喺office做到就死咁濟
，見有假期，而且女友又投訴過話好耐冇去過旅行
，於是就谷鬼氣攞假去日本。
返翻嚟香港嘅時候，咦！乜多咗件行李嘅？
上面重痴哂FRAGILE公仔喎！
花咗一個鐘頭時間拆bubble紙，終於見到真身
點知原來係盒中有盒
再開！終於「容疑者X之現身」
好喇，入正題，再唔講真係會俾版主扣分...
今次去日本有一半原因都係為咗呢枝Hudson廠嘅M1 Garand。自從睇完band of brothers之後已經開始鍾意呢枝槍。玩埋Call of Duty之後簡直係上咗腦。奈何出過呢枝槍嘅只有Hudson同Marushin。本來買Marushin 8mm BB彈槍係最正路嘅，但係好衰唔衰Marushin打完最後一粒彈en bloc clip(彈匣)嗰下係pop一聲而唔係garand嘅招牌ping一聲，所以實在有啲買唔落手。
鎖定目標之後，就落槍街搵。Hudson呢間廠喺香港其實唔算冷門，好多人都識。不過呢枝M1就似乎好少人有留意。我去「暗搶」舖頭問嘅時候竟然出現我有我講Hudson，佢有佢答8mm Marushin嘅情形...所以唔使好耐之後我已經知道要買呢枝槍都係要用啲不尋常方法......
由鎖定目標到決定旅行行程呢段時間，實在有好多嘢要做。所以千祈唔好諗住買邊枝槍之後就疊埋心水等上飛機。去旅行前，最基本要做嘅功課就喺刨熟槍廠嘅網頁，因為入面會有提到你可以點樣買佢嘅產品。日本唔同香港，冇一個特定嘅地方好似似廣華街咁，而且每間零售店本身亦唔係間間廠嘅嘢都賣，所以要做足research。以呢枝garand為例，hudson喺東京只有一間零售舖頭，而呢間舖嘅網頁更加冇話有garand賣。所以，與其落零售舖碰運氣，倒不如用Hudson嘅「Web販售」function試一試。
做咗基本research後，就係時候搵識日文嘅朋友幫手。因為同廠訂貨的話你唔會直接踩上間廠問，你會填表卅send email，而日本人嘅英文程度同就清盤嘅有限公司有得揮。所以，基本上你要睇下佢使唔使填表，要的話就要用日文填表。其中一個要填嘅項目會係你個名。記住寫漢字，再拼一個片假名嘅拼音。呢個時候你應該已經知道自己會住邊間酒店，填埋酒店地址同電話，張form搞掂。
另一樣要留意嘅係你諗住留幾耐。每間公司都會有個processing lead time，以Hudson為例就係5-7 business day。所以你只係去五日四夜的話我勸你要諗真值唔值得。我今次去就stay咗一個星期。
好搞掂！不過唔好就咁上飛機住。記住print低所有有關資料，例如間公司同嗰件貨嘅catalogue、公司聯絡方法、購買需知等。Passport個人資料嗰頁make一個copy，俾人哋verify你嘅身份用。
搭飛機去到，千祈唔好第一件事掛住玩住，落咗酒店information desk搵幫手先。我嘅經驗就係：一去到酒店，扔低行李，落information同佢講我想訂嘢，可唔可以幫下手。information姐姐就拎咗我先前print嘅資料打電話去Hudson問。日本人有度好就係佢哋會出盡力幫客，information姐姐係咁同Hudson啲人講話要買嘢個係遊客，好快就會返歸。於是，Hudson收到我經酒店fax過去嘅order form兩日之後已經將件嘢送嚟酒店。
我嘅經驗係hudson用速遞（宅急便）送件嘢嚟，嚟到嘅時候收你現金。所以盤川要預多少少。
收到貨，亢奮呢！不過跟住你就要諗點運返香港。我嘅意見係唔好拆盒。因為個盒其實證明咗你嗰件係玩具，而且寄艙時亦冇咁易掟爛。跟住可以去搵100yen shop，類似香港嘅10蚊店買幾pack
bubble紙，然後將個盒五花大縛，角位再加cushion，例如咁。
喺個packing度留個位，擺返原本將提貨單貼喺上面，上面寫咗佢係「玩具﹣M1ガーランド」，咁過X-光機嗰陣人哋都冇咁驚嚇。自己再幫張提貨單影兩張相存底。
包好後，最好自己整幾張fragile紙貼住先。
雖則冇理由咁化學，但係大家都知個個機場對於「點樣掟爛行李」都有一套獨門秘笈，所以都係貼咗先，去到check-in counter再等航空公司幫你貼多兩張穩陣。
以我嘅經驗，只要係符合日本同香港法例嘅模型槍卅氣槍，出入口都冇乜特別嘅申報規定或者限制。所以，去到日本機場後，可以直接去航空公司counter當寄艙行李。（拜托，唔好諗住hand carry）。
大家最關心嘅相信係返到香港嘅入境問題。今次嘅經驗顯出示，落機嘅行李香港機場係會抽查而唔係唔查或者全部都查。開嚟查過嘅行李會有個"HKIA Security Checked"嘅tag跟住。我件baby就冇呢個tag，所以亦都冇俾人開過。如果你好似我咁係寄大槍，咁你就要耐心等等。因為咁大件行李佢係唔會用行李輸送帶出。佢會有專人推出嚟行李輸送帶個位等你pick up，通常會係最後先出。攞咗之後過海關。如前所述，因為呢件係模型槍，唔會有槍口動能數據（即係0J），又冇real firearm parts，亦唔係戰略物資，所以我嘅理解係我冇「受管制物品」需要報關，所以我行綠色通道。綠色通道會有海關抽查，不過亦都抽唔中我。
出咗閘，你要諗嘅問題就係點帶佢返屋企喇！
講咗咁耐，睇相喇！
Hudson信封入面有教你點樣訂parts。盒上面貼咗貼紙話俾人聽佢係玩具。
日本人最過癮嘅地方呢，就係佢哋當客係神。張form上面填埋你個名（為免起底，我打咗厚格）。
薄薄嘅manual，因為佢係模型槍，冇發射能力，所以實在冇乜好講。
Ladies and Gentlemen, US rifle M1 .30 Garand please
八粒.30-06 dummy連en bloc clip
upper receiver，發黑處理絕對唔係普通上油可比美
好靚嘅木色同木紋，上埋蠟水，好認真的說。
Bolt hold open
快樂的泉源
金屬製的en bloc clip
呢枝嘢洗咗我94,000 yen (94,000/100X8.51=$8,000)。八千銀買枝「亞鉛合金」，0條蕉嘅槍，抵唔抵就見人見智喇。我就覺得嗰下「叮」一聲值回票價喇。
(P.S. 去日本，尤以要買槍，點都要學兩句日文)
多謝欣賞
