
每個人都希望政府即時而全面咁解決自己所指出既問題,
但正如網友所指出, 香港有700幾萬人, 有700幾萬個需要,
政府可唔可能100%咁滿足晒大家呢?
「看見別人眼中的刺, 卻見不到自己眼前的樑木」
挑剔別人, 指出別人既錯處絕對唔難,
但問題係, 有無辦法提出一個實際既解決方案呢?
齋吠的而且確好過癮, 你見社民連三子就感覺到啦,
每次開會吠兩聲就被主席趕走, 跟住全日就自由時間, 做自己野也好, 做其他野也罷.
但又當開左會, 可以同選民交待, 年尾再狙擊D出席率低過佢既政敵喎...
咁絕條橋. 真係唔係個個諗得到.
除左齋吠之外, 佢地有無任何貢獻呢?
而係網上齋吠齋小既人, 除左打擊真正做緊野既人之外, 又對解決問題有無任何貢獻呢?
講得遠左
之所以會用呢個題目, 其實係想回應之前"醉酒駕駛"Post入面,
有網友話警方派傳單宣傳活動係因應粉嶺車禍而做既"Show".
我想講一句,
好多野, 並唔係你見到咁多, 就係得咁多;
或者你見唔到, 就無發生過.
同類型既宣傳活動, 一直係每年既大時大節進行,
係你同你既親朋戚友相聚去緊玩既時候,
好多執法人員, 就係當時你不在既酒吧夜店等地進行宣傳.
做Show咩? 係, 呢個的而且確係場Show, 你唔做, D公眾又點接收個訊息?
不過我可以好肯定咁話你知,
呢類活動, 並唔係你口中所講既「補鑊」Show.
唔該唔好侮辱有份做野既公職人員.
請記住, 天寒地凍,
當你係屋企棉胎中, 攬住老婆 / 女友 / 隻貓 / 隻狗 甚至係攬住自己,
暖笠笠咁訓緊果陣,
街上面, 仲有好多人,
救護, 消防, 警察, 食環, 電力, 水務, 煤氣, Highway, 你屋企樓下既保安, 對面既seven....etc etc
努力咁工作緊,
你先可以訓得咁安樂,訓醒先唔會無水無電一門口都係垃圾.
至於 "我地唔係咩都唔做, 你地班市民想點呀? 做Q死我地好唔好? 做有鬧唔做又鬧..."
好老實講, 你有亂鬧既權利, 作為公職人員, 我地都有反駁既自由.
唔係要你歌功頌德, 大家都係職責所在遮.
有唔岩既地方, 不妨直言, 但請鬧得有建設性,有道理, 有根有據, 唔好亂小一通.
鬧得有Point有理據既, 無人唔會接受;
亂小亂來既, 官方雖然無幾可會反駁 (或者話, 反駁左傳媒未試過會刊登).
但既然有人提到, 呢到係"吹水講場", 任何人都可以係到吹水,
作為CGF網友之一, 你唔係唔比我反駮, 甚至學某D網友咁亂小呀?
咁唔通嘛.
請謹記, 己所不欲, 勿施於人.
你唔希望比人無端或者無理指責,
請記住, 我地都一樣;
你比人亂屈亂小會反駁會發火,
請記住, 我地都一樣.
x x x
新年流流, 開呢個post當然唔係想搵交嗌,
不過係想不吐不快遮.
在下衷心咁祝願CGF各位網友,
係牛年身體健康, 身心康泰! 視野更闊, 思路更清更成熟!
