"空手道"睇完, 佈景美指都算細心, 畫面係靚既,
訓練場面, 打鬥, 都算用心拍,
stephy武場亦似模似樣,睇得出有認真練過下. 唔會姐手姐腳.
文場做得仲好, 演出比孽念深果堆有深度左, 可能經歷過失戀, 又踏入中女階段,
劇情同佢真實生活有雷同, 感覺到佢由心演返出黎, 係幾令人抽心, 又加少少同情分.
有幾場做到爛撻撻個樣, 可憐得黎又有幾分可愛同搞笑
杜生作為新導演, 分鏡調度合格, 只係劇情交待上明顯嫩左少少,
可能劇本本身情節幾簡單, 無乜橋可以扭, 所以著重抒情同生活細節, 但又唔想咁灰咁煽情, 變左有D去得唔夠盡既感覺.
睇到佢同演員之間溝通得幾好, 幾個主角亦交到戲,
父女情, 師徒情, 愛情, 友情(呢part令我諗起破事兒, 亦係stephy做得好好既一套戲), 各有小情趣.
只嫌刻劃唔夠深, 如聾啞人仕面對生活困難呢條線可以再發揮多D. 整體慘位可以再慘D, 反彈位可以再開心D.
片頭剪出黎好似好沉重, 但成套片其實又唔太灰, 有D位仲幾搞笑.
比較同類型既片, 講風格同影像當然係比唔上杜其峰"柔道龍虎榜"強烈, 講熱血勵志遜於"點5步", 青春激情不及"狂舞派",
但杜文澤加左當下生活感,現實矛盾,令成件事比柔片"有解",
再用少少幽默感同中女中佬內心掙扎,放響當下灣仔銅鑼灣街景入面 ,又令人覺得比"點"同"狂"貼地返D, 能諷刺時弊多一D.
睇credit原來由武指到出鏡客串係揾左唔少空手道港隊人馬幫手(e.g.空手道兄妹劉知名, 劉慕裳),又有倉田保昭, 又有何慈茵(劉家良徒孫)
咁強人腳, 可惜佢地發揮唔多, 打得唔夠喉, 若最尾加多一兩場大戰, 或者更可滿足武術愛好者.
整體係合格有餘, stephy演出討好, 拉唔少分, 製作用心既治愈式小品, 小情懷,
當然講唔上乜野鉅作, 但肯定不是爛片. 可以入場一看. 75分.
