首先多謝各位對工友(包括在下)既支持先啦~
希望日後係工友唔好彩遇到D「H」人係街搞事既時候，
而有朋友路過見到，又方便的話，
可以就好似早幾日尖沙咀果單「阿姐被抄牌，繼而辱警」事件咁，
多幾位正義市民出黎仗義執言，相信工友們工作都會開心好多，
起碼知道香港仲有識分是非黑白既正常人既。
x x x
講返正題，
其實呢，今時今日係香港舉行示威遊行並唔需要「申請」，
不過法例上都要求主辦者係限定時間內「知會」警方，
同埋拎埋份NONO (Notice Of No Objection)，就可以如期舉行架喇。
至於開路同護送，其實就算示威者無要求都好，
只要佢地舉行既地點有可能影響到其他市民 / 道路使用者，警方就會安排人手處理。
當然，亦都係要同主辦者協商點行點做既。
(但協商好唔代表佢地會按佢地承諾去做，呢點大家見慣架啦)
x x x
至於工友個人操守方面，
老實講，我相信所有人都對「黑羊」反感，亦都無人願意因而被害群之馬影響。
貪贓枉法呢D當然不可接受啦，
不過在實務而言，
個人認為好多野都係存在灰色地帶既。
例如有人會要求警察執勤時隨時隨地都要「斯文有禮」，
我同意對普通市民唔應該粗言穢語，普通既截停搜查亦無必要語氣強硬。
但警察執勤時面對唔同階層，唔同背景既人，
對唔同人有唔同既溝通方法，如果認為會有一種「萬能溝通方法」，
並要求所有前線人員「爾後按此要領操作」的話，
我真係唔知應該話有咁既諗法人既人太傻定太天真喇。
(最新聽到既故事係：有人投訴交通警截停佢既時候，
用手輕力敲佢司機位旁邊既玻璃，投訴人因此覺得個警察侮辱緊佢woh)
總括而言，警務工作從來都唔係一份斯文工，
但又未至於24/7都惡形惡相既，
相對實務既做法，應該係「見機行事」。
x x x
至於近期好興既一個名詞「特區公安」，
老實講，
你問我的話，我都想做公安，
人地有權有勢有錢有面，我地?
有，一肚氣囉... 哈哈哈哈~
你有幾何見到一個地方既執法人員做得我地咁
窩囊架?
如果香港警察真係如果D幫我地改名既人所講，已經變成「特區公安」的話，
我相信果D仁兄應該無機會幫我地改名囉...
至於警隊係公眾活動中既處理手法係咪開始強硬?
我會話，係之前太軟弱，任得D人太亂黎遮。
我唔敢話依家係「撥亂反正」，不過，依法辦事(rule of law)係必要既。
至於有人質疑依家香港係Rule by law，
都係果句，「你睇得自己太低，而又睇得我地太高喇...」
x x x
紅白藍邊個最勁? 無得比過woh...
大家各有長處，講真真係無左邊個都唔掂。
不過但就法律依據同受訓內容以及往跡黎講，
我始終會話警察係最All Round果個。
消防白車入境海關懲教等等都可以組成工會，亦都有權採取工業行動，
但法例列明警察係無呢D權利既，
同時，當以上既部隊遇有「力不從心」之時，佢地既長官有權指示撤出，
但警察就必須頂上。 而且因為身為 "The Agent of Last Resort"，
警察理論上係只可完成任務，無得再交波既。
x x x
其實公僕呢個名詞係相當反影現實既，公務員既老闆好明顯就係市民，
做得好的確係應份既，出得糧就要做好本份，老闆有要求都係應該。
但人非草木，如果老闆剩係識小唔曉讚既，比你都唔想撈 / 撈得唔開心啦?
老闆都有好多種，就算對外佣都有唔同既表現
有D friend到完約果刻賓主依依不捨相擁；
有D 小小唔岩就大巴大巴車埋去，燙斗菜刀出齊。
至於開工積聚既係成就感定怨氣?
問題在於我地好唔好彩，會遇到咩老闆囉...
x x x
另外，回應返jimjimjimjim099既問題：
首先呢，我唔係「學院派」既人，我當年仲係叫緊「訓練學校」既。
至於同班兄弟姐妹既問題，
我會話人夾人緣啦，有唔少甚至發展為情侶日後結埋婚添!
始終一大班後生仔女密集式咁朝夕相對咁耐，總會遇到岩傾既人既。
不過做唔做得成「好兄弟」「好姐妹」都仲要睇好多野，
例如大家既背境、班主任既態度同安排、日後駐守既地點等等，
就等如讀書果陣，總有D同學特別好傾，又總有D到畢業果日都唔係好記得佢叫咩名咁囉。
唔知解唔解答到你既疑問呢?
