Hybrid DPM Body Armour
呢件野，係同前面介紹既Osprey Body Armour Trial Version一齊入手既，
同樣係因為英國朋友公務繁忙，直至到今日先收到，我等左佢好耐架喇...
Hybrid DPM，呢隻相信已經由MTP收左佢皮既試驗型迷彩，
由零八年有相流出市面開始，差唔多每個本地英軍玩家都鬧過佢D色水核突，
仲個個都話唔會入...
而在下...其實當年都鬧過下既... 哇哈哈哈~
今日睇返，如果要同MTP相比，我就情願英佬用Hybrid喇...
起碼英佬味重D，唔會英美不分丫嘛。
(話雖如此，過多一年半載，等到MTP平果陣，我咪一樣會入... 人就係咁衰格架喇...
)
呢件野，大約都係零八年左右，係PECOC計畫既資料開始公開之後有相見街既，
係同一時期，Hybrid DPM既Armour就最少有兩款出左街，呢件係其中一款，
另外仲有Hybrid DPM webbing(好想要，但搵唔到)，
同埋Hybrid DPM 既OLTV (本身有諗過買呢件，但無袋，而OLTV又唔係好用，所以算數)。
呢件野既設計...
well，我都唔係點知點形容好，如果單講件armour的話，
我覺得幾復古，佢既molle帶相當地少，兼且肚前面係無位比你裝野，
基本上係要配合埋Webbing用既 (或者係配合埋其他load bearing vest之類啦)。
件armour係肚前有四個插扣，打開之後你會見到背心本體右邊係用橡筋車住，
換而言之，原設計中，你只可以從左邊穿著呢件armour，都係一個頗為奇怪既設計。
呢件甲，相信都係使用Osprey防彈板既，
裝板既地方就係件甲入面，再一個復古既設計...
而同頭先介紹既Osprey Body Armour Trial Version相比，
佢無左右兩邊既防彈板袋，保護能力就自然無咁強喇。
綜合上面幾點黎睇，呢件Hybrid DPM Armour既試驗味道都幾重，
再加上MTP勝局已定，Hybrid DPM作為稀有藏品都值得儲既，
而且著落場又唔怕撞衫添...
同Osprey Body Armour Trial Version一樣，
Hybrid DPM Armour 係lable上面，都係叫返Fragmentation Vest既，
同樣，我都未搵到係咩原因。
因為天氣太熱，相信係十月前都無機會著呢件野落場，所以「用後感」報告，就要稍後再黎喇...
多謝捧場~
