好早我已經好鍾意SVD，亦曾擁有過一支手拉既A&K SVD。可惜，當我連用標準長度既M14都嫌太長(我都有178cm既..)，SVD實在唔係我下場之選。唔落得場既槍，對我黎講係無用既，所以就賣左啦.
係之後得到一支馬記FAMAS，對犢牛式大增好感，亦諗起SVD既犢牛版 - SVU。查左d資料，發覺都有d人自己改左出黎，睇落好似唔太難，自己亦幾鍾意SVU個樣，最重要係長度縮短，管長不變，實用性高！適逢"射手"平價賣緊支display既A&K SVD AEG版，思前想後，入手！
SVU原槍:
來源:
http://www.dragunov.net/svu.html
經過4個月斷斷續續既DIY，總算完成！先去圖！
上偽裝後:
先多謝欣賞! 下面寫DIY過程!
原槍: A&K SVD (AEG)
要改為犢牛式，有兩個方法。
一、將電閘開關改去前面
二、用一條連接杆連接前面既扳機去後面既波箱
第一個方法容易d搞，但發覺咁做會無左單發！因為單發原理係頂齒轉一圈後推動單發勾，單發勾彈開扳機接電既部件令到斷電。假若無左扣扳機既機構，改為前面純開關，單發勾就會無得彈開扳機去斷電。自己唔識其他電子斷電器，又唔想無單發，就決定用第二個方法。
改其他野前，先要整前方既扳機盒。為左穩固全槍，要想辦法連結扳機盒及Pistol grip。因此第一步，去左五金舖買呢d L形鐵(唔記得叫咩名)
同時，係固定手托既金屬環左右磨出一條通道(俾扳機盒卡住&俾連接杆走過)。
固定好。
到整扳機盒... 用到支陳年g3手拉雞既前手托，鋸左出黎。
係SVD手托鋸出空間。固定扳機盒上L形鐵。
調轉SVD個扳機護弓裝上去，好合適
裝上扳機。放個pistol grip試試看~
到後面啦。原本SVD個扳機被扣時，就會推前波箱外側一塊金屬件，而呢塊金屬件連接著接電既部件，所以只要推動到佢就可以開到槍啦。
為此，磨左上方件零件，以及係原本扳機個上蓋磨出空間。
只要拉動到呢件零件就開到槍。
咁用咩做連接杆呢？哈哈！BBQ叉！
用係學校學既扭鐵線工夫扭呀扭.... 真係扭到手都斷orz..... 但總算連接到前後。之前係金屬環磨出黎既空間就係為左俾呢條杆行架啦。
但係拉動個零件時，因為力矩唔平衡，令到件零件轉動左.... 加條彈弓拉一拉就好d啦
扣動扳機，拉動連接杆，連接成功！叫做完成扳機組。
加鏡橋。其實唔穩，呢部份到而家都未改善好，仲要再搞落去..
加腳架。其實咁搞法，就連拆手托入/拆電池都幾麻煩，更莫講話拆波箱... 呢個係最大壞處。
到尾托啦，係支P90零件槍鋸呀鋸....
初步完成啦。直到考試後都無再改動過… 其實有好多唔滿意既地方:S
考完試後，重新整過幾樣野，不過懶無影到部份相..
第一樣搞係整短個尾托，以及重新固定尾托。本來好搖，而家就算穩定。
但係搞尾托既時候，發覺扳機盒愈黎愈唔穩… 因為我揀左支垃圾手拉雞既手托做扳機盒，一來唔係方形，二來D膠太廢！
決定重做！諗左好耐都諗唔到用咩料，最後就用到Bell 1911既槍盒
整左好耐好耐重新裝扳機，連接呢樣果樣，固定好個扳機盒(因為拉扳機時扳機盒會向後退)…… 搞掂，fit好多
然後，要蓋住條連接杆，以及尾托一d空位。好多外露螺絲orz
到槍頭啦。鋸條水喉&鋸馬記XM177既膠火嘴做SVU既槍口制退器，用鋼膠蓋住水喉頭尾。原槍管只鋸走頭2, 3cm，保留以直接連上水喉及火嘴。
尾托單腳架。真槍無，但自己想加落去
原料用到行山杖。搞左好耐，都唔算太成功，叫做可以望下… 落場就唔敢開出黎用啦^^"
槍頭水喉上黑色，然後偽裝(遮住d螺絲...orz)。
完成！可以落場啦！
多謝耐心觀看全帖，小弟DIY技術有待改善，希望大家見諒 :S
